{idkey=1141b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3674-rudy-richardson-mep-gobierno-di-avp-hamas-por-hustifica-e-desorden-crea-den-dos-termino-di-gobernacion%3FItemid%3D101][title=Rudy+Richardson+%28MEP%29%3A+Gobierno+di+AVP+hamas+por+hustifica+e+desorden+crea+den+dos+termino+di+Gobernacion][desc=Analisando+e+situacion+actual+di+nos+pais%2C+nos+pueblo+a+bay+drasticamente+atras.+E+partido+na+mando+cu+ta+AVP+lidera+pa+Sr.+Eman+a+haci+todo+por+todo+pa+yega+na+poder+na+a%C3%B1a+2009.+El+a+ga%C3%B1a+henter+un+pueblo+cu+e+lo+elimina+BBO%2C+percura+pa+esnan+di+menos+recurso+y+trece+siguridad+den+nos+pais.+Awe+na+2016+nos+ta+leu+for+di+cas.+Nos+pueblo+pasando+den+e+proceso+di+Decolonisacion+pero+na+un+manera+menos+progresivo.+Mirando+cu+nos+ta+perdiendo+nos+identidad+propio+y+esnan+cu+ta+responsabel+pa+un+m]}
Analisando e situacion actual di nos pais, nos pueblo a bay drasticamente atras. E partido na mando cu ta AVP lidera pa Sr. Eman a haci todo por todo pa yega na poder na aña 2009. El a gaña henter un pueblo cu e lo elimina BBO, percura pa esnan di menos recurso y trece siguridad den nos pais. Awe na 2016 nos ta leu for di cas. Nos pueblo pasando den e proceso di Decolonisacion pero na un manera menos progresivo. Mirando cu nos ta perdiendo nos identidad propio y esnan cu ta responsabel pa un maneho pa salvaguardia esaki ta laga hopi di desea riba tur nivel.

E resultadonan den nos eseñansa no ta nada di gaba, anto mester hinca hopi placa y estudio den e problematica aki. Ta desde 2009 Movimiento Electoral di Pueblo ta boga pa un HAVO/VWO na Noord. Nos a laga tur e plannan cla pa ehecuta pero Mike y AVP a boicotia esaki manera e dump na Parkietenbos cu un perdida di 28 Miyon florin y tambe expansion di IMSAN na San Nicolas. Echo ta cu nos poblacion a crece y e cantidad di schoolnan ta chikito, afectando e tamaño di nos klasnan y logico e calidad di enseñansa. Ta na varios pais den e region aki hopi mucha no ta bay school y logico esaki ta afecta e productividad di dicho pais cu no tin un mercado laboral cu educacion. Nos na Aruba no por sigui den e rumbo destructivo aki unda lo aumenta dependencia y desempleo eliminando e clase media chikito cu nos tin y haci nos país uno di productividad abao. E debe cu nos tin riba nos cabes lo dura te 2040 pa trece bek na nivelnan aceptabel.

Gobierno di AVP hamas por hustifica e desorden crea den dos termino di Gobernacion. Unda cu no a trece e cambionan necesario den e leerplicht, no a haci nada innovativo pa soluciona e problemanan den eseñansa pero a sigui yena Aruba y trece un calidad di turismo cu no a carga nos economia manera den pasado tawata e caso. Casnan na findishi rond di nos isla y e problemanan social empeorando cada dia mas. Nos hendenan nan calidad di bida a bay hopi atras, ta esnan di e grupito so ta gosa di un progreso ficticio. Criminalidad y atraco a bira e norma den e gobernacion aki. Un Minister di Husticia cu no sa con pa saca su som mirando e explosion social cu nos pueblo ta pasando aden y e no por cuminsa buta un paro na e decadencia aki. Un Minister di Infrastructura cu a perde asina hopi caso dilanti mesa berde cu e no ta ministeriabel mas pero keto bay ta sigui cu su klinkers despues cu a subi e debe di Aruba rond di 82% sin calcula e debenan astronomico di proyectonan PPP.

Den menos di un luna dos parlamentario di AVP ta retira nan apoyo na Gabinete Mike Eman, esaki ta un berguensa nacional riba su mes y ta refleha con putri e gobierno ta. Ta e parlamentarionan "muppet to puppet" so por keda sostene un gobierno manera esun di Sr. Eman. Su ruman homber Ex-Minister President no sa mas ki barbaridad pa skirbi den su Analisisnan politico. Nos instancianan no tin e fondonan cu nan mester pa funciona adecuadamente. Ta papia di proyectonan multi-miyonario e.o. Hospital, Green Corridor, Ringweg III y nos pueblo den un decadencia total. Si no tawata pa MEP, PDR, PARA y Grupo 7 nos no lo por a conta cu e crecemento economico di 15% den nos economia cu e reapertura di nos Refineria. Nos tin retonan hopi grandi nos dilanti y pa nos cuminsa soluciona esakinan mester cambia e signatura di Gobierno. Si esaki no sosode nos lo haña mas di locual nos a haña e ultimo 7 añanan. Mas hende di afo, mas desempleo, mas criminalidad, mas debe, mas dependencia politico, mas corupcion, mas turismo di cantidad y no di calidad, mas persecucion politico, mas dictadura y trapa riba nos estado di derecho, mas maneho neoliberal, mas abuso riba nivelnan hamas bisto, mas perdicion den alcohol y droga, mas formamento di gang, mas desorden, mas destruccion di nos naturalesa y logico menos di un Aruba felis y prospero pa un y tur.

Expresionnan haci den e articulo aki no necesariamente ta refleha opinion di ArenaPoliti.co