{idkey=9114b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3506-gabinete-me-ii-gobierno-a-cana-e-caminda-pa-reformanan-importante%3FItemid%3D101][title=Gabinete+ME+II%3A+Gobierno+a+cana+e+caminda+pa+reformanan+importante][desc=Standard+%26amp%3Bamp%3B+Poors+ta+mira+e+acuerdo+entre+Citgo+y+Aruba+por+ta+beneficioso+pa+Aruba+su+economia%26amp%3Bnbsp%3BTanto+riba+tereno+di+fondonan+di+pensioen%2C+seguro+medico+y+di+reduccion+di+gastonan+di+gobierno%26amp%3Bnbsp%3BORANJESTAD+-+Standard+%26amp%3Bamp%3B+Poors+a+subi+evaluacion+financiero+di+Aruba+for+di+%26%23039%3BStable%26%23039%3B+pa+%26%23039%3BPositive%26%23039%3B.+Un+noticia+cu+a+drenta+diamars+atardi+laat+via+un+boletin+emiti+pa+e+instituto+financiero+di+renombre+internacional.+S%26amp%3Bamp%3BP+ta+mustra+riba+e+hecho+cu+e+acuerdo+entre+CITGO+Petroleum+Corporati]}
Standard & Poors ta mira e acuerdo entre Citgo y Aruba por ta beneficioso pa Aruba su economia 
Tanto riba tereno di fondonan di pensioen, seguro medico y di reduccion di gastonan di gobierno 

ORANJESTAD - Standard & Poors a subi evaluacion financiero di Aruba for di 'Stable' pa 'Positive'. Un noticia cu a drenta diamars atardi laat via un boletin emiti pa e instituto financiero di renombre internacional. S&P ta mustra riba e hecho cu e acuerdo entre CITGO Petroleum Corporation y Pais Aruba ta uno sumamente beneficioso pa Aruba su economia. S&P ta splica cu, acopla esaki na e reformanan cu gobierno a introduci pa salvaguardia fondonan di pensioen, seguro medico y reduccion di gastonan di gobierno, nan ta spera un mehoramento di indicadornan fiscal mas lihe ainda.

S&P ta mira cu pa 2016 gobierno di Aruba ta logra reduci deficit di gobierno te na 2% y na 2017 e ta mira cu e ta yega 0.5%. Despues di 2017 ta S&P ta estima te hasta un surplus riba deficit di Pais Aruba. Tur esaki ta basa riba e consistencia di gobierno di Aruba su maneho economici-financiero.

Prome Minister Mike Eman a splica cu tur esaki ta bin di un plan riba termino largo caminda a traha riba un mehoracion economico sostenibel. Na 2009, e situacion economico cu e gobierno anterior a laga atras tabata tin hopi reto. E situacion tabata uno caminda cu Aruba su economia a perde un parti grandi di su economia den un tempo relativamente cortico. "Na e momento cu nos a drenta gobernacion tabata tin un realidad sumamente dificil. Economia a cay durante e gobernacion anterior cu 15% door di ciere di refineria y e diferente medidanan cu a wordo introduci durante añanan, entre 2001 cu 2009, y perdida di hopi entrada for di turismo, cu a cay tambe e tempo ey. Riba tur esaki Aruba a perde diferente partner strategico manera KLM, Carnival Cruises y American Airlines. Perspectiva economico y di turismo tabata sumamente negativo y nos a mira cu Aruba tabata tin mester di un inyeccion economico," Prome Minister Eman a enfatisa, "y probablemente e inyeccion aki mester a bin for di sector di gobierno, pasobra sector priva tabata pasando den e crisis den e momento ey."

Entre 2009 y 2013, sr. Eman a splica, gobierno a enfoca riba recuperacion economico y un atencion social pa esnan di menos recurso. Despues di e periodo aki a cuminsa traha riba reformanan importante. Aki, entre otro, a logra stabilisa y mehora fondonan di pensioen (APFA y SVb) y di seguro medico (AZV) y na e mesun momento a traha riba reduccion di deficit di Pais Aruba.

Prome Minister Eman ta yama e ultimo boletin di S&P, "un momento importante." Sr. Eman ta splica cu e ta un momento importante pa henter e gabinete y tur cu a carga e vision aki. El a enfatisa si cu tin biaha, e strategia riba termino largo aki no a conta cu sosten di tur hende. Sr. Eman a bisa cu tabata tin tempo cu tabata un poco solitario den e trabounan, pasobra no ta tur hende a wak e beneficionan riba termino largo. El a bira un discusion, oposicion a papia di crea debe, a papia cu nos lo no ta consistente y nan no tabata kere den e modelo. "Pero awe nos ta mira cu Standard & Poors mes ta presenta cifranan cu ta indica cu e deficit ta bay bahando, segun cu e deficit ta bay bahando e debe di pais Aruba tambe ta bay bahando. Asina nan ta demostra cu e escogencia cu nos a haci pa duna prioridad y stimula nos economia y na e momento ey no wak tanto riba deficit, pero wak con bo ta recupera economicamente. Esaki bo ta haci pa por tin un recuperacion fiscal y di finansas publico tambe cu ta mucho mas duradero ora e ta basa riba un economia solido, economia cu ta creciendo, cu awe nos ta haya rason nos no a pasa e cuenta aki cu medida riba custia di nos pueblo."

Expresionnan haci den e articulo aki no necesariamente ta refleha opinion di ArenaPoliti.co