{idkey=9107b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4093-booshi-wever-upp-no-ta-existi-un-quick-fix-pa-soluciona-e-ola-di-criminalidad-riba-nos-isla%3FItemid%3D101][title=Booshi+Wever+%28UPP%29%3A+No+ta+existi+un+%E2%80%9Cquick+fix%E2%80%9D+pa+soluciona+e+ola+di+criminalidad+riba+nos+isla%21][desc=Den+transcurso+di+siman+cu+a+pasa%2C+Aruba+un+biaha+mas+a+wordo+sacudi+pa+un+crimen+na+unda+un+ciudadano+a+wordo+asesina.+Mesora+bosnan+a+lanta+un+biaha+mas+cu+mester+baha+e+minister%2C+cu+mester+bin+manifestacion+etc+etc.+Cada+bez+cu+algo+semehante+asina+pasa%2C+nos+ta+tuma+nota+cu+e+reaccionnan+ta+mas+o+menos+igual+y+despues+di+un+par+di+siman+cos+ta+bira+normal+atrobe+of+manera+e+ministernan+di+e+gabinete+actual+ta+bisa%2C+%E2%80%9Cbusiness+as+usual%E2%80%9D%2C+te+ora+cu+algo+bolbe+pasa.+Pero+mientras+tanto+ningun]}
Den transcurso di siman cu a pasa, Aruba un biaha mas a wordo sacudi pa un crimen na unda un ciudadano a wordo asesina. Mesora bosnan a lanta un biaha mas cu mester baha e minister, cu mester bin manifestacion etc etc. Cada bez cu algo semehante asina pasa, nos ta tuma nota cu e reaccionnan ta mas o menos igual y despues di un par di siman cos ta bira normal atrobe of manera e ministernan di e gabinete actual ta bisa, “business as usual”, te ora cu algo bolbe pasa. Pero mientras tanto ningun hende no ta busca un solucion berdadero y structural pa por mitiga e ola di criminalidad y inseguridad cu ta atacando nos pueblo aki na Aruba.

UPP na varios ocacion a mustra riba origen di nos problemanan, pero lamentablemente no ta haya oido y lamentablemente cada bez nos ta haya razon. Nos situacion di criminalidad ta rekeri un analysis y trato holistico (pues den su totalidad). Cuminzando for di e minister su maneho (cu no tin maneho) te na nos sistema coreccional, educativo y social. En todo caso e forma cu e Minister di Inseguridad a bin ta tratando esaki no ta acceptabel. Un rato ta culpa mayornan, otro biaha nos maestronan, despues ta nos cuerpo di hermandad y otro biaha ta falta di placa of presupuesto. UPP ta kere cu riba e asunto di criminalidad y inseguridad ta varios rapportnan a wordo traha den pasado, pero cu nunca no a wordo ehecuta manera mester ta. Tambe e actitud di cambia e maneho djis pasobra ta trata di un maneho di un partido opositorio cu tabata na mando, sin bin cu un mihor maneho, no a contribui na situacion cu nos ta den.

