{idkey=2541b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3720-mep-te-ainda-mike-eman-no-por-hustifica-na-kico-el-a-malgasta-2-7-biyon-florin-extra-ricibi-desde-2009%3FItemid%3D101][title=MEP%3A+Te+ainda+Mike+Eman+no+por+hustifica+na+kico+el+a+malgasta+2.7+biyon+florin+extra+ricibi+desde+2009][desc=Mike+Eman+debe+pueblo+un+contesta.%26amp%3Bnbsp%3BDespues+cu+Prome+Minister+Mike+Eman+a+viaha+rond+mundo+riba+custia+di+pueblo+pa+lobby+pa+Hulanda+haya+un+asiento+den+Conseho+di+Siguridad+di+Nacionnan+Uni+y+cual+lobbymento+no+a+trece+ningun+beneficio+pa+nos+pueblo%2C+den+e+ultimo+simannan+el+a+regresa+pa+algun+dia+atrobe+na+Aruba+caminda+el+a+start+cu+su+campa%C3%B1a+politico+pa+eleccion+2017.+Echo+ta+cu+actualmente+tin+hopi+asunto+urgente+cu+merece+atencion+di+nos+Prome+Minister%2C+e.o.+e+aspecto+financiero+di+u]}
Mike Eman debe pueblo un contesta. 

Despues cu Prome Minister Mike Eman a viaha rond mundo riba custia di pueblo pa lobby pa Hulanda haya un asiento den Conseho di Siguridad di Nacionnan Uni y cual lobbymento no a trece ningun beneficio pa nos pueblo, den e ultimo simannan el a regresa pa algun dia atrobe na Aruba caminda el a start cu su campaña politico pa eleccion 2017. Echo ta cu actualmente tin hopi asunto urgente cu merece atencion di nos Prome Minister, e.o. e aspecto financiero di un Megadebe cu tin nos pais horca, combatimento di criminalidad, e aspecto di salubridad publico cu ta bayendo atras, enseñansa, medio ambiente (Dump na Parkietenbos), e pobresa existente, e reapertura di nos refineria (CITGCO deal) etc.

Inicio di Campaña 2017
Sinembargo ningun di e topiconan menciona no ta riba agenda di Mike Eman pa ser trata, ya cu cada biaha e ta prefera di papia riba e 8 añanan di Gabinete Oduber, siendo cu e mes tin casi 7 aña sinta riba stoel di minister sin cu e tin e corahe pa soluciona tur e problemanan pendiente. Na lugar di esaki Mike Eman ta prefera di haci su mes ridiculo door di subi riba un truck di Elmar pa supuestamente pone un bombiyo LED den e bario di Sero Pela. Tur e ridicules aki ta pa sostene su campaña electoral 2017 y un biaha mas riba custia di pueblo.
Bolbiendo riba e 8 aña di gobernacion di MEP, sr. Eman te ainda no kier splica pueblo cuanto placa Gabinete Oduber a laga atras den caha di gobierno na 2009. Solamente e tin cu grita cada biaha cu el a haya e caha bashi, e situacion financiero deplorable, sin cu e ta bin cu cifra real pa sostene su ponencianan ridiculo y estupido. Tambe e no kier splica e motibo pakico Gabinete Oduber tabata gosa di un credit rating A- y cu su gobierno mes a wordo downgraded te BBB-!

Herencia di 970 miyon florin
Echo ta cu e gobierno di Mike Eman a hereda for di Gabinete Oduber 250 miyon florin di placa di Plant N.V., 280 miyon florin di BBO riba export di Valero, 190 miyon florin di Fondo Desaroyo Arubano (FDA), casi 200 miyon florin di 3% di BBO, mas cu 10 miyon florin di ganashi di Banco Central y mas cu 40 miyon florin cash. Pues aki nos ta papia di un suma total di 970 miyon florin cu su gobierno a hereda for di e Gabinete Oduber! Y asina mes hayando tur e suma aki nos ta haya un Prome Minister Eman cu tur biaha ta grita cu AVP a haya e caha di gobierno blo bashi na 2009. E no ta splica pueblo si cu e y su ministronan a derocha e suma aki na cientos di coordinadornan y pensionadonan cu ta traha rond di nan, na huurmento di edificionan di compinchinan politico, na abogadonan, na nan viahenan rond mundo, na conferencianan green cu no a trece ningun beneficio pa nos pueblo etc.

Crea debe y mas debe
Sinembargo remarcabel ta cu – asina mes cu Mike Eman a haya e suma di 970 miyon florin pa por inverti den nos economia sin ningun dolor di cabes – toch nan a dicidi di fia y sigui fia den e siguiente 6 añanan aumentando nos debe nacional for di 2.2 biyon florin na 2009 te na 3.9 biyon florin na 2015, un aumento astronomico di 1.7 biyon florin! Echo ta cu si durante Gabinete Oduber (2001-2009) nos debe nacional a crece cu un promedio di 91 miyon florin pa aña, bao di Gabinete Eman (2010-2015) esaki a crece cu un promedio di 291 miyon florin pa aña, pues cu 3 biaha mas hopi! Pregunta na Mike Eman ta si e ta haya cu e creacion di Megadebe aki ta un “bon trabao” y cu “ainda falta”?

Recapitulando, e gobierno di Mike Eman a ricibi 970 miyon florin cu Gabinete Oduber a laga den caha atras na 2009 y tambe den 6 aña di gobernacion di AVP nan a aumenta nos debe nacional cu 1.7 biyon florin, pues den total un suma di 2.7 biyon florin extra nan tabata tin na nan disposicion cu nan a derocha na nan antoho. Awe cu ki cara Mike Eman kier sigui papia di e 8 añanan di Gabinete Oduber, siendo cu te ainda e no por hustifica na pueblo na kico e y su ministronan a derocha e 2.7 biyon florin extra aki??

Expresionnan haci den e articulo aki no necesariamente ta refleha opinion di ArenaPoliti.co