{idkey=7663b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4028-parlamentario-mr-xiomara-maduro-mep-gabinete-eman-ta-hiba-un-gobernacion-basa-riba-hypocresia%3FItemid%3D101][title=Parlamentario+mr.+Xiomara+Maduro+%28MEP%29%3A+Gabinete+Eman+ta+hiba+un+gobernacion+basa+riba+hypocresia][desc=Durante+e+reunion+tocante+di+otorgacion+y+cambio+di+destino+di+tereno%2C+nos+a+trece+dilanti+algun+ehempel+concreto+cu+ta+ilustra+e+hypocresia+cu+cual+Gabinete+Eman+ta+gobernando+e+Pais+aki.+Ta+propaganda+di+ta+un+Gobierno+cu+ta+berde%2C+green+y+sostenibel%2C+pero+en+realidad+na+man+di+Gabinete+Eman+miles+y+miles+di+metro+cuadra+di+tereno+di+naturalesa+ta+wordo+destrui+y+ainda+nan+falta+mas+pa+caba+di+destrui.%26amp%3Bnbsp%3BWak+por+ehempel+na+Urirama.+Ta+un+di+e+promer+lugarnan+cu+nan+a+laga+roza+44.000+m2+di+]}
Durante e reunion tocante di otorgacion y cambio di destino di tereno, nos a trece dilanti algun ehempel concreto cu ta ilustra e hypocresia cu cual Gabinete Eman ta gobernando e Pais aki. Ta propaganda di ta un Gobierno cu ta berde, green y sostenibel, pero en realidad na man di Gabinete Eman miles y miles di metro cuadra di tereno di naturalesa ta wordo destrui y ainda nan falta mas pa caba di destrui. 

Wak por ehempel na Urirama. Ta un di e promer lugarnan cu nan a laga roza 44.000 m2 di naturalesa pa traha lugar pa pone e 10 molina di biento. Gobierno a laga e compania rosa e tereno sin cu tabata tin vergunning mes pa despues cu e habintantenan a bay juez nan bolbe recorda Ministernan Eman y Sevinger cu eynan ta natuurgebied na unda cu NO mag di construi nada. Pero e Gobierno aki ta hypocrita, pasobra awor nan a manda busca un experto di Hulanda pa bin cambia e zonificacion di Aruba di e manera cu TOCH gobierno por sigi cu e negoshi di Molina di biento na Urirama. Pasobra ta esey e ta pa Gabinete Eman, nada no ta wordo haci cu bon intencion pa e Pais aki y su yuinan, pero TUR cos ta wordo friamente calcula pa asina por haci negoshi cune. Ta asina AVP a y ta goberna. Ta papia bunita di ta berde, pero enrealidad AVP ta horta e Pueblo na grandi di su propio naturalesa. Asina tabata desde tempo di nos abuelonan. E grandinan por conta bo con e Emannan tabata horta tereno di e hendenan humilde. Awe nada no a cambia y nan ta haciendo just pio. Nan ta mishi cu cos cu no ta di nan. Den e caso di Urirama ta bisto cu placa lo mester a pasa bou mesa caba pa paga campania electoral di 2013 pa AVP y Eman por keda na poder y awor mester busca TUR forma pa e proyecto aki por sigi. Pa esaki nan ta dispuesto hasta pa horta e naturalesa cu nos tin cu conserva pa nos yuinan y nan generacion. E pregunta na Minister Sevinger ta pa splica nos si e area di Urirama tambe lo conoce cambio den ROP cu e ta preparando y si ta asina splica kiko ta e motibo cu AVP cu ta aparenta di ta tanto green, ta bira abusa di nos naturalesa di e estado aki. Pasobra den reunion di Comicion di Infrastructura di Parlamento, e experto Hulandes mes a indica cu ta haci cambio pa entre otro por acomoda e parke di Molina na Urirama siendo cu tur hende sa cu eynan ta zona di naturalesa.

Bubali Plas tampoco no a scapa di Gabinete Eman. Eynan tambe nan a laga compania roza naturalesa bay sin importa nada, anto un gobierno supuestamente cu tin green na pecho. Tur hende por a wak e destruccion via potretnan aerial. Tristo ta cu na e area eynan tin hopi parha cu ta busca refugio y ta wordo considera un di e 4 lugarnan mas importante pa parha na nos Pais. E pregunta na Minister Sevinger ta dicon ela permiti pa e destruccion aki tuma lugar? No bin bisa nos cu ta e Gobierno anterior a duna permiso pasobra den e caso dilanti juez a sali na cla cu ta Minister Sevinger a duna derecho di opcion na 2014 y hasta a duna extencion te cu 18 di januari 2016. Pues contesta nos dicon siendo un gobierno green ta permiti pa laga nan roza na Bubali plas y destrui nos Pais di e manera aki. Nos kier pa Mininster Sevinger splica nos si su intencion ta pa cambia e ROP pa haci construccion den Bubali Plas tambe posibel. Pasobra con un Gobierno green por sinta cambia ley djies pa destrui mas naturalesa? Esaki no ta cuadra y ta mustra atrobe con Minister Eman ta sinta gaña cu e ta conservando naturalesa pa nos hobennan. Esey nos ta yama hypocesia optima forma.

Ainda falta mas ehempel di destruccion di naturalesa na Spaans Lagoen, Sero Colorado, Parkietenbos y den tapara tin e destruccion di mangelnan na Isla di Oro. Nos a cuestiona esaki tambe, pasobra Pueblo mester realisa cu Gabinete Eman ta hibando un gobernacion basa riba hypocresia di ta berde y sostenibel siendo cu enrealidad nan ta destruiendo e naturalesa na nos Pais.

7 september 2016

Expresionnan haci den e articulo aki no necesariamente ta refleha opinion di ArenaPoliti.co