{idkey=1183b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3066-gabinete-me-ii-prome-minister-eman-a-basha-e-prome-capa-di-asfalt-pa-caminda-di-4-via-di-green-corridor%3FItemid%3D101][title=Gabinete+ME+II%3A+Prome+Minister+Eman+a+basha+e+prome+capa+di+asfalt+pa+caminda+di+4+via+di+Green+Corridor][desc=Avance+di+Green+Corridor%26amp%3Bnbsp%3BORANJESTAD+%E2%80%93+Despues+di+30+a%C3%B1a+di+un+cantidad+di+plannan+den+lachi%2C+dialuna+mainta+tempran+Aruba+a+conoce+un+momento+historico+ora+cu+un+di+e+proyectonan+ey+a+mira+luz+di+dia.+E+proyecto+grandi+Green+Corridor+a+conoce+un+otro+fase+ora+cu+a+cuminsa+asfalta+e+caminda+nobo%2C+den+area+di+aeropuerto%2C+e+inicio+di+%E2%80%98vierbaansweg%E2%80%99.+Prome+Minister+Mike+Eman+tabata+presente+pa+e+ceremonia+special+y+hasta+a+duna+un+man+pa+plama+e+asfalt+den+presencia+di+ehecutivonan+di+DO]}
Avance di Green Corridor 

ORANJESTAD – Despues di 30 aña di un cantidad di plannan den lachi, dialuna mainta tempran Aruba a conoce un momento historico ora cu un di e proyectonan ey a mira luz di dia. E proyecto grandi Green Corridor a conoce un otro fase ora cu a cuminsa asfalta e caminda nobo, den area di aeropuerto, e inicio di ‘vierbaansweg’. Prome Minister Mike Eman tabata presente pa e ceremonia special y hasta a duna un man pa plama e asfalt den presencia di ehecutivonan di DOW y ODINSA, empresa cu a gana e destaho pa realisa e infrastructura di Green Corridor.

“E ceremonia aki ta nifica cu e proyecto ta den terminacion pa loke ta e parti di ‘planning’. Cu bashamento di e capa di asfalt por spera cu den algo mas cu dos luna e caminda nobo aki te cu Pos Chiquito lo ta cla,” Prome Minister Eman a señala, unda a pone capa di asfalt riba un distancia di 50 meter como test. Tur cos ta indica cu e proyecto ta canando segun schedule. “Mi tin cu bisa cu Nacionnan Uni a bini Aruba hustamente pasobra esaki tabata un di e proyectonan PPP (Public–Private Partnership) cu a wordo ehecuta di forma profesional, cu nan a etala pa otro islanan di mundo por mira como ehempel."

Green Corridor ta cuminsa for di banda di aeropuerto y ta yega te San Nicolas, incluyendo diferente camindanan na banda di e barionan pariba di brug. E ta inclui un area den cual pa prome biaha Aruba lo conoce un caretera di 4 via conectando Oranjestad y San Nicolas. “Esaki ta un dialuna cu a lanta di forma positivo, cu un trabou asina grandi pa nos comunidad,”Prome Minister Eman yen di orguyo a expresa.

Ing. Marlon Croes, director di DOW, a splica cu bashamento di e capa di asfalt den e prome parti di e caminda di Green Corridor, ta un “milestone” den e proyecto cu a cuminsa traha intensivamente riba dje na 2009. “Despues di cinco aña di trabou duro, awe a cuminsa cu bashamento di asfalt di e prome parti,”Croes a bisa. E prome 50 meter tabata un test, pero cu lo mester sigui diamars, 5 di april, cu 500 meter di asfalt pa dia te ora cu yega crusada di Pos Chiquito.

Durante e conferencia di prensa mainta tempran na e luga a splica cu e proyecto Green Corridor, ta uza un otro tipo di asfalt cu normalmente ta wordo uza na Aruba. E ingenieronan di ODINSA a studia e situacion di Aruba pa traha un mescla special di asfalt, cu ta duna e caminda un duracion mas largo. ODINSA ta ehecuta e caminda d Green Corridor y ta responsabel pa su mantencion den e 18 añanan despues cu e construccion finalisa.

Un aspecto cu e director di DOW a aclaria ta e asunto di banchi riba e caretera nobo. Henter e proyecto a wordo diseña door di ingenieronan y exclusion di e banchi no ta algo nobo na Aruba. Tin mas caretera cu a wordo traha sin e banchi cu ta algo normal na Hulanda, Italia y tambe Merca. E caretera tin un acabado diferente na banda cu ta forma parti di e diseño.

Grupo Odinsa via di su empresa Caribbean Infrastructure Company- CIC, cu base na Aruba, ta wordo representa pa Arkitecto Carlos Zubieta, kende a gradici pa cooperacion di tur esnan cu ta haciendo un gran esfuerso pa finalisa e proyecto na augustus 2017. Tur cos ta canando na tempo.

Awor ta finalisando e prome fase y despues ta sigui cu e parti di rehabilitacion di e camindanan existente for di Pos Chiquito te San Nicolas. E proyecto PPP aki ta encera construccion y mantencion di e caretera di aeropuerto te na San Nicolas, mas o menos 34 kilometer, cual ta encera un inversion total di 77 miyon dollar. E ta encera ampliacion di e caretera principal, di aeropuerto te na Pos Chiquito, pa uno di dobel via cada banda (seis kilometer total). E otro parti ta reconstruccion di e careteranan existente entre aeropuerto y San Nicolas, tambe esnan na banda. Na e ceremonia di dialuna mainta tabata presente varios miembro Parlamento di Aruba.

Expresionnan haci den e articulo aki no necesariamente ta refleha opinion di ArenaPoliti.co