{idkey=509b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4026-elton-lioe-a-tjam-abo-atrobe-tekenen-bij-het-kruisje-lo-costa-pueblo-miyones-y-kisas-biyones%3FItemid%3D101][title=Elton+Lioe-A-Tjam+%28ABO%29%3A+Atrobe+%E2%80%98tekenen+bij+het+kruisje%E2%80%99+lo+costa+pueblo+miyones+y+kisas+biyones%21][desc=Ora+hende+yama+nos+parlamento+un+%E2%80%98Stempel+Parlement%E2%80%99%2C+e+politico+tradicional+cu+ta+sinta+aden+ta+rabia.+A+pesar+cu+e+ultimo+a%C3%B1anan%2C+na+e+inicio+di+cada+a%C3%B1a+parlamentario%2C+algun+miembro+mes+ta+admiti+cu+Aruba+tin+un+%E2%80%98Stempel+Parlement%E2%80%99%2C+ainda+e+miembronan+tradicional+kier+ga%C3%B1a+pueblo+cu+e+no+ta+asina.+Tur+hende+aki+na+Aruba+sa%2C+cu+ta+e+ministernan+ta+manda+y+cu+su+parlamentarionan+t%E2%80%99ey+pa+solamente+legalisa+su+actonan+contra+ley.+Nos+parlamento+no+tin+nada+di+bisa.+Pasobra+e+%E2%80%98vote+]}
Ora hende yama nos parlamento un ‘Stempel Parlement’, e politico tradicional cu ta sinta aden ta rabia. A pesar cu e ultimo añanan, na e inicio di cada aña parlamentario, algun miembro mes ta admiti cu Aruba tin un ‘Stempel Parlement’, ainda e miembronan tradicional kier gaña pueblo cu e no ta asina. Tur hende aki na Aruba sa, cu ta e ministernan ta manda y cu su parlamentarionan t’ey pa solamente legalisa su actonan contra ley. Nos parlamento no tin nada di bisa. Pasobra e ‘vote getters’ ta sinta den gobierno, mientras esunnan mas fortuna cu a haya un puesto halto riba e lista, a bay sinta riba un di e stoelnan di e ‘vote getters’ den parlamento.

Cada dia pueblo ta haya mas confirmacion di esaki. Den e ‘CITGO-deal, Definitive Participation Agreement (Execution version)’, pueblo por lesa cu gobierno a percura pa compromete parlamento no solamente pa acepta e ‘deal’ aki, pero tambe a mara parlamento pa cambia diferente leynan cu ta beneficia esunnan tras di e ‘deal’ aki financiero. Section 12.5:

‘..and (ii) shall positively recommend that Parliament (A) approve this Agreement and the Implementing Agreements and the Aruba Project, including the Special Tax Regime, the provisions of Sections 12.1 (Secure Legal Framework for the Aruba Projec and Capital Investments), 12.2 (Currency), 12.3 (Government Guarantee), 12.6 (No Change in Ownership of Government Parties), 12.7 (Government Parties’ Exclusive Ownership of Aruba Project Assets) and 12.10 (Investor Financings), and (B) enact and promulgate all such laws and decrees that are or may become necessary.., including amendments necessary to effect the changes to State Ordinance Profits Tax (AB 1988, No. GT 47), State Ordinance Dividend Tax (AB 2002, No. 123) and State Ordinance Business Turnover tax (AB 2006, No. 83)’.

Pues atrobe gobierno kier regala alma y cuerpo di pueblo, mientras pa pueblo gobierno tin solamente medida. Den un otro articulo nos lo bay splica mas den detaya kico tur gobierno kier regala ‘CITGO’.

E minister-president a declara publicamente, dia 31 augustus 2016, cu e ‘CITGO-deal’ mester drenta na vigor dia prome di october 2016. Awor con un minister-president por declara algo asina mientras cu e no ta pertenece na su competencia. Otro prueba cu parlamento, e organonan di conseho di estado of CAft no tin nada di bisa. Un miho ehempel di abuso di poder, pueblo no por haya. Cu e minister-president a mara su mes cu e lo percura cu e ‘CITGO-deal’ lo wordo ‘bulldoze’ den parlamento, pasobra su partido tin e mayoria y cu e por conta ciegamente riba e sosten di un miembro di oposicion, esey no kiermen cu pueblo tin cu paga biyones pa un otro aventura cuestionabel.

Si e la tuma parlamento hopi añanan pa traha riba e 800 cambionan di e Codigo Civil. Y asina mes parlamento mester a pospone e tratamento di esaki, pasobra cu e mester di mas tempo pa studia y analisa e 800 cambionan. Anto e no ta realistico pa pensa cu parlamento por trata e ‘CITGO-deal’ di mas di 2000 pagina den un periodo di 30 dia. Banda di e ‘deal’ di 2000 pagina, cu ainda ningun miembro di parlamento, ningun miembro di e organonan di conseho di estado of ningun miembro di CAft a haya, tin un cantidad di otro leynan cu mester wordo cambia. Pues con sincero of integro e minister-president, cu alabes ta un hurista, tabata cu pueblo ora e la bolbe firma e ‘CITGO-deal’ cu tin un clausula di ehecucion di 30 dia?

E contesta ta obvio y simpel, e minister-president ‘just don’t give a damn’. Cu e la firma e ‘CITGO-deal’ cu un clausula di ehecucion di 30 dia, sin aprobacion di parlamento, y asina condena e pueblo pa paga miyones di dollar na daño di perhuicio, manera a sosode den e proyecto di ‘Race track’, parce no ta interesa e minister-president. Pasobra kisas den su manera di pensa, di tur forma e no por sali perdi. Si e logra ‘bulldoze’ e ‘CITGO-deal’ den 30 dia, e lo haya un cabay di campaña y e grupito privilegia lo cobra e ‘finder’s fee’ miyonario, di cual un parti di esaki lo termina den e pot di campaña. Si e no logra cumpli cu e 30 dia, ta pueblo ta esun cu lo tin cu paga miyones di daño di perhuicio, di cual un parti esaki tambe lo termina den e pot di campaña. Pues atrobe ‘tekenen bij het kruisje’ lo costa pueblo miyones y kisas biyones!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co