{idkey=2501b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4503-mep-bao-di-mep-hedging-tabata-25-y-durante-3-luna-y-bao-di-avp-esaki-ta-90-y-durante-2-ana%3FItemid%3D101][title=MEP%3A+Bao+di+MEP+hedging+tabata+25%25+y+durante+3+luna+y+bao+di+AVP+esaki+ta+90%25+y+durante+2+a%C3%B1a%21][desc=Mike+de+Meza+calumniando+un+biaha+mas+contra+MEP%3A%26amp%3Bnbsp%3BAVP+ta+un+partido+cu+semper+y+specialmente+durante+di+campa%C3%B1a+pa+eleccion+a+demoniza+MEP+di+ta+un+partido+di+medida.+Asina+nan+a+core+campa%C3%B1a+na+2009+bisando+pueblo+cu+e+BBO+ta+un+medida+implementa+pa+gobierno+di+MEP%2C+pero+cu+asina+nan+drenta+gobierno+nan+lo+elimina+esaki+completamente.+Pero+kico+nos+ta+mira%3F+Gabinete+Eman+despues+di+7+a%C3%B1a+te+ainda+no+a+elimina+e+BBO%2C+pero+a+aumenta+esaki+te+na+3.5%25+y+den+cual+ta+inclui+e+2%25+di+BAZV.+Fuer]}
Mike de Meza calumniando un biaha mas contra MEP: 

AVP ta un partido cu semper y specialmente durante di campaña pa eleccion a demoniza MEP di ta un partido di medida. Asina nan a core campaña na 2009 bisando pueblo cu e BBO ta un medida implementa pa gobierno di MEP, pero cu asina nan drenta gobierno nan lo elimina esaki completamente. Pero kico nos ta mira? Gabinete Eman despues di 7 aña te ainda no a elimina e BBO, pero a aumenta esaki te na 3.5% y den cual ta inclui e 2% di BAZV. Fuera di no elimina e BBO, Gabinete Eman a introduci un cantidad di otro medida cruel riba lomba di pueblo. Sinembargo e politiconan cobarde aki semper ta recori na e kapstok di partido MEP y p’asina colga nan medidanan na dje. Algun ehempel di esakinan ta:

1. Gabinete Eman a introduci e medida di pago pa recogemento di sushi di 27 florin pa luna. Ora critica a bin di pueblo contra e medida aki di biaha nan a core declara cu e plan di pago pa recogemento di sushi a origina durante e gobernacion di MEP, siendo tur hende sa cu na final di 2009 pueblo no tabata paga ningun depchi pa recogemento di sushi.
   
   
2. Gabinete Eman a introduci e pago pa parkeer auto den centro di ciudad. Na momento cu pueblo a cuminsa critica e medida aki, di biaha e maquinaria berde start pa trata di bende na pueblo cu durante di e gobierno di MEP e plan aki tabata existi caba. Aki tambe tur hende ta na altura caba cu na final di gobernacion di MEP na 2009 no tabata existi ningun parkeermeter den centro di ciudad.
   
   
3. Gabinete Eman a introduci e medida di BAZV. Pa hustifica e medida aki un biaha mas nan kier subi lomba di MEP bisando cu tabata MEP a bin cu e BBO na 2007, pues cu esaki no ta un invento di nan. Pero e medida aki crea pa AVP ta destina pa haya mas placa den caha di gobierno y cu e meta final pa elimina  e contribucion di gobierno den fondo di AZV.
   
   
4. Gabinete Eman a introduci e medida di aumenta e edad di pensioen te 65 aña. Atrobe partido AVP  kier uza MEP como nan ‘pispaaltje’ bisando cu e medida aki tabata biba caba bao di gobernacion di MEP. Sinembargo realidad di bida ta cu na final di gobernacion di MEP na 2009 e edad di pensioen a keda 60 aña.
   
   
5. Un biaha mas partido AVP ta colga na bachi di MEP pa loke ta trata hedging. Awor segun Mike de Meza hedging tambe a origina bao di gobierno di MEP. Sinembargo tempo di MEP nos  a hedge, esta cera un seguro pa solamente cada vez 3 luna y solamente 25% di e totalidad. Contrario na esaki e gobierno iresponsabel di AVP y Mike de Meza ‘himself’ a hedge NO 25% di e totalidad, pero 90% y NO pa 3 luna pero pa 2 aña. Te cu awor e hedging aki a costa nos pueblo mas di 300 miyon florin sin cu pueblo a beneficia di esaki. Pues aki nos ta mira atrobe con AVP ta keda tira culpa riba MEP, siendo e hedging corupto cu nan a practica tabata riba nan propio cuenta.
   
   

Esaki ta 5 ehempel bibo pa demostra pueblo cu AVP no sa con pa goberna y cu ora nan tin cu introduci medidanan drastico pa haya extra placa pa nan malgasta, e cobardenan aki ta recori na partido MEP bisando cada biaha cu ta durante gobernacion di MEP tur e ideanan di e medidanan aki a origina. Politiconan di AVP no ta homber y muher suficiente para den nan sapato pa carga nan propio responsabilidad y defende riba nan propio forsa e medidanan cu nan ta tuma riba lomba di pueblo.

Expresionnan haci den e articulo aki no necesariamente ta refleha opinion di ArenaPoliti.co