{idkey=1188b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4396-elton-lioe-a-tjam-abo-e-unico-happy-riba-nos-one-happy-island-ta-e-grupito-nos-cu-nos%3FItemid%3D101][title=Elton+Lioe-A-Tjam+%28ABO%29%3A+E+unico+%E2%80%98happy%E2%80%99+riba+nos+%E2%80%98One+Happy+Island%E2%80%99%2C+ta+e+grupito+%E2%80%98Nos+cu+Nos%E2%80%99][desc=+Den+un+pais+unda+poco+informacion+actual%2C+realistico+y+independiente+ta+disponibel%2C+e+nivel+di+discusionnan+lo+keda+na+un+nivel+hopi+abou+mientras+cu+e+vulnerabilidad+pa+manipulacion+lo+keda+hopi+halto.+Den+situacionnan+asina%2C+hopi+biaha+gobiernonan+tradicional+ta+paga+institutonan+academico+pa+produci+rapportnan+cu+tin+e+solo+meta+pa+laga+pueblo+kere+cu+su+maneho+ta+esun+corecto.+E+practica+aki+no+solamente+ta+cuestionabel+%28tambe+den+mundo+academico%29%2C+pero+si+e+nivel+di+e+%E2%80%98producto+academico]}
Den un pais unda poco informacion actual, realistico y independiente ta disponibel, e nivel di discusionnan lo keda na un nivel hopi abou mientras cu e vulnerabilidad pa manipulacion lo keda hopi halto. Den situacionnan asina, hopi biaha gobiernonan tradicional ta paga institutonan academico pa produci rapportnan cu tin e solo meta pa laga pueblo kere cu su maneho ta esun corecto. E practica aki no solamente ta cuestionabel (tambe den mundo academico), pero si e nivel di e ‘producto academico’ tambe ta laga di desea, anto bo tin cu haci bo mes e pregunta si realmente pueblo su interes ta wordo bon sirbi di e forma aki. Pasobra si e ‘producto academico’, pa cual a paga balente placa pa manipula pueblo, no ta ni logra e meta aki, anto e ta obvio cu aki ta trata di un otro proyecto di ‘vriendjes politiek’ cu tin e unico meta pa faborece un grupito.

Algun siman atras, despues di a ricibi 5 aña di placa di pueblo, un ‘doctor’ a presenta un rapport unda e ta yega na e conclusion cu ’78 percent of the Aruban population was happy’. Un conclusion hopi peculiar. Pasobra concluyendo algo asina, ta encera cu su investigacion ta miho cu esun di ‘Sustainable Development Solutions Network (SDSN)’ di Nacionnan Uni, di cual e la uza como ehempel, y cu e pueblo di Aruba ta mas ‘happy’ cu esun di Dinamarca (75.3%), cu e aña aki a logra obtene e prome puesto riba e lista mundial di paisnan mas ‘happy’ (World Happiness Report 2016, Update (Vol.I), SDSN).

E investigacionnan di SDSN ta uza e criterionan di 2013 di OECD. Aki enfasis ta wordo poni riba: 1) con un persona ta mira y evalua su bida. 2) su emocionnan positivo (alegria y orguyo). 3) su emocionnan negativo (dolor, rabia y preocupacionnan). Tambe ambos instituto mundial ta recomenda pa e criterionan aki, wordo incorpora den encuestanan nacional. Te asina leu cu nos sa, nos oficina di estadista (CBS) no ta investiga ‘happiness’, e ultimo encuesta nacional ta di 2010 y den e ultimo ‘Statistical Yearbook 2014’, tampoco algo di ‘happiness’ por wordo haya. Pues pa yega na e conclusion cu e pueblo Arubano ta esun mas ‘happy’ di mundo, pasobra ‘Over the past five years, we’ve collected a significant 2,000 surveys, stratified across four groups in Aruba, and have seen the desired stability in the island’s happiness levels (Caribbean Journal, september 2016)’, ta keda un misterio.

E lo ta bon pa haya sa mas con a yega na e 100 encuestanan di tur 4 grupo, cu a wordo sigui 5 aña largo durante e investigacion ‘revelador’ aki. Asina pueblo por haya sa mas di e obhetividad y representatividad (0.36% di nos populacion) di e investigacion haci pa e ‘doctor’ y cu si esaki realmente por wordo considera como un refleho di nos sociedad. Tambe lo ta bon pa mira si e criterio nr 3. di OECD, a wordo inclui y con e resultadonan di e criterio aki a wordo procesa den e conclusion final cu a determina cu nos ta e pais mas ‘happy’ di mundo!

Mientras cu tin tanto rabia, corupcion, falta di trabou, siguridad financiero, insiguridad y pobresa bou pueblo, e ta dificil pa acepta of kere un conclusion asina. Special ora e ta bin di e mesun ‘doctor’ cu a gaña henter e pueblo algun aña pasa cu Aruba tabata un di e paisnan mas rico na mundo y p’esey e no tabata mester di ningun ayudo financiero mas di Hulanda. Despues di e cambio di maneho aki, Aruba su situacion socioeconomico a deteriora barbaramente. Awendia Aruba ta mas dependiente di tur otro nacionalidadnan y nos libertad financiero a wordo entrega bek na Hulanda. Pues e conclusion ‘happy’ aki, tambe por ta e siguiente fase di entreguismo?

Den nos humilde opinion, e lo ta hopi miho y util pa nos sociedad, si gobierno cuminsa publica informacion actual, realistico y independiente riba desempleo, educacion, migracion, criminalidad, (in)siguridad y cuanto placa ta wordo malgasta na manipulacion, enbes di paga tur sorto di ‘experto’ cu ta biba lekker y ‘happy’ den exterior, bin gaña pueblo cu 1000 rapport. Ningun di e ‘expertonan’ aki, ta sinti e amargura y e sufrimento cu e pueblo aki si ta sinti tur dia, a consecuencia di mal gobernacion. Pues e conclusion corecto y sin manipulacion ta: E unico ‘happy’ riba nos ‘One Happy Island’, ta e grupito ‘Nos cu Nos’.

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co