{idkey=8938b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3836-mep-minister-paul-croes-kier-sigui-manipula-mente-di-pueblo-cu-su-porcentahe-di-cifra-di-desempleo%3FItemid%3D101][title=MEP%3A+Minister+Paul+Croes+kier+sigui+manipula+mente+di+pueblo+cu+su+porcentahe+di+cifra+di+desempleo][desc=Entrada+na+loonbelasting+ta+confirma+un+biaha+mas%3A%26amp%3Bnbsp%3BTa+increibel+con+e+ministernan+di+Gabinete+Mike+Eman+kier+sigui+manipula+mente+di+pueblo%2C+ya+cu+awor+a+toca+turno+na+Minister+Paul+Croes+pa+trece+padilanti+e+mentira+flagrante+relaciona+cu+e+porcentahe+di+desempleo+cu+supuestamente+lo+ta+bahando+desde+2009+en+adelante.%26amp%3Bnbsp%3BNa+prome+lugar+e+minister+aki+kier+tira+santo+den+wowo+di+pueblo+y+alabes+lansa+e+mentira+cu+na+2009%2C+esta+na+final+di+Gabinete+Oduber+4+e+porcentahe+di+desempleo+tabata]}
Entrada na loonbelasting ta confirma un biaha mas: 

Ta increibel con e ministernan di Gabinete Mike Eman kier sigui manipula mente di pueblo, ya cu awor a toca turno na Minister Paul Croes pa trece padilanti e mentira flagrante relaciona cu e porcentahe di desempleo cu supuestamente lo ta bahando desde 2009 en adelante. 
Na prome lugar e minister aki kier tira santo den wowo di pueblo y alabes lansa e mentira cu na 2009, esta na final di Gabinete Oduber 4 e porcentahe di desempleo tabata 12%, siendo cu cifranan oficial di Censo 2010 cu a ser ehecuta pa e departamento independiente CBS ta mustra cu e porcentahe aki tabata mas abao, esta 10.6% (cifra no-manipula). Mester remarca cu durante e proyecto di Censo 2010 tur habitante riba e isla aki individualmente a ser encuesta pa loke ta nan situacion laboral, esta cu si nan tin empleo, si of no! 

Intransparencia total 
Sinembargo e gobierno di AVP cu na 2011 – sin ningun hustificacion – a kita e proyecto di Labour Force Survey (LFS) for di CBS y pone esaki bao di nan propio control, kier manipula mente di pueblo haciendo como sifuera cu e ‘steekproef’ LFS ta un conteo total di empleo y desempleo na Aruba. Pero debi na intransparencia di e gobierno actual nunca durante e ultimo 5 añanan e resultadonan di e LFS a ser presenta den forma oficial na e comunidad Arubano. Locual ta sosode cada biaha si ta cu e ministernan di AVP den un forma intransparente y na nan antoho ta cana benta tur biaha un cifra di porcentahe di desempleo den laira y ta kere cu pueblo lo mester traga e mentira y manipulacion aki. Awor e minister mago aki ta ‘hocus pocus’ un cifra di desempleo di 5% na 2017 y ainda falta.  

Crecemento di 0.1%
Alabes den su  relato ultimo Minister Paul Croes a trata di bende pueblo e mentira cu na 2009 e cifra di desempleo tabata 12%  y cu ta danki na e maneho dinamico di su gobierno e cifra aki a ser reduci te na 7.4% na 2015. Sinembargo locual e minister aki no ta conta pueblo ta cu na 2012 bao di gobierno di AVP e refineria Valero a dal su porta cera y consecuentemente mas cu 2000 pa 3000 hende den forma directo y indirecto a perde trabao. Tambe e no ta conta cu durante e ultimo 4 añanan un sin fin di negoshi a cera nan portanan, e.o. den Caya Betico Croes. Esaki ta ser confirma tambe door di Camara di Comercio: 75 negoshi den un solo aña a cera nan porta, ya cu no tin crecemento economico den e pais aki! Pa no papia mes di e mundo di casino cu tambe a conoce golpinan formal. No ta pornada Banco Central a confirma cu e crecemento economico tabata solamente 0.1% na 2015.

Cupo di trabao duradero
E manipulacion ta sigui caminda minister Paul Croes ta declara cu e desemplo a baha danki na e renobacion di Hospital, Green Corridor, Waf nobo na Barcadera, renobacion di schoolnan, MFA-nan y edificionan di gobierno (?) cu a crea cuponan di trabao importante (?) pa nos pais. Pero pueblo mes por huzga cu tur e proyectonan menciona NO a crea ningun cupo di trabao DURADERO, ya cu ora e renobacionnan aki termina tur e trahadornan lo ta na cas atrobe y sin trabao. Echo ta cu durante e ultimo 7 añanan e gobierno di AVP no a haci ningun intento pa crea cuponan di trabao duradero den e pais aki, pero tabata core solamente manera un loco tras di tur e locuranan di green y mas green.

Entrada na loonbelasting
Alabes locual minister Paul Croes mester splica pueblo ta e motibonan pakico e entradanan cu gobierno a ricibi di loonbelasting a keda atras, saliendo for di e punto di bista cu e porcentahe di desempleo supuestamente lo a baha asina drastico durante e ultimo 6 añanan. Echo ta cu si na 2009 gobierno di MEP a ricibi 231.1 miyon florin na loonbelasting, na 2015 Gabinete Eman a ricibi solamente 247.6 miyon florin. Pues un aumento cu solamente 16.5 miyon y cual diferencia lo mester hustifica un reduccion di desempleo for di 12% te 7.4%??. Anto asina mes minister Paul Croes kier manipula mente di pueblo bisando cu e cantidad di empleo a crece drasticamente, siendo cu esaki no por ser traduci den e entradanan di loonbelasting. Minister Paul Croes, a otro perro con ese hueso! Pregunta ta, si ta e ilegalnan cu ta haya permiso di trabao via Whatsapp y cu no ta paga belasting ta haci cu e entrada di loonbelasting tambe ta kedando relativamente atras ultimo tempo?

Expresionnan haci den e articulo aki no necesariamente ta refleha opinion di ArenaPoliti.co