{idkey=8505b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3851-booshi-wever-upp-minister-schwengle-ta-admiti-cu-no-tin-un-maneho-concreto-pa-stimula-deporte-na-aruba%3FItemid%3D101][title=Booshi+Wever+%28UPP%29%3A+Minister+Schwengle+ta+admiti+cu+no+tin+un+maneho+concreto+pa+stimula+deporte+na+Aruba][desc=Durante+despedida+di+e+atletanan+cu+a+bay+participa+na+Rio+2016%2C+minister+Schwengle%2C+encarga+cu+deporte%2C+tambe+a+hiba+palabra.+Ta+increibel+pa+constata+con+e+minister+aki+cu+a+ha%C3%B1a+e+oportunidad%2C+durante+e+ultimo+3+a%C3%B1a%2C+pa+delinea+un+maneho+concreto+pa+cu+deporte+na+Aruba+ta+critica+su+propio+miembronan+di+partido+manera+sr.+Edwin+Roos+cu+ta+encarga+cu+COA+como+president+y+sra.+Nicole+Hoevertsz+secretario+general+di+COA%2C+cu+pa+tempo+largo+ta+na+cabes+di+deporte+di+natacion+na+Aruba+y+tambe+un+]}Durante despedida di e atletanan cu a bay participa na Rio 2016, minister Schwengle, encarga cu deporte, tambe a hiba palabra. Ta increibel pa constata con e minister aki cu a haña e oportunidad, durante e ultimo 3 aña, pa delinea un maneho concreto pa cu deporte na Aruba ta critica su propio miembronan di partido manera sr. Edwin Roos cu ta encarga cu COA como president y sra. Nicole Hoevertsz secretario general di COA, cu pa tempo largo ta na cabes di deporte di natacion na Aruba y tambe un persona cu tin basta influencia den con reparticion di fondonan pa deporte ta tuma lugar. Tres aña largo no tabata tin ni tempo ni un plan pa deporte pero si pa subi avion, manera Serafina den jet. P'esey SI tin tempo y plan y placa, pasobra e mes a anticipa cu su estadia na Rio de Janeiro lo ta uno fenomenal.

Minister Schwengle, cu nunca di su bida a dedica o a participa den deporte, a declara cu mester di un mihor planificacion pa financiamento di deporte na Aruba. E mandatario ta  admiti su ignorancia riba e tereno di deporte, añadiendo cu no por laga e maneho di deporte den su man, pasobra inversion y mehoracion di infrastructura  di deporte no ta algo cu e como minister por carga su so. Igualmente e minister ta señala cu financiamento di deporte no por wordo regla den un paar di aña, pasobra mester di un “meerjaren planning”. Ta tristo pa mira con un titular di deporte, cu ya tin 3 aña ta minister ta bin admiti cu deporte na Aruba ta pa su cuenta. Mientras cu desde cu Aruba a wordo acepta na 1985 como país na momento cu Aruba haya su Status Aparte na 1986, y cu desde 1988 nos a bin ta manda atletanan, prome cos cualkier minister di deporte lo mester a haci, ta traha un assessment riba e tereno aki. Y no awor cu su termino ta yegando ta bin descubri cu no tin bon plan di financiamento di deporte aki na Aruba. Esaki tambe ta pone UPP yega na e pregunta con henter a asunto di fondonan aki ta bay? Kico Lotto pa deporte ta haciendo y con e fondonan cu ta wordo crea ta wordo parti dor di comision di subsidio di gobierno? UPP ta kere cu lo mester tin mas transparencia den esaki.

Realmente e minister no ta realisa cu bon gobernacion ta nifica cu bo ta start cu un vision cu bo mester a presenta durante e campaña electoral y cu lo mester a bira e vehiculo pa e maneho cu bo ta entama como minister pa desaroya deporte na Aruba.  Bon gobernacion tambe ta nifica cu lo percura pa continua cu e maneho di particularmente di minister anterior cu ta di bo partido. Pues cu su declaracion e minister actual ta critica tambe su colega di partido ex-minister di deporte sr. Visser, cu obviamente no a percura pa un mihor financiamento y infrastuctura tampoco.

Pero kiko ta e logro di e minister actual anto? Ta den mas di un ocacion cu su colega ministernan mester a “val in” y duna acto di presencia na momentonan culminante di nos deporte na Aruba. Nos por corda minister Oduber cu pa medio di e ex-pelotero Venezolano Melvin Mora a haña donacion di material di baseball for di Baltimore Orioles. Algun dia pasa minister Eman y Sevinger a laga sa durante un bishita na e famoso “Green Corridor” cu lo construi 13 mini-park y mini cancha deportivo pariba di brug.

Nos por conclui anto cu ya cu e minister no a mustra interes den deporte ni tampoco sa di e tema a dicidi, manera ta su custumber,  na prome lugar ta core ta tira culpa riba otro. Asina e ta tira culpa riba su propio coleganan di partido y e minister di deporte anterior. Mientras cu e mes tabata dehado di duna un aporte na beneficio di deporte na Aruba. E minister ta keda tira piedra sconde man y ta faya atrobe, mescos cu loke ela hasi cu salubridad, pa dedica atencion na e departamento cu ta encarga cu deporte.
E minister no ta realisa cu deporte ta un forma pa crea oportunidadnan pa nos hobenan na prome lugar por logra realisa un futuro sin criminalidad, pero principalmente un futuro dedica na evita malesanan cronico manera sobrepeso, diabetes y presion halto. Malesanan cu ta forma awor aki un menasa grandi pa salubridad general di nos Pais y cu ta costa hopi placa den tratamento medico y na unda no ta dedica atencion na prevencion. 
Pero pa bai djo djo na Rio de Janeiro, cu a costa e pueblo Arubano mas di 15 mil bubu, pa esey si eta cla pa dicidi. Manera e mes a declara su djo- djo-mento lo ta fenomenal.

Pa termina UPP ta desea e atletanan Arubiano hopi exito na Weganan Olimpico di Rio 2016 y ta spera cu nan si por saca cara di Aruba dignamente y cu orguyo.


Lider di UPP
C.A.S.D. Wever
8 augustus 2016

Expresionnan haci den e articulo aki no necesariamente ta refleha opinion di ArenaPoliti.co