{idkey=2458b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3676-gabinete-me-ii-scolnan-ta-wordo-renoba-y-ta-construi-verkeersplateau-den-barionan-cu-necesidad-pa-esaki%3FItemid%3D101][title=Gabinete+ME+II%3A+Scolnan+ta+wordo+renoba+y+ta+construi+verkeersplateau+den+barionan+cu+necesidad+pa+esaki][desc=Mehoracion+di+calidad+di+bida+tin+un+luga+importante+den+plannan+di+renobacion+di+Gabinete+Mike+Eman.%26amp%3Bnbsp%3BORANJESTAD+%E2%80%93+Prome+Minister+Mike+Eman%2C+durante+un+encuentro+cu+miembronan+di+prensa+a+duna+%26amp%3Bnbsp%3Bsplicacion+amplio+riba+proyectonan+cu+ta+cuminsando+como+parti+di+un+fase+nobo+di+renobacion+di+Aruba.+Un+di+e+proyectonan+mas+importante+den+e+fase+aki+ta+renobacionnan+di+scolnan.+%E2%80%9CRenobacion+di+nos+scolnan+ta+siguiendo+y+mi+kier+manda+un+palabra+di+elogio+pa+nos+Minister+di+Ense%C3%B1ansa%2C+cu]}
Mehoracion di calidad di bida tin un luga importante den plannan di renobacion di Gabinete Mike Eman. 

ORANJESTAD – Prome Minister Mike Eman, durante un encuentro cu miembronan di prensa a duna  splicacion amplio riba proyectonan cu ta cuminsando como parti di un fase nobo di renobacion di Aruba. Un di e proyectonan mas importante den e fase aki ta renobacionnan di scolnan.

“Renobacion di nos scolnan ta siguiendo y mi kier manda un palabra di elogio pa nos Minister di Enseñansa, cu ta dunando un empuhe grandi na e renobacionnan aki. Tambe e proyectonan ta haya sosten importante di Minister di Infrastructura y InfraTeam." Algun di e proyectonan aki ta wordo realisa cu fondonan di FDA  y tin otronan cu apoyo financiero di Gobierno. Varios scol ta bay wordo renoba, manera Rosa College cu ta wordo amplia, e Opvang Center na Sabana Berde y diferente scol ta haya cura, entre nan, Ayo Kleuter School, Cacique Kleuterschool, Pius X School y SO Santa Cruz.

Un di e temanan cu cada bes ta bini dilanti durante bishita den barionan cu Prome Minister ta haci regularmente, ta e peticionnan pa verkeersplateau. E peticionnan ta pa tanto dilanti scolnan como den avenidanan residencial. “Hopi di nos ta fanatico di autonan di velocidad, pero esaki mester tuma luga riba e sitionan destina pa esaki. Lamentablemente na Aruba hopi no por warda e momento aki pa midi forsa di e autonan y nos barionan ta birando poco peligroso. Nos tin e responsabilidad civico pa sigui e reglanan di trafico, polis tin e trabou di controla. Pero nos a mira cu den e parti di infrastructura nos por  contribui na baha e velociad y haci'e mas sigur pa nos muchanan y peatonnan.”

El a splica cu DOW a crea hopi experticio su mes den construccion di verkeersplateau y e sistema aki ta un contribucion grandi. Na unda cu nan a wordo construi, Gobierno a haya hopi bon reaccion di e ciudadanonan. Mester cremencha cu e presupuesto, pero e inversionnan aki ta mehora e calidad di bida.” Lo construi esakinan den Madiki, Driemasterstraat, Sint Franciscus College, Caya Ernesto Petronia, dilanti Dominicus College den La Sallestraat, na Colegio Felepito B Tromp na Montaña, dilanti Biblioteca Nacional y den un area na Paradera, unda hopi hende ta crusa caya.

“Pa nos esaki ta algo importante, pasobra tanto fase 1 como 2 di renobacion di barionan, di centro di ciudad, di scolnan y areanan publico a contribui grandemente na mehora calidad di bida di nos hendenan. Nos a haya hopi palabra di gratitud y apoyo pa esaki,”e mandatario a bisa. Papiando di barionan, e siman aki ainda Gobierno ta cuminsa cu instalacion di luznan den bario y e team ta den e prome bario cu e proyecto di Luz den Bario desde cu e luznan nobo a yega.

Expresionnan haci den e articulo aki no necesariamente ta refleha opinion di ArenaPoliti.co