Pa loke a pasa na Wayaka, ningun di nos parlamentarionan ni minister di Justicia sr. Dowers ta para keto riba loke ta wordo treci padilanti. P.e. e informacion cu no ta trata di un robo of atraco aki, ta mustra pues cu ta trata di un incidente premidita cu ta parce un acto di liquidacion, na unda cu kizas te hasta un hende robez mester a paga cu su bida. E tipo di criminalidad aki, si esaki ta e caso, no tin nada di haber con nos mayornan ta lanta nos yiunan of cu maestronan di scol no ta educa nos hubentud.
Tambe UPP ta ripara cu e informacion den medionan di comunicacion ta menciona cu posibelmente ta trata di un persona di Guajira, esta Colombia. Aki tambe tur hende ta keda keto. Dia cu UPP, como e UNICO partido, a bisa algo contra e kitamento di e visa pa Colombianonan, ningun hende a duna oido. Partidonan politico tanto di gobierno como oposicion a keda keto keto, pasobra nan ta corda riba e votonan pa e siguiente eleccion, den caso aki esun di otro aña. Tur hende a laga esaki pasa numa. Si tabata tin e obligacion di un visa, probablemente e presunto sicario aki lo no por a drenta legalmente aki na Aruba. Pues si ta trata di un reglamento di cuenta ehecuta dor di un stranhero cu parce di ta di Colombia, nos por hasta bisa cu e persona cu a fayece siman aki ta e prome victima di e kitamento di visa pa Colombiano. Un visa cu a wordo kita pa djies duna minister Oduber e oportinidad di bisa cu ta e a hiza e cifra di turismo y algo cu un biaha mas imponi pa Hulanda. Henter e idea di eleminacion di visa aki, TUR departamentonan aki na Aruba, cu excepcion di e directora di ATA, tabata contra. Aki no solamente gobierno ta culpabel, pero tambe tur esnan cu a scohe pa keda keto.
Durante e presentacion di minister di Husticia den Parlamento siman pasa diahuebs, nos por a scucha un parlamentario di AVP, sr. Rasmijn, ta puntra riba e sistema di Electronic System for Travel Authorization (ESTA), manera cu nos conoce na Merca. A puntra si esaki por wordo introduci aki na Aruba. UPP ta kere cu na momento cu nos a mantene e visa pa Aruba, semper por a haci excepcion p.e. pa Colombianonan cu ta bin Aruba, a base di e hecho cu nan tin un visa pa drenta Merca segun e sistema di screening Mericano. Un sistema mas facil pa aplica.

Pero manera nos a bisa caba, e ola di criminalidad no ta solamente pa e motibo ey, sino ta trata di algo mas compleho y total. E situacion social deplorabel cu nos ta pasando aden tambe tin su contribucion na e situacion aki. Nos fronteranan cu ta habri y no tin vigilancia ni control. E circulo vicioso cu nos hobennan ta ser pusha aden y cu ta pone cu nan por termina den e circuito di delinquencia, dor cu nan ta bira “drop outs” y no tin ningun clase di acohida of sosten pa nan. Nos por tuma aki como ehempel e situacion di e embarazo hubenil. Hopi di e hobennan aki despues cu nan a sali na estado, famia ta saca nan for di cas, hopi ta wordo kita for di scol y den hopi caso, pa colmo nan yiu tambe ta wordo kita for di nan. Y pa motibo cu no tin ningun acohida apropia pa e muchanan aki, nan ta cay hopi biaha den mundo criminal. UPP den su programa tin su pensamento al respecto. P.e. den e caso aki, UPP ta kere cu mester bin cu vivienda pa e mamanan hoben aki cu supervision profesional y adecuado.

Cu hopi fanfaria poco tempo pasa a anuncia cu lo bin un programa di resocializacion pa hoben y adultonan cu ta den KIA. Tur esaki a keda na bunita palabranan, pasobra KIA no ta un prison, sino un universidad di crimen. E hoben ta drenta como un amateur y eta sali como un profesional.
UPP ta elabora riba esaki den su programa cu plannan concreto y factibel. Educacion na prome lugar mester ta un instrumento mas esencial den nos comunidad. Ya cu for di nacemento e educacion cu bo ricibi lo determina bo bida. P'esey nos sistema di enseñansa keto bay parce uno di EXCLUSION y no di INCLUSION. Nos enseñansa, cu respet pa tur esnan cu añanan ta traha den esaki, ta mas bien un enseñansa di “dropouts” cu na nan turno lo bay cay den e circulo vicioso cu nos a mustra riba dje caba. Pa loke ta nos hobenan cu a cay den criminalidad, mester mester bin cu un Instituto special pa e hobennan aki, na unda nan por haya un educacion. Pero tambe cu nan por hasi trabounan pa comunidad pa paga pa e educacion aki.

Nos mester realisa cu nos tin un problema cu NO ta wordo soluciona cu un "quick fix" pero ta rekeri hopi esfuerzo y placa. Pues un manifestacion so lo no soluciona nos problemanan y e ola di criminalidad riba nos baranca!!


Lider di UPP
C.A.S.D. Wever
18 september 2016

Expresionnan haci den e articulo aki no necesariamente ta refleha opinion di ArenaPoliti.co