{idkey=4731b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3816-remigio-wever-un-evaluacion-di-nos-turismo-parti-2%3FItemid%3D101][title=Remigio+Wever+%28Ex-director+ATA%29%3A+Un+evaluacion+di+nos+turismo+%28parti+2%29][desc=E+CRISIS+GRANDI+DEN+NOS+TURISMO.%26amp%3Bnbsp%3BE+bienestar+di+e+comunidad+y+habitantenan+di+Aruba+ta+depende+pa+90+porciento+di+e+industria+turistico.+Pasobra+esaki+ta+e+unico+fuente+grandi+di+entrada+pa+e+comunidad+y+pa+gobierno%3B+e+industria+petrolero+no+t%E2%80%99ey%2C+y+e+funcion+di+Aruba+como+%E2%80%9Chub%E2%80%9D+pa+e+comercio+entre+Europa+y+Sur+America+di+cua+gobierno+a+pretende+cu+e+lo+a+trece+ganashi+pa+Aruba%2C+casi+no+ta+produciendo+%26amp%3Bnbsp%3Bnada+na+entrada.%26amp%3Bnbsp%3BE+funcion+di+%E2%80%9Chub%E2%80%9D+aki+tabata%2C+y+ainda+ta+un+mundo+d]}
E CRISIS GRANDI DEN NOS TURISMO. 

E bienestar di e comunidad y habitantenan di Aruba ta depende pa 90 porciento di e industria turistico. Pasobra esaki ta e unico fuente grandi di entrada pa e comunidad y pa gobierno; e industria petrolero no t’ey, y e funcion di Aruba como “hub” pa e comercio entre Europa y Sur America di cua gobierno a pretende cu e lo a trece ganashi pa Aruba, casi no ta produciendo  nada na entrada. 
E funcion di “hub” aki tabata, y ainda ta un mundo di fantasia cu cua gobierno por sigui soña; realidad ta cu e politiconan na Den Haag, Hulanda, ta “bezig” caba ta haci BONAIRE (!) un “hub”; realidad tambe ta cu e biahe di minister di Turismo pa Panama NO ta bay haci cu Aruba ta bay probecha ni lo mas minimo for di e funcion di hub di Panama! 
Nos ta, y nos ta keda totalmente dependiente di turismo; y ta bon conoci cu cosnan ta bay espantosamente malo cu nos turismo! 

SOLO,  LAMAN  Y  PLAYA. 
Aruba Tourism Authority (ATA) recientemente  a publica un estadistica cu ta mustra cla cu turistanan ta escohe Aruba pa pasa nan vacacion a base di 1) e bon tempo, pues e solo, 2) nos playanan y nos laman,  y 3) e seguridad.
Pero! 
Den mi articulo di siman pasa ya mi a describi con tristo cosnan ta pará cu nos beach na Palm Beach. E playa aki a disminui te cu ela keda na mitad di locual e tabata, y esaki probablemente a consecuencia di e construccion di e piernan; e laman dilanti di e playa aki ta gris, scur, vies, y ya caba e no ta e laman Caribense blou-berde, bunita, limpi y cla, cu e turista, yen di expectativa, ta spera di encontra, manera esaki ta wordo presenta na dje den propagandanan bunita.
Pero, cosnan ta mas pio ainda! E fondo di e laman dilanti di Ritz-Carlton, Marriott, Holiday Inn, Playa Linda, y siguiendo te dilanti di e hotelnan RIU, TUR  CAMINDA ta tapá cu un sustancia vies y askeroso (mierda!), di cua aparentemente ningun hende sa ta kiko e ta, pero di cua bo ta haya e impresion horibel cu ta riba descarga y desperdicio di riool bo ta cana. No ta nada straño anto cu ta masha poco turista ta landa den laman; aparentemente nan ta prefera landa den e piscina di nan hotel. Y esey ta un berguenza masha grandi mes!!

NOS NO TA TENDE ABSOLUTAMENTE NADA NI DI E MINISTER, NI DI GOBIERNO, ENCUANTO UN INVESTIGACION RIBA E DESAPARICION DI NOS PLAYANAN, E SCURIDAD Y E GRIS SUSHI DI E AWA DI LAMAN, NI DI E DESPERDICIO (MIERDA!) VIES RIBA E FONDO DI LAMAN.
KI UN BERGUENZA! FUTURO DI ARUBA Y DI NOS TUR TA DEN WEGA!!

