{idkey=3957b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3057-minister-otmar-oduber-riba-10-miyon-florin-na-inversion-pa-infrastructura-di-nos-ciudad-cultural%3FItemid%3D101][title=Minister+Otmar+Oduber%3A+Riba+10+miyon+florin+na+inversion+pa+infrastructura+di+nos+ciudad+cultural][desc=Trabounan+grandi+den+pleno+ehecucion+den+caya+principal+di+San+Nicolas+Minister+Otmar+Oduber+ta+indica+cu+despues+di+casi+3+a%C3%B1a+di+planificacion%2C+awor+por+mira+un+cantidad+grandi+di+trabounan+ta+tumando+luga.+E+mandatario+mustra+riba+e+hecho+cu+ora+bo+tin+algo+bon+planifica+e+ta+tuma+su+tempo.+Awor+ta+asina+leu+cu+varios+proyecto+ta+canando+simultaneamente.+E+museonan+na+San+Nicolas+di+cual+dos+ta+canando+nan+trayecto+pa+un+apertura+e+a%C3%B1a+aki+ainda.+Monumentonan+cu+ta+hayando+nan+debido+atenci]}
Trabounan grandi den pleno ehecucion den caya principal di San Nicolas

Minister Otmar Oduber ta indica cu despues di casi 3 aña di planificacion, awor por mira un cantidad grandi di trabounan ta tumando luga. E mandatario mustra riba e hecho cu ora bo tin algo bon planifica e ta tuma su tempo. Awor ta asina leu cu varios proyecto ta canando simultaneamente. E museonan na San Nicolas di cual dos ta canando nan trayecto pa un apertura e aña aki ainda. Monumentonan cu ta hayando nan debido atencion. Minister Oduber ta comenta cu den Conseho di Minister ta tratando Uncle Luis Store caminda mester bin un ley pa ubica Departamento di Cultura den e edificio historico aki, pa sigui trece e fluho di personanan pariba di brug. Intencion ta pa tin un fluho di entre otro empleadonan publico, artistanan y tambe bishitantenan frecuenta e area cu awor ta hayando un cara nobo. Sr. Oduber ta contento pa mira cu e trabounan di e parti infrastructural ta tumando luga. Ta spera cu e trabounan aki termina pa fin di juli comienso di augustus 2016. Intencion ta pa luna di september tin un 'art fair' hopi grandi den combinacion cu apertura di museonan y un Conferencia di Turismo unda e CEO di World Tourism Organization ya caba a confirma su presencia, como tambe e secretario general di UNESCO cu tambe a confirma di lo ta na Aruba. Ta trata sigur di un di e conferencia di mas grandi cu ta bay tuma luga riba un nivel halto di Turismo y lo bay man den man cu culminacion di e prome fase di revitalisacion di henter e area aki na San Nicolas. No ta un secreto cu San Nicolas lo comberti den e ciudad cultural di nos isla. Na momento cu esey tuma luga, oficina di turismo lo percura pa e promocion inicia pa tur turista cu in Aruba, sa e balor di Pariba di Brug. Nan lo sa cu nan no por bay for di nos isla sin bishita San Nicolas unda lo tin museo, monumento, arte, artesania, nos talentonan, cuminda crioyo, cu otro palabra tur aspecto di Cultura di Aruba. E Minister di Turismo, Transportacion, Sector Primario y Cultura ta elabora cu lo percura pa algun tour bus adicional pa specificamente trece nos bishitantenan di tanto e barconan crucero, como tambe turistanan cu ta keda den nos hotelnan na Palm Beach,  pariba di nos isla. Por menciona cu tin inversionistanan cu ya caba ta haciendo inversionnan y otronan cu a compromete pa eleva nan calidad di producto pa di e forma ey trece un 'spin off' grandi pa San Nicolas. E mandatario a tuma un momento pa combersa cu algun propietario di negoshinan den e area y nan clientenan unda ya caba ta sinti e alegria y entusiasmo pa tur e cambionan cu ta tumando luga.

Pa locual ta trata e cambionan infrastructural por menciona cu e trabounan ta tuma luga hopi organisa. A cera un parti di e caretera pero trafico por sigui circula sin ningun inconveniencia specifico unda despues cu termina e fase aki lo continua cu e otro pida di caminda pero habriendo e otro arterianan pa trafico por sigui circula den e area.  E trabounan ta cuminsa na inicio di caya principal net patras di e gasoline station pasa e rotonde dilanti Nicolaas Store continua na e area di Arubus cu algun kiosco net dilanti e sucursal di oficina di turismo ta. San Nicolas e aña aki lo disfruta di un inversion di riba 10 miyon florin na infrastructura so. Arubaanse Wegenbouw Maatschappij ta ehecutando e trabounan mientras cu DOW ta supervisando henter e proyecto cu ta financia pa e fondo di TPEF. Minister Oduber ta satisfecho mirando e entusiasmo grandi cu tin pa un area cu despues di asina hopi aña no a ricibi un atencion awor ta bira e centro di desaroyo cultural cu lo trece hopi bishitante pariba di nos isla. San Nicolas tin espirito Cultural cu awor ta haya su momento pa briya y ta bira central den e desaroyo turistico di nos isla.

Expresionnan haci den e articulo aki no necesariamente ta refleha opinion di ArenaPoliti.co