{idkey=4991b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3309-gabinete-me-ii-hospital-nobo-un-fabuloso-proyecto-ta-bayendo-full-swing-y-segun-plan%3FItemid%3D101][title=Gabinete+ME+II%3A+Hospital+nobo%2C+un+fabuloso+proyecto+ta+bayendo+full+swing+y+segun+plan][desc=Gabinete+Mike+Eman+ta+ehecutando+su+vision%26amp%3Bnbsp%3BORANJESTAD+-+E+comunidad+di+un+pais+desaroya+merece+un+bon+calidad+di+bida.+Esaki+den+e+sentido+mas+amplio+di+palabra.+Esaki+tabata+e+punto+di+salida+na+momento+cu+Gabinete+Mike+Eman+a+tuma+rienda+di+e+pais+aki+na+fin+di+2009.+Un+cuido+medico+optimal+den+un+centro+avansa+ta+un+di+e+puntonan+cu+ta+cay+bou+di+un+bon+calidad+di+bida.+Mescos+ta+e+caso+cu+un+infrastructura+adecua.+Gabinete+Mike+Eman+ta+cumpliendo+cu+e+exigencianan+aki.+Proyectonan+cu+pa]}
Gabinete Mike Eman ta ehecutando su vision 

ORANJESTAD - E comunidad di un pais desaroya merece un bon calidad di bida. Esaki den e sentido mas amplio di palabra. Esaki tabata e punto di salida na momento cu Gabinete Mike Eman a tuma rienda di e pais aki na fin di 2009. Un cuido medico optimal den un centro avansa ta un di e puntonan cu ta cay bou di un bon calidad di bida. Mescos ta e caso cu un infrastructura adecua. Gabinete Mike Eman ta cumpliendo cu e exigencianan aki. Proyectonan cu pa decadanan largo a drumi den lachi di gobernantenan anterior, a wordo lanta foi soño. Esaki tabata necesario ya cu no tabatin ningun accion pa haci algo na e caminda di Playa pa San Nicolas unda trafico ta pega, sigur den oranan pico. Mescos cu e waf na Playa cu ya no tabata apto mas pa cumpli cu exigencianan di un pais den pleno desaroyo economico y turistico. E ideanan tatatey, pero nunca a yega na nan realisacion. Te ora un gobierno determina a bin y a cuminsa realisa nan. Un pa un.

Proyecto di hospital ta un di nan. Pa aña y añanan a papia pa construi un hospital mas grandi mirando cu poblacion di Aruba a crece considerablemente despues cu dr. Horacio Oduber Hospital a keda cla na 1976. Pa e tempo ey un hospital moderno, pero cu den transcurso di tempo no tabata por a cumpli cu e exigencianan di un poblacion mas grandi y un mundo mucho mas moderno. Awe e proyecto di un hospital nobo ta den ehecucion. E hospital nobo ta bira un facilidad moderno cu tecnologianan moderno pa por ofrece un servicio di calidad na e pueblo di Aruba. Un plan cu tabata drumi den e lachi di olvido, cu tabata wordo saca den bes en cuando y poni bek pasobra e tabata costa demasiado trabou, determinacion, curashi y esfuerso pa traha riba dje. Gabinete Mike Eman a sak'e di lachi, a cumpli, no a papia pero a haci.

Riba 'Dia di Enfermeria' Prome Minister Mike Eman hunto cu Minister di Infrastructura Sevinger a haya un presentacion di e contratista mayor Arrellano relaciona cu desaroyo di e hospital nobo. Tur cos ta canando segun plan y ya pa fin di e aña aki ta cuminsa pasa pashentnan over pa e edificio nobo pa asina por sigui  renoba e edificio original. Despues di e presentacion amplio a sigui un recorido na e sitio di construccion unda e mandatarionan a haya un miho bista y splicacion con e proyecto magno aki ta desaroyando. Ambos minister a keda impresiona di loke nan a tende y mira. "Comunidad di Aruba merece e miho calidad di cuido posibel y cu construccion di un hospital nobo cu tecnologia avansa, esaki a wordo poni en marcha", Eman a bisa, despues di un inspeccion profundo di dje y su colega.  Sevinger: "Cu masha orguyo y satisfaccion mi ta para aki. Mi ta mira pa mi mes con e vision di gobierno na bienestar di comunidad, ta den pleno ehecucion."

Despues Eman y Sevinger a subi e pisonan di dr. Horacio Oduber Hospital pa saluda y felicita e enfermero y enfermeranan riba nan dia. Nan a wordo ricibi cu braza habri y sonrisanan grandi.

Expresionnan haci den e articulo aki no necesariamente ta refleha opinion di ArenaPoliti.co