{idkey=5042b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2874-rene-herde-avp-mep-y-pdr-ta-ekiboca-riba-tur-tereno%3FItemid%3D101][title=Rene+Herd%C3%A9+%28AVP%29%3A+MEP+y+PDR+ta+ekiboca+riba+tur+tereno%21][desc=+EKIBOCA+RIBA+FINANSA+EKIBOCA+RIBA+ECONOMIA+EKIBOCA+RIBA+INTEGRIDAD%26amp%3Bnbsp%3B+Pasobra+nan+oportunismo+y+negativismo+ta+pone+nan+cera+wowo+pa+realidad%21%26amp%3Bnbsp%3B+Raportnan+publica+recientemente%2C+tanto+na+Aruba+como+den+exterior%2C+ta+mustra+cu+Aruba+a+recupera+bon+di+e+caida+economico+causa+pa+mal+gobernacion+den+lus+di+e+crisis+mundial.+Raportnan+local+ta+mustra+cu+finansa+publico+ta+recuperando+mas+lihe+cu+a+anticipa+of+a+planea%2C+anto+sin+e+%26quot%3Bmedidanan+estilo+MEP%26quot%3B+cu+a+corta+den+carni+y+weso+di+Pue]}
Raportnan publica recientemente, tanto na Aruba como den exterior, ta mustra cu Aruba a recupera bon di e caida economico causa pa mal gobernacion den lus di e crisis mundial. Raportnan local ta mustra cu finansa publico ta recuperando mas lihe cu a anticipa of a planea, anto sin e "medidanan estilo MEP" cu a corta den carni y weso di Pueblo den pasado. Apenas seis aña pasa e economia den decadencia total y finansa publico sumamente debil, tabata e temanan principal di preocupacion pa futuro di nos pais. Awe mester conclui cu e maneho di gobierno di AVP di ultimo 6 aña a atende, soluciona of cambia considerabelmente e situacion financiero y economico di nos pais. Un ehempel chikito pero importante ta cu e norma di edeficit cu tabata planea pa otro aña, probabelmente ya a wordo logra na fin di 2015. E temor pa futuro financiero y economico di nos pais cu a domina tur discucion for di 2008/2009, no tey mas. Awor mester percura pa e maneho constructivo aki continua, mientras cu ta sigui cambia y desaroyo tur otro area di bida den nos pais.

EKIBOCA RIBA FINANSA
E conclusion aki ta confirma cu oposicion di MEP y PDR tabata ekiboca tur e añanan aki! Nan tabata ekiboca riba maneho financiero, pasobra nan no tabata na fabor di e maneho pa inverti prome y reduci gasto gradualmente. Nan a aplaudi e intervencion innecesario, inefectivo y illegal di Hulanda. Awe e resultadonan ta mustra dicon e maneho financiero balansa aki tabata esun corecto. MEP y PDR tabata kier tuma MEDIDA PISA prome djis pa drecha finansa publico. Nos pais y nos pueblo no tabata nan preocupacion. Nan a sostene e medidanan contra pueblo cu algun hende na Hulanda tabata propone. Resultadonan ta mustra awe cu e maneho cu AVP a hiba tabata miho pa nos pais y pa nos pueblo!

EKIBOCA RIBA ECONOMIA
E echo cu den apenas 6 aña, mey mey di un crisis cu MEP a bay laga nos pais aden, a saca nos pais for di e caida di 15% di GDP y ciere di e refineria, riba su mes ta remarcabel. Mayoria di pais a cai den e crisis cu 2 pa 3%. Aruba ta e unico pais cu a cay cu 15%!  Esey kier men cu no ta e crisis mundial so tabata e causa. E mal maneho di MEP tabata e causa principal! E crecemento economico di e ultimo 5 aña, e inversionnan grandi cu a haci, e fortificacion di forsa di compra di parti grandi di nos pueblo, e salbacion di e fondonan social/pensioen y e reduccion substancial di desempleo, ta mustra cu partidonan di oposicion tabata ekiboca riba maneho economico tambe.

EKIBOCA RIBA INTEGRIDAD
Den lus di e echo cu e problemanan financiero y economico principal cu MEP a laga nos pais cun'e a wordo atendi den forma responsabel, no ta straño cu MEP ta buscando otro temanan pa critica. Nan soño ta pa por mustra cu gobierno di AVP ta comete corupcion. Di e forma ey MEP ta pensa cu por kita e mancha cu nan a pone riba nan mes como e "partido di corupcion". Raportnan y publicacionnan extenso ta confirma e fama aki! Ta pasobra MEP y PDR tambe a constata cu nan tabata ekiboca riba finansa publico y economia, pero nunca lo tin e grandesa pa reconoce esey publicamente, nan ta busca otro temanan pa kita e atencion. Pero hasta riba asuntonan di integridad partido MEP no tin pia pa para. Tanto den gobierno como den nan propio partido e falta di integridad tabata y ta cos di yora. Den gobierno e raportnan a confirma e falta total di integridad y e grado halto di corupcion y violacion di leynan door di MEP. Den nan propio partido, e forma cu a y ta trata hende cu tin un otro opinion, ta bisa con grandi e dictadura y intolerancia den e partido ta. E gañamento sin fin ta mustra e falta di norma y balor moral y etica politico cu nos pais ta rekeri. E conclusion ta pesey cu tambe riba integridad MEP ta totalmente ekiboca!

Expresionnan haci den e articulo aki no necesariamente ta refleha opinion di ArenaPoliti.co