{idkey=3758b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4428-booshi-wever-upp-problema-entre-otmar-oduber-y-avp-ta-muestra-di-incapacidad-y-falta-di-liderasgo-di-mike-eman%3FItemid%3D101][title=Booshi+Wever+%28UPP%29%3A+Problema+entre+Otmar+Oduber+y+AVP+ta+muestra+di+incapacidad+y+falta+di+liderasgo+di+Mike+Eman][desc=Henter+Aruba+por+tabata+testigo+siman+pasa+di+un+crisis+den+gobernacion+di+Mike+Eman%2C+na+momento+cu+Otmar+Oduber+a+dicidi+di+bay+Gobernador+y+tuma+su+retiro+for+di+Gabinete+Mike+Eman+II+y+tambe+for+di+partido+AVP.%26amp%3Bnbsp%3BMientras+cu+por+a+sigui+henter+e+splicacion+di+Otmar+Oduber+di+e+motibonan+pakico+e+no+por+a+sigui+mas+den+gobierno+ni+den+partido%2C+Otmar+Oduber+ta+falta+cu+e+transparencia+cu+ta+necesario+den+e+caso+aki.+Na+januari+caba%2C+manera+a%C3%B1a+a+habri%2C+Otmar+Oduber+a+menasa+caba+di+sali+for]}
Henter Aruba por tabata testigo siman pasa di un crisis den gobernacion di Mike Eman, na momento cu Otmar Oduber a dicidi di bay Gobernador y tuma su retiro for di Gabinete Mike Eman II y tambe for di partido AVP. 

Mientras cu por a sigui henter e splicacion di Otmar Oduber di e motibonan pakico e no por a sigui mas den gobierno ni den partido, Otmar Oduber ta falta cu e transparencia cu ta necesario den e caso aki. Na januari caba, manera aña a habri, Otmar Oduber a menasa caba di sali for di gobierno, mirando cu tin hopi aspecto- y situacionnan di gobernacion no tabata bayendo bon. E tempo, despues di a trek na e bel, Mike Eman a bay na intermedia y asina evita un kiebro den su gobernacion y den su partido. Algun luna despues nos por a tende y Otmar Oduber a enfatisa esaki den su conferencia di prensa ultimo, a yega na acuerdo na nivel ministerial den conseho di minister, con lo atende tur e puntonan di preocupacion. Y awor despues di hopi luna despues, e realidad parce cu nada no a wordo atendi riba loke ta e preocupacionnan aki. Otmar Oduber a culpa Mike Eman di no por a maneha e problemanan cu tabata existi entre Otmar Oduber y e diferente ministernan. Loke UPP ta haya si, cu ni na januari, ni na maart y ni awor, Otmar Oduber no a pone na claridad e puntonan di preocupacionnan aki. Segun ta wordo bisa lo tin un comprendimento y firmamento di esaki, pero dicon Otmar Oduber no por ta transparente cu pueblo y mustra kico ta e puntonan aki. 

Otmar Oduber a acusa tambe Mike Eman, di ta prefera laga tempo pasa y no soluciona e problemanan cu ta su dilanti. E ta bay asina leu di mustra cu esaki tambe a pasa ora cu mester a atende e nombramento di un gobernador pa Aruba. Cu Mike Eman no tabata sa di atende e problematica aki manera debe ser. 

UPP ta di acuerdo cu e punto di bista aki, ya cu esaki nos a bin pa varios siman ta mustra riba dje caba. Pero nos ta haya cu Otmar Oduber na varios ocasion tambe a mustra di ta un tiger, pero despues ta bira pushi. Tempo di e welga di hamber, tempo di introduccion di Caft y den e proceso di nombramento di un gobernador, Otmar Oduber mester tabata mas enfatico den e momentonan crucial aki. Awor cu kier acusa Mike Eman cu a entrega sin a para duro, ta manera moster na de maaltijd. Pasobra con cu bay bin Otmar Oduber tambe tabata parti di gobernacion aki. 

Por ultimo, henter e problema entre Otmar Oduber y gobierno y AVP, ta mustra bon cla cu Mike Eman no tin e capacidad di goberna ni su partido ni su gobierno. Mike Eman ta mustra un falta di liderasgo completo, pa por a percura pa acomoda Otmar Oduber y su ministernan. Awor Mike Eman, y hunto cu ne varios otro ministernan, ta bin bisa cu caracter di Otmar Oduber ta haci dificil pa traha cu e ministernan. Cu Otmar Oduber kier pa hopi cos sosode y riba su manera. Asina Mike Eman ta menciona e problema di AruParking, cu Otmar Oduber no kier a mira cu e maneho di parkeo tabata tin mester adaptacion. Triunfantemente Mike Eman ta anuncia, cu awor cu Otmar Oduber no ta un estorbo mas, lo bin cu cambio di maneho den asunto di AruParking. Como lider di un gobierno, ta un berguensa pa constata, cu Mike Eman, “for the sake” di su partido y wanta su gobernacion hunto, no tabata tin e “guts” pa atende e problema di AruParking pa por suavisa e maneho. AruParking ta bay haci dos aña y cu a caba y ta cabando cu centro di nos ciudad, pa motibo di un maneho intransigente di Otmar Oduber. Pero Mike Eman, pa scapa su partido y gobierno te na unda cu tabata por, a prefera di sacrifica nos comerciantenan y nos trahador den playa y laga Otmar Oduber sigui cu su capricho. Awor Mike Eman kier bin hunga hereo, cu entrante dialuna lo adapta e maneho di AruParking. Pues cu otro palabra, si por a lijm Otmar Oduber pa e resto di gobernacion, Mike Eman lo no a introduci un cambio den maneho di parkeo, pasobra e lo a keda pa tolera e maneho di Otmar Oduber. E simpel ehempel aki di AruParking aki ta muestra cu Mike Eman no tin liderasgo den su gobierno ni di e pais aki.


Partido UPP
Booshi Wever
5 november 2016

Expresionnan haci den e articulo aki no necesariamente ta refleha opinion di ArenaPoliti.co