{idkey=6175b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3168-upp-salubridad-publico-di-5-strea-of-di-5-cruz-salubridad-publico-di-aruba-parce-di-ta-den-intensive-care%3FItemid%3D101][title=UPP%3A+Salubridad+Publico+di+5+%E2%80%9Cstrea%E2%80%9D+of+di+5+%E2%80%9Ccruz%E2%80%9D%3F+Salubridad+Publico+di+Aruba+parce+di+ta+den+intensive+care][desc=+Cu+hopi+preocupacion+partido+UPP+a+bin+ta+tuma+nota+desde+varios+a%C3%B1a+caba%2C+pero+particularmente+den+e+ultimo+simannan+cu+e+situacion+di+Salubridad+Publico+aki+na+Aruba+mas+y+mas+ta+mustra+di+ta+den+direccion+di+un+deterioro+total.+Desde+algun+a%C3%B1a+caba%2C+UPP%2C+mas+cu+cualkier+partido%2C+a+bin+ta+denunciando+y+avisando+tocante+e+situacion+reinante+riba+tereno+di+cuido+di+salud.+Na+varios+ocacion+a+purba+na+hala+atencion+di+gobierno%2C+parlamento+y+nos+comunidad+tocante+e+topico+importante+aki.Mientra]}
Cu hopi preocupacion partido UPP a bin ta tuma nota desde varios aña caba, pero particularmente den e ultimo simannan cu e situacion di Salubridad Publico aki na Aruba mas y mas ta mustra di ta den direccion di un deterioro total. Desde algun aña caba, UPP, mas cu cualkier partido, a bin ta denunciando y avisando tocante e situacion reinante riba tereno di cuido di salud. Na varios ocacion a purba na hala atencion di gobierno, parlamento y nos comunidad tocante e topico importante aki.

Mientras cu gobierno keto bay ta keda gaba cu proyectonan grandi cu ta costa miyones y cu no tin ningun prioridad na e momentonan aki, nos ta mira cu cuidonan basico pa nos hendenan tur dia ta bay atras. Tanto riba tereno social, laboral, di vivienda, enseñanza, nos por mira con mas y mas e situacion ta keda wordo marginalisa pa falta di atencion y tambe falta di fondonan.

Mientras cu pa otro cosnan si ta crea e medionan necesario pa sigui malgasta placa di pueblo, pa despues pasa medidanan, pa pueblo por yuda tapa e buraconan financiero cu ta wordo crea.
Un di e area cu sigur den e ultimo luna mas y mas ta mustra di ta den un total detorioro ta esun di nos salubridad publico. No unicamente nos a denuncia e proyecto cu ta yena cu corupcion, esta esun di expansion/renobacion di hospital, pero tambe di situacionnan indesea den nos sistema di seguro unda ciruhanonan ta abusa di nos sistema di AZV pa asina ilicitamente enrikece nan mes, sin cu nan ta wordo poni responsabel corda pa haya un sanccion.

Awor nos por tuma nota di loke ta e atencion medico den nos instituto mas importante di cuido medico, esta hospital, unda cu mama y yiu ta fayece na momento di parto y tambe di un criatura cu ta fayece pa falta di atencion na momento cu esaki tabata necesario. Mientras tanto ta hopi ta e patientnan cu ta wordo manda Colombia, unda cu te hasta na Colombia mediconan no ta comprende kico ta pasando aki na Aruba.

UPP sigur a avisa cu e construccion biyonario di edificionan pa hospital, no necesariamente lo contribui na un mihor salubridad, si no haci na prome lugar inversion den profesionalnan cu ta duna servicio, ekipo medico necesario pa asisti nos profesional y den mehoracion di nos sistema di cuido, manera ta e.o. comunicacion entre e profesionalnan medico pa asina por tin un atencion mas holistico pa cu e patient. Na di dos lugar UPP a bin ta denuncia e falta di un control debido den salubridad publico. Parce cu na Aruba, desde nombracion di Visser y awor aki Schwengle, salubridad a para bira un "wild west": no tin control pasobra no tin un inspeccion di salubridad den funccion.

Como no sifuera poco nos por mira tambe cu incluso e cuerpo di ambulance ta sufri di falta di hende y falta di ekipo, particularmente autonan. Ta increible cu ta hincando miyones den un Green Corridor, mientras cu no tin ambulance suficiente pa transporta nos pashentnan den casonan di emergencia. Esaki ta e Aruba di 5 “strea” cu gobierno kier pone nos kere aden? Mientras cu ta papia di Aruba 5 “strea”, nos salubridad publico parce uno di 5 “CRUZ”.
Nos di UPP ta consciente cu e criticanan ta hopi riba nos cuido medico. Sinembargo nos no mester bai huzga nos profesionalnan, cu dia aden y dia afo ta eherce nan profesion como debe ser, pasobra kizas un error a wordo cometi. Nos no por keda sin mira e miles di casonan cu SI a bai bon. Pero nos mester pone e nivel y calidad di nos cuido medico den e contexto y e perspectiva y circumstancianan bou cual nos profesionalnan mester eherce nan profesion, particularmente pa falta di un vision y un maneho riba e tereno aki di e gobierno actual. Tambe UPP ta kere cu den e sociedad moderno di awendia, di parti di p.e. un hospital, mester tin e transparencia necesario, cu reserva naturalmente pa privacidad di un pashent, riba kico ta pasando den e instituto aki. Tambe ta importante pa e minister responsabel, percura pa na un manera independiente e asuntonan aki wordo atendí, pa asina por crea e confianza cu ta necesario den nos salubridad publico.

P'esey tambe UPP, ta sostene e manifestacion cu lo tuma lugar diabierna awor, pa asina exigi atencion di nos gobernantenan, particularmente ministro di Salubridad Publico y na ministro di Asuntonan General, cu tur dia ta papia di Aruba di 5 “strea”, pa loke ta concerni salubridad publico na Aruba, SIN hasi mencion kico nan kiermen cu un cuido di 5 strea. Ta momento pa manda un señal tambe pa Parlamento, particularmente na e parlamentarionan cu ta sostene e gobierno, cu ta necesario pa atende e problematica di cuido medico cu gobierno den Parlamento. No por tolera pa nos Pueblo keda sufri bou di un maneho irresponsabel asina.

Partido UPP
Booshi Wever
20 di april 2016

Expresionnan haci den e articulo aki no necesariamente ta refleha opinion di ArenaPoliti.co