{idkey=7175b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3591-parlamentario-chris-romero-mep-partido-mep-lo-tin-un-helpdesk-disponibel-pa-inscribi-esnan-interesa-pa-traha-den-refineria-citgo%3FItemid%3D101][title=Parlamentario+Chris+Romero+%28MEP%29%3A+Partido+MEP+lo+tin+un+helpdesk+disponibel+pa+inscribi+esnan+interesa+pa+traha+den+refineria+Citgo][desc=Partido+MEP+semper+a+kere+den+e+reapertura+di+e+refineria%2C+y+pa+es+motibo+aworaki+ta+hopi+importante+pa+nos+hendenan+logra+pasa+door+di+un+proceso+husto%2C+pa+por+bin+na+remarke+pa+haya+un+trabou+eyden.+Nos+di+partido+MEP+lo+purba+yuda+tur+esnan+cu+tin+interes+pa+traha+den+e+refineria%2C+sin+importa+nan+color+politico+di+preferencia.+Den+nos+opinion%2C+e+ta+imposibel+y+hopi+inhusto+pa+duna+prioridad+na+esnan+liga+na+e+partido+den+Gobierno%2C+of+pior+ainda%2C+pone+como+condicion+pa+campanja+pa+partido+AVP+]}Partido MEP semper a kere den e reapertura di e refineria, y pa es motibo aworaki ta hopi importante pa nos hendenan logra pasa door di un proceso husto, pa por bin na remarke pa haya un trabou eyden.
Nos di partido MEP lo purba yuda tur esnan cu tin interes pa traha den e refineria, sin importa nan color politico di preferencia. Den nos opinion, e ta imposibel y hopi inhusto pa duna prioridad na esnan liga na e partido den Gobierno, of pior ainda, pone como condicion pa campanja pa partido AVP pa por bin na remarke pa un trabou den refineria Citgo. 

Pa es motibo aki nos a bin na e idea di lanta un oficina cu lo ta mas tanto un helpdesk pa inscribi esnan interesa di traha den Citgo Refinery.
E idea ta pa tuma tur datos di esnan interesa den un trabou den e refineria pa asina por tin un bista mas amplio di cuanto hende local lo tin disponibel pa drenta den servicio. Cu esaki lo por tin un calculacion mas exacto di cuanto hende lo mester importa, dado caso cu no tin e forsa laboral na Aruba mes pa fungi den cierto funcion.

Algun luna atrás tabatin un reunion unda cu mi coleganan di fraccion, esta sr. Glenbert Croes y sr. Dangui Oduber, a reuni cu un grupo di no menos di 50 hoben cu problema social, pero cu ta dispuesto na drecha nan bida. E hobennan aki mester un ayudo pa asina nan por integra bek den sociedad y Gobierno ta den obligacion pa hasi lo posibel pa bin cu incentivo pa kitanan for di mal caminda.
Loke e grupo aki a expresa ta cu si nan tin un trabou cu por dunanan loke nan mester, e necesidad di hasi malo riba caya no lo t’ey mas serca nan. Loke cu nos mester compronde ta cu hopi di e “muchanan baldadi” aki ta tuma e mal caminda pasobra nan ta den necesidad y tin falta di guia.
Hunto cu mi coleganan di fraccion, nos a compromete nos mes di hasi tur loke ta den nos man pa nan haya trabou y asina kitanan for di riba caya. Mas cu claro mester tin un compromiso di nan banda pa por hasi nan mes disponibel cu tur rekisito cu e refineria ta exigi pa por duna nan trabou, mustrando asina seriedad pa cu e oportunidad laboral cu nan ta desea di haya.

Na Aruba ta reinando un necesidad real di trabou y aworaki nos tin cu hasi lo posibel pa ubica nos yiunan di tera den e mercado laboral. E apertura di Citgo Refinery na Aruba no ta un oportunidad pa hasi campanja politico, e ta un oportunidad pa nos yiunan di tera bay dilanti den e ambito laboral.
Como representante di pueblo, nos tin e obligacion pa hasi tur lo posibel pa nos hendenan ta bon. Cu esaki na mente, nos di partido MEP ta poniendo tur nos esfuerso pa asina nos yiunan di tera ta e prome opcion ora ta duna trabou den e refineria.

Expresionnan haci den e articulo aki no necesariamente ta refleha opinion di ArenaPoliti.co