{idkey=2677b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3062-rene-herde-avp-keda-sinta-ta-keda-un-problema%3FItemid%3D101][title=Rene+Herd%C3%A9+%28AVP%29%3A+%26quot%3BKeda+sinta%26quot%3B+ta+keda+un+problema][desc=Apesar+di+cambionan+den+ense%C3%B1ansa+y+adelanto+den+resultado%21%26amp%3Bnbsp%3BE+fenomeno+di+%26quot%3Bkeda+sinta%26quot%3B+den+ense%C3%B1ansa%2C+ta+keda+un+problema+serio+pa+paisnan+rond+di+mundo.+Pa+Aruba+tambe.+Segun+un+publicacion+reciente+e+porcentahe+di+mucha+cu+ta+keda+sinta+ta+mas+halto+na+Aruba+cu+casi+tur+otro+pais+di+Caribe.+Nos+muchanan+no+ta+menos+capacita+cu+muchanan+den+otro+paisnan.+E+motibo+pa+e+cantidad+grandi+di+mucha+cu+ta+keda+sinta+tin+otro+motibo.+Segun+Rene+Herde%26%23039%3B%2C+lider+di+fraccion+di+AVP+y+educador+di+prof]}Apesar di cambionan den enseñansa y adelanto den resultado! 

E fenomeno di "keda sinta" den enseñansa, ta keda un problema serio pa paisnan rond di mundo. Pa Aruba tambe. Segun un publicacion reciente e porcentahe di mucha cu ta keda sinta ta mas halto na Aruba cu casi tur otro pais di Caribe. Nos muchanan no ta menos capacita cu muchanan den otro paisnan. E motibo pa e cantidad grandi di mucha cu ta keda sinta tin otro motibo. Segun Rene Herde', lider di fraccion di AVP y educador di profesion, e causa di keda sin asina halto na Aruba, ta e concepto di siña cu nos ta sigui usa y den e forma cu nos ta organisa nos enseñansa. Rene Herde': "Tanten cu nos no cambia e forma cu nos ta wak siñamento, con nos ta educa, kico nos ta spera di muchanan y specialmente con nos ta organisa siñamento den nos scolnan, nos lo keda cu e problema grandi aki y su costonan humano y financiero halto. Nos a haci adelanto den ultimo 10 aña. Pero e no ta basta. Nos mester haci mas pa haya miho resultado. Cada mucha ta conta. Cada mucha mester haya e miho enseñansa posibel."

MAS PLACA TA YUDA?
Hopi hende ta conclui cu mester hinca mas placa den enseñansa pa soluciona e problema di siñamento y e fenomeno di "keda sinta". E realidad ta contradeci e pensamento aki. For di un publicacion di Ministerio di Enseñansa mes por saca afor cu, mientras Aruba ta gasta un porcentahe hopi mas halto di su presupuesto na enseñansa cu otro paisnan, tog nos tin un porcentahe mas halto di mucha cu ta keda sinta. Aruba ta gasta mas cu 20% di su presupuesto na enseñansa awor aki. Mas cu paisnan grandi manera Hulanda(12%), Canada (13%) of Barbados (15%). Pero si compara e porcentahe di mucha cu ta keda sinta den enseñansa basico, Aruba tin e porcentahe mas halto: 6.96%. Barbados tin 6% di mucha cu ta keda sinta. Trinidad y Tobago tin 5.79%. Costa Rica tin 5.08%. Jamaica tin 3.56%. Cuba tin 0.43%. E pensamento cu gasta mas na enseñansa dimes lo duna miho resultado no ta corecto. E diferencia den e sistemanan di enseñansa, di con ta siña y guia muchanan. Con ta forma maestronan di scol y guia nan, ta parse di ta splica e diferencia miho. Rene Herde': "Nos tin cu inverti mas den cambia y renoba e forma cu nos ta wak siñamento, den e forma di duna les y guia nos muchanan den y pafor di scol, den e formacion di nos maestronan di scol y den e forma cu nos ta midi exito den siñamento na scol. Kisas nos mester cuminsa bishita paisnan cu ta gasta menos y duna miho resultado cu nos."

Expresionnan haci den e articulo aki no necesariamente ta refleha opinion di ArenaPoliti.co