{idkey=4556b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3680-parlamentario-guillfred-besaril-mep-acuerdo-entre-aruba-y-citgo-pedevesa-ta-sigui-ta-un-quo-vadis%3FItemid%3D101][title=Parlamentario+Guillfred+Besaril+%28MEP%29%3A+%26quot%3BAcuerdo+entre+Aruba+y+CITGO%2FPEDEVESA+ta+sigui+ta+un+Quo+Vadis%21%26quot%3B][desc=Durante+conferencia+di+prensa+semanal+di+Partido+MEP%2C+Parlamentario+sr.+Guillfred+Besaril+a+elabora+riba+e+encuentro+recien+entre+Parlamento+y+gobierno+di+Aruba+riba+e+acuerdo+cera+cu+CITGO%2FPEDEVESA+pa+un+posibel+reapertura+di+Aruba+su+refineria.+Sr.+Besaril+a+declara+lo+siguiente%3A%26amp%3Bnbsp%3B%26quot%3BDialuna+ultimo+gobierno+di+Aruba+a+bin+Staten+pa+cuminsa+duna+algun+splicacion+riba+e+acuerdo%28nan%29+firma+entre+Pais+Aruba+y+CITGO%2FPEDEVESA+na+Venezuela.+Prome+cu+mi+continua+cu+mi+relato+mi+kier+a+haci+uso+di+e+]}Durante conferencia di prensa semanal di Partido MEP, Parlamentario sr. Guillfred Besaril a elabora riba e encuentro recien entre Parlamento y gobierno di Aruba riba e acuerdo cera cu CITGO/PEDEVESA pa un posibel reapertura di Aruba su refineria. Sr. Besaril a declara lo siguiente: 

"Dialuna ultimo gobierno di Aruba a bin Staten pa cuminsa duna algun splicacion riba e acuerdo(nan) firma entre Pais Aruba y CITGO/PEDEVESA na Venezuela. Prome cu mi continua cu mi relato mi kier a haci uso di e oportunidad na gradici un y tur cu SI a kere den e reapertura di e refineria! E ta increibel pa mira con e mesun exponentenan di AVP, cu ni 9 luna pasa ainda tabata burla di nos fraccion, di esnan cu a participa den "Accion Ora Cero" y di tur e gruponan manera PARA cu tabata firme pa e tema refineria, ta esnan prome para den rij awe pa yena boca di elogio pa cu e posibel reapertura. Pueblo di Aruba no mag lubida cu ni 9 luna pasa e unico palabra cu gobierno di Aruba y su exponentenan tabata conoce ta "Desmantelacion!" 

Pero bayendo bek riba e desaroyo di e reunion di Dialuna, nos ta di opinion cu por lo menos mitar di e contenido na informacion no tabata nada nobo pa nos fraccion. Informacion cu si a yama nos atencion tabata entre otro un formula cu a keda palabra den e acuerdonan pa emplea esnan cu lo bay labora den e refineria y e aspecto di impuesto riba ganashi (Winstbelasting) riba e refineria.


Gobierno a splica Parlamento cu den futuro e refineria lo tin un doño cu lo ta Pais Aruba. Na su turno e NV di gobierno aki lo otorga CITGO/PEDEVESA un permiso di operacion di 15 aña cu un posibilidad di renobacion di 10 aña adicional. Mara n'e permiso aki lo tin un formula di 20-80 pa loke ta e composicion total na empleadonan den servicio di e refineria. Na momento cu a haci e pregunta kico esaki ta nifica pa e mercado laboral di Aruba, Staten a ricibi como splicacion cu por lo menos 80% di esnan cu ta labora den e refineria di un forma directo mester ta local, mientras cu e resto lo wordo limita te na un maximo di 20% cu por consisti di trahadornan cu ta bin di afor.

Den prome instante e ta zona bon, pero ora analisa su efecto den practica nos fraccion ta puntra su mes, con tin pensa di salvaguardia e formula aki? Ken ta control’e, di cuanto hende nos ta papia, di cua posicionnan exactamente ta trata y con lo traha den e direccion cu ta nos hendenan, nos propio mercado laboral local lo por yega eventualmente na ocupa e gran mayoria di e puestonan aki? Con e tabata tempo di Valero y ki efecto esaki lo tin den practica? E ta conta solamente pa esnan cu lo traha directamente den e refineria of pa e sub-contractornan tambe? Y finalmente, con lo anda cu e formula aki na momento di e mantencionnan general di e refineria conoci como "Turn-Arounds?" Pues mucho mas pregunta en bes di contesta despues di reunion!

E otro aspecto menciona durante e reunion cu a yama nos atencion, tabata esun di e impuesto riba ganashi (Winstbelasting). Gobierno di Aruba a splica Parlamento cu a acorda cu CITGO/PEDEVESA cu nan lo ricibi un porcentahe preferencial. Di e splicacionnan ricibi, ta trata di un tarifa riba ganashi di 10% na momento cu e ganashi ta menos cu 100 miyon Dollar Mericano y 6% na momento cu e ganashi surpasa e $100 miyon en cuestion. Ademas di e impuesto riba ganashi a palabra cu CITGO/PEDEVESA cu lo tin un pago di concesion. E prome 3 añanan esaki lo ta di 10 miyon Dollar Mericano, pa despues desde aña 4 en adelante e bira $18.5 miyon anual. Pregunta cardinal pa nos fraccion ta: "Kico ta e opinion di e diferente gremionan riba nos isla?" Den pasado nos por corda cu na momento cu gobierno kier a negocia un winstbelasting preferencial pa e refineria, di biaha sr. Juan David Yrausquin den su calidad e tempo ey di presidente di ATIA a bira manda un carta pa gobierno cu e mensahe: "Si tin pa e refineria, MESTER tin pa nos tambe!" Pues e pregunta cu nos fraccion a keda pega cun’e ta "kico ta e opinion awor di e gremionan manera Camara di Comercio (KvK), AHATA y ATIA?"

Partido MEP semper a kere den e reapertura di Aruba su refineria. Nos tabata sa desde prome instante caba cu e desaroyo di un otro pilar economico pa Aruba lo ta sumamente dificil si no bin un reapertura di e refineria. E reapertura ta importante p'asina Aruba su economia por hala un rosea. P'esey na tur momento nos a keda boga pa un Aruba cu refineria pa despues lucha den un periodo di transicion di 10 pa 20 aña, traha duro na desaroya un siguiente pilar economico pa nos Pais. Esaki ta haci cu Aruba ta miho prepara den caso cu yega e punto final di operacion di un refineria na nos isla. Pueblo en general a hañ’e den un situacion difícil desde e ciere di e refineria na 2012. Partido MEP ta mas cu di acuerdo pa e refineria habri, pero cu un gobierno di signatura "Berde" negociando e futuro di un pilar economico asina importante, no por culpa niun hende di ta no solamente pendiente, pero ademas realmente preocupa cu e desaroyo aki", Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co