{idkey=934b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3859-benny-nisbet-ppa-net-awor-cu-gobierno-mester-sirbi-interes-general-di-aruba-cu-un-vision-cla-gobierno-ta-sconde-tras-di-apa-nv%3FItemid%3D101][title=Benny+Nisbet+%28PPA%29%3A+%E2%80%9CNet+awor+cu+gobierno+mester+sirbi+interes+general+di+Aruba+cu+un+vision+cla+gobierno+ta+sconde+tras+di+APA+NV+%E2%80%A6%21%21%E2%80%9D][desc=Cu+gran+interes+PPA+a+sigui+e+declaracion+di+Ministro+Benny+Sevinger+den+cual+el+a+declara+cu+e+tereno+cu+a+bin+liber+den+haf+ta+di+APA+NV+y+cu+APA+NV+lo+dicidi+kiko+lo+hasi+cunele+dentro+di+cierto+criterio+manera+cu+no+tin+mag+di+bin+negoshi+cu+ta+compete+cu+e+centro+di+Oranjestad+%21PPA+ta+considera+cu+e+declaracion+aki+tin+di+haber+tambe+cu+e+hecho+cu+PPA+a+Sali+na+defensa+di+un+vision+di+nos+cu+den+nos+humilde+concepto+lo+por+crea+un+otro+pilar+economico+den+future.+Haf+di+Barcadera+tambe+mest]}
Cu gran interes PPA a sigui e declaracion di Ministro Benny Sevinger den cual el a declara cu e tereno cu a bin liber den haf ta di APA NV y cu APA NV lo dicidi kiko lo hasi cunele dentro di cierto criterio manera cu no tin mag di bin negoshi cu ta compete cu e centro di Oranjestad !

PPA ta considera cu e declaracion aki tin di haber tambe cu e hecho cu PPA a Sali na defensa di un vision di nos cu den nos humilde concepto lo por crea un otro pilar economico den future.

Haf di Barcadera tambe mester a cai bao di APA NV pero gobierno dentro di e proceso a kita competencia di APA NV a permiti e compania cu a gana e procedura pa tuma over responsabilidadnan cu APA NV tabatatin tur tempo.Tur esaki pasobra gobierno cu a malgast un 2.5 billion florin aparentemente no kier a inverti 80 million p/m di APA NV den e restructuracion di e haf di Barcadera. Na mes momento gobierno no a inverti den APA NV na tempo pa sigura cu APA NV tin su propio ‘tugboatnan’ en vez cu awe e servicio ey ta casi den man di compania di afo….. Awe e desaroyonan aki ta worde cuestiona silenciosamente den varios kring aki na Aruba.

APA NV ta un compania di gobierno y lo mester tene cuenta cu e vision di gobierno pa su desaroyo economico y sr. Ministro Sevinger no por bende pueblo un 6 pa un 9 den e asunto aki.

E forma cu e terenonan aki lo worde destina ta hopi importante hasta di crucial importancia pa desaroyo di nos pais.

Na prome lugar PPA por comprende ora APA NV/gobierno reserva un parti di e terenonan aki pa expancion di nos infrastructura cu Aruba mester duna den futuro na nos ‘turismo di cruisero’. PPA ta sostene esaki den tur sentido di palabra.

Pero despues ta bin un pregunta cardinal……E terenonan aki tin un importancia di otro mundo y mester worde usa den un forma cu ta crea e miho ‘return on investment’ cu nos como pais por imagina nos mes.

PPA ta di opinion cu Aruba a keda cu nos turismo inicia den decada di PPA mes esta 1950/60/70 y si acaso logra pa habri un ‘upgrader’ na San Nicolas (despues cu Aruba a conoce un refineria desde 1927) cu Aruba lo ta simpelmente bek pa ‘homeplate’. Vision di PPA ta cu justamente e uso di terenonan aki pa e miho vision/idea posibel lo por crea un pilar economico den futuro.

Pesey PPA ta kere fielmente den un Aruba World Trade Center !! Exito di un World Trade Center ta depende pa gran parti di e formula cu cual e fascilidad worde prepara y presenta na mundo commercial. PPA ta kere den un Aruba World Trade Center accopla na dos Business hotels y accopla na un Universidad cu accento riba e facultadnan di Idioma y I.T. !!

Un Aruba World Trade Center cu lo duna Aruba e oportunidad pa participa den International Trade. Un World Trade Center na prome lugar lo duna Aruba e infrastructura necesario pa ofrece e fascilidadnan aki na esnan cu ta busca pa organisa Conventions pero tambe na e companianan international cu kier presenta nan productonan na mundo henter.

PPA a pidi gobierno di Aruba repetida vez pa mantene un parti substancial di e tereno cu a bin liber pa desaroyo di un Aruba World Trade Center un vision/projecto cu PPA ta visualisa como un projecto entre gobierno y sector priva local y international.

Un Aruba World Trade Center lo por crea un gran cantidad di cupo di trabao den cual cupo di trabao di calidad y cu specialidad riba un diversificacion di tereno. E presencia di un par di cien cupo di trabao den un edificio international asina lo tin su ‘spin-off’ effect directo riba e centro di Oranjestad.

Pesey PPA ta rechasa e declaracion di Ministro Benny Sevinger cu ta APA NV ta dicidi kiko nan ta hasi cu e terenonan aki. Esaki ta un posicion hopi ‘zwak’ pa un gobierno tuma. Ta parce cu e gobierno di AVP NO tin un vision pa desaroyo di Centro di Oranjestad. A presta e idea di un ‘streettrolley’ for di PPA pero a ejecutele sin a inverti den e Centro di Oranjestad mes y sin a hiba un maneho di stimula cierto negoshi pa inverti den nan edificio y den Centro di Oranjestad.

Un vez mas e posicion tuma gobierno di Aruba y ministro Benny Sevinger ta un posicion ‘zwak’ ….e ta crea e impression cu no kier evalua un vision grandi cu lo crea posibelmente un di tres pilar economico aki na Aruba. PPA ta lamenta cu nos no ta tende opinion di gruponan commercial den e asunto aki. No ta kita for cu kada kende ta warda den silencio pa mira si nan grupo/compania ta logra un pida tereno y si no resulta e ora ta cuminsa grita ….pero interes general di pais Aruba no ta worde sirbi cu e silencio aki ningun momento.

PPA no por juda di puntra publicamente unda e voz di parlamento a keda den esaki ???

PPA lo bin bek riba e desaroyo tristo aki !!

Aruba, 9 di augustus 2016
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co