{idkey=9598b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3253-mireille-sint-jago-mep-mike-eman-su-maneho-ta-pa-crea-mas-catibo-di-debe%3FItemid%3D101][title=Mireille+Sint+Jago+%28MEP%29%3A+Mike+Eman+su+maneho+ta+pa+crea+mas+Catibo+di+Debe%21][desc=E+lo+no+ta+un+noticia+nobo+pa+nos+tur+aki+na+Aruba%2C+cu+nos+economia+a+cambia+bira+uno+digital+of+manera+nan+sa+bisa+na+Ingles%2C+un+%26%23039%3Bsmart+economy%26%23039%3B.%26amp%3Bnbsp%3BPa+haya+un+trabou+den+un+smart+economy+ta+requiri+cierto+habilidadnan+y+conocemento+digital%2C+cu+no+cualkier+hende+por+ehecuta.+Esey+lo+encera+cu+trabounan+cu+no+ta+exigi+conocemento+digital+of+habilidadnan+professional%2C+lo+wordo+menos+paga+y+lo+bira+menos+tambe.+Si+un+pais+kier+pa+su+pueblo+sigui+desaroya+su+mes+pa+por+contribui+y+participa+na+un]}
E lo no ta un noticia nobo pa nos tur aki na Aruba, cu nos economia a cambia bira uno digital of manera nan sa bisa na Ingles, un 'smart economy'. Pa haya un trabou den un smart economy ta requiri cierto habilidadnan y conocemento digital, cu no cualkier hende por ehecuta. Esey lo encera cu trabounan cu no ta exigi conocemento digital of habilidadnan professional, lo wordo menos paga y lo bira menos tambe. Si un pais kier pa su pueblo sigui desaroya su mes pa por contribui y participa na un economia di conocemento, lo mester pone enfoce riba e contenido di educacion, awor mas cu nunca. Pa ogra esey, bo mester di un educacion post secondario por nada. Bo no por haya na Aruba ni Hulanda, pero si na varios otro paisnan den EU. Na Europa tin varios Universidad na Scandinavia y Alameña cu ta ofrece educacion academico por nada. Na Hulanda y Aruba, nan ta bin cu maneho cu a hisa e debe cu cada studiante lo keda cu ne despues di caba su estudio. Asina nan ta sigura pa crea mas catibo di debe, pa nan por domina nos como pueblo. 

Tin por ehempel tres Universidad na Alemaña, cu ta ofrece 126 estudionan na Ingles riba e nivel di bachelor y no menos cu 752 master degrees y 313 doctorate degrees. Tur ta por nada. Pues, pa un studiante di Aruba esaki lo sali hopi mas barata cu un estudio na Hulanda mes. Toch nos ta wak un Minister di Enseñansa cu ta elogia su mes pa logra lasonan cu e Universidadnan mas caro cu tin na Canada y Merca. Mientrestanto, na Aruba. Un pais chikito cu un Minister Presidente cu ta pretende di ta MP di un pais grandi y ta orguyoso di a crea un mega MEGA debe, no por bisa cu el a crea e debe aki, pa por garantisa cu su pueblo por haya educacion por nada. A contrario! Den e presupuesto di 2015 nos por a wak cu Mike Eman mes a scohe pa baha e subsidio di Gobierno pa Universidad di Aruba. Na 2014 un studiante mester a paga AWG 1200 pa por cuminsa su estudio na Universidad. Na Augustus 2016 esaki lo bira AWG 2500 pa aña! Minister Michelle Hooyboer-Winklaar, e supueste defendor di e cartera educativo, a bisa den prensa varios biaha, cu el a pidi Universidad pa no laga e tuition fee subi mas pa por lo menos e sigiuente añanan. Pero ta Michelle Hooyboer-Winklaar mes a dicidi di acepta cu Mike Eman a baha e subsidio pa un educacion post secondario y academico pa asina hinca e studiantenan den mas debe ainda. Riba dje, no ta Hooyboer mes a subi schoolgeld?

Ta pesey, abo y ami, nos tur lo tende e Gobierno aki menciona e palabranan ‘Smart’ y ‘Sostenibel’, pero esey no ta locual nan maneho ta ensera. Hulanda a cambia e basisbeurs cu studiantenan no mester a paga bek, pa un ‘sociale lening’. Na e mesun momento nan ta crea obstaculo pa preveni pa studiantenan por stroom door di Mavo pa Havo, nan a baha e cantdad di studiante riba e nivel di Havo/VWO y pa esnan cu kier keda studia na Aruba, nan a hisa e tuition fee di Universidad di Aruba cu mas cu 108%. E ta laga bo pensa, si tin tanto oportinudad pa nos hobennan por studia sin crea un debe, pakico Gobierno di AVP no ta promove esey? Pakico nan ta endeuda henter nos pais? Pakico Hulanda ta laga nan sigui fiesta cu placa di pueblo enbes cu e CFT (Comission Fiesta Tin?) tuma pasonan fuerte pa stop e mal maneho aki? Mi opinion ta, cu e lo ta mas facil pa domina un catibo di debe cu e ta pa domina un paisano liber. Ta Mike Eman mes a bisa manera un loco, cu e ta prguyoso di a crea un debe cu ta impagabel pa nos pais. Den porta de eleccion e lo bin gaña nos y bisa cu nan a haya gas y nos tur lo bira rico. Pero wak con e Venezuelano ta sufri bou di un Gobierno malo, aunque cu e pais mes ta rico. Gabinete Mike Eman lo toca un ritmo, pero si bo ta wak bon, nan ta baila ful un otro baile. Ta pueblo so por cambia e ritmo of e baile pa tur dos cuadra cu otro. Ta pueblo so por logra un mihor rumbo pa nos tur y preveni pa nos bira catibo di debe bou maneho di Gabinete Mike Eman II.  

Expresionnan haci den e articulo aki no necesariamente ta refleha opinion di ArenaPoliti.co