BO NO TA TENDE NADA DI ESEY DI GOBIERNO, PERO TAMPOCO NADA DI AHATA, NI DI E GREMIONAN, OF DI SINDICATONAN MANERA FTA.
NINGUN HENDE TA PAPIA NI SCIRBI RIBA E ASUNTO AKI, PERO TUR HENDE TA ACTUA MANERA E AVESTRUZ CU TA SCONDE SU CABEZ DEN TERA. NOS TA PREFERA DI HACI MANERA CU NO TIN NINGUN PROBLEMA, DJIS PA NOS KEDA DEN PAZ CU NOS MES Y PA NOS NO DAÑA E LAZONAN POLITICO, DIOS LIBRA!!

Sigui asina, pero no keda straño ora e cantidad di turista pa Aruba baha, ora turismo di Aruba ta cabando, y nos industria turistico ta keda na werki y na filigrana.
Esey lo no strañami nada, pasobra den Caribe tin un cantidad di isla cu tambe ta bendiciona cu playanan briyante, y un oceano blou-berde, limpi y cla; un cantidad for di cua e turista por haci su escohencia; lo ta un lastima ora Aruba NO ta forma parti mas di e lista di e destinonan turistico aki!

E SEGURIDAD RIBA ARUBA
Despues di solo y playa, seguridad ta bini na di tercer lugar riba e lista di factornan cu ta haci cu turistanan ta dicidi pa escohe Aruba pa nan bin pasa nan vacacionnan; lamentablemente riba e tereno aki tambe cosnan ta hopi tristo.
Mi no ta weita ningun necesidad pa ripiti y describi con insigur Aruba a para bira!
Diariamente bo mes por lesa esaki den articulonan den prensa: asalto- y atraconan, ladronicia den casnan particular y den negoshinan, hortamento, atakenan, crimen y delitonan; y awor, djis algun dia pasa, algun turista a wordo asalta riba e beach di – imaginabo! – Hotel Ritz-Carlton. Aki e atracadornan tabata arma cu revolver, y a bay cu telefon y placa di e turistanan.
Esaki ta NOS Aruba di aña 2016!!
Y...gobierno no ta haci net nada na proteccion di nos fronteranan y combatimento di inmigrantenan ilegal.  

REMARCABEL TA CU E INCIDENTE ESCANDALOSO AKI DI E ATRACO RIBA E TURISTANAN NO TABATIN NINGUN REACCION NACIONAL DI INDIGNACION!!
TUR HENDE POR A LESE,...PERO BIDA TA SIGUI NORMAL, COMOSIFUERA NADA NO A PASA!!
UNDA E REACCIONNAN A KEDA DI GOBIERNO, DI MINISTER DI TURISMO, DI AHATA, DI GREMIONAN, DI SINDICATONAN!!
NOS NO TA WEITA NI RIPARA NADA DI NINGUN PREOCUPACION NACIONAL, NI DI NINGUN INDIGNACION NACIONAL; NADA DI NINGUN YAMADA PA UN ACCION OF UN “APPROACH” NACIONAL.
E ARTICULO DEN CORANT TA WORDO LESA, TA BIRA E BLACHI, Y NADA TA WORDO HACI, ABSOLUTAMENTE NADA!!

Realidad ta cu e asunto aki nunca lo por yega na un final feliz, y p’esey e grito di alarma aki!
Cada ken cu un poco sentido comun mester por realisa cu cosnan ta bayendo ALARMANTEMENTE malo cu nos turismo.
Oposicion den Parlamento, AHATA, gremionan y sindicatonan awor ta esunnan yamá pa haci algo na esaki; sinta keto ya NO ta un opcion mas!
Pero, ken ta cuminza cu esaki? Ken tin e curashi pa coy e toro na su cacho y cuminza ataca e situacion aki seriamente, pa di e manera ey ainda trata na scapa nos turismo di un fracaso!

Remigio A. R. Wever
Ex- director A.T.A.

Expresionnan haci den e articulo aki no necesariamente ta refleha opinion di ArenaPoliti.co