{idkey=4889b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4544-mireille-sint-jago-mep-incapacidad-ta-un-peliger-pa-ensenansa-di-aruba%3FItemid%3D101][title=Mireille+Sint+Jago+%28MEP%29%3A+Incapacidad+ta+un+peliger+pa+ense%C3%B1ansa+di+Aruba][desc=Igualdad+vs+trato+igual%26amp%3Bnbsp%3BDurante+presupuesto+di+2017+nos+tur+por+a+nota+con+Minister+di+Ense%C3%B1ansa+Michelle+Hooyboer+Winklaar+a+bolbe+demostra+cu+e+falta+conocemento+pa+por+ta+un+bon+Minister.+El+a+expresa+su+mes+na+un+manera+cu+ta+demostra+no+solamente+falta+di+conocemento+y+respet+pa+su+puesto%2C+pero+tambe+pa+tur+e+trahadornan+y+muchanan+cu+ta+cay+bou+di+su+responsabilidad.%26amp%3Bnbsp%3BMinister+Hooyboer-Winklaar+no+sa+e+diferencia+entre+%26%23039%3Btrato+igual%26%23039%3B+y+%26%23039%3Bigualdad%26%23039%3B.+Esaki+nos+tur+por+a+conclui+ora+M]}
Igualdad vs trato igual 
Durante presupuesto di 2017 nos tur por a nota con Minister di Enseñansa Michelle Hooyboer Winklaar a bolbe demostra cu e falta conocemento pa por ta un bon Minister. El a expresa su mes na un manera cu ta demostra no solamente falta di conocemento y respet pa su puesto, pero tambe pa tur e trahadornan y muchanan cu ta cay bou di su responsabilidad. 

Minister Hooyboer-Winklaar no sa e diferencia entre 'trato igual' y 'igualdad'. Esaki nos tur por a conclui ora Minister Hooyboer a bisa: "... Den contexto di enseñansa, igualdad ta un palabra peligroso, den cierto sentido, pasobra nos no kier trata tur mucha igual." Corda, ta Minister e ta, pa 7 aña caba y ainda e ta expresa su mes na un manera cu ta demostra falta di conocemento. 

Peliger 
Pa cuminsa: Nos tur ta igual y nos tur tin e mesun derechonan. Pues tur mucha tin derecho pa ricibi un trato igual, pasobra ley ta stipula: Casonan igual lo mester haya un trato igual. Casonan diferente lo mester haya un trato diferente. Pero esey no kiermen cu en berdad tur mucha lo ricibi un trato igual, pasobra tur ta diferente. A base di hechonan obhetivo nos lo tin mag di diferencia: edad, conocemento, comportacion etc. Pero nos NO tin mag di discrimina. Un Minister cu of no sa e diferencia entre e dos expresionnan aki of cu no tin interes pa haya e conocemento necesario pa por ehecuta su trabou manera debe ser, esey, den mi opinion ta peligroso. Si, locual ta peliger pa Enseñansa na Aruba ta un persona incapacita cu no ta percura pa educa su mes como Minister di Enseñansa, pa e ta bon informa. 

Diferencia
Ta obvio cu Minister Hooyboer-Winklaar, den e tres aña cu e ta Minister di Educacion, no a tuma tempo pa educa su mes pa sa e diferencia entre igualdad, trato igual y diferencia entre muchanan. Sea den bida diario of den e contexto di enseñansa, igualdad y trato igual tin e mesun nificacion. E lo ta na su lugar pa mi splica kico Minister Michelle Hooyboer probablemente lo mester a bisa. Na prome instancia, igualdad tin di haber cu derecho humano of den e situacion aki, derecho di mucha. Den contexto di Enseñansa e palabra igualdad NO ta peligroso mes. Tur mucha tin e mesun derechonan. Casonan cu ta similar lo mester wordo trata similar, pero casonan diferente no por wordo trata similar. Pues, pa por crea siguridad (huridico) den enseñansa, tur mucha en principio, lo mester wordo trata mescos. Un diferencia lo por wordo haci si, a base di hechonan obhetivo: edad, sexo, cifra di rapport etc. 

Sentido
Locual ta peligroso den e contexto di Enseñansa y mi kier pone enfasis cu esaki ta peligroso den TUR sentido, ta un Minister di Enseñansa cu NO ta respeta ley y reglanan y ta schors un docente sin tene su mes na  reglanan, un Minister cu na 2016 a dicidi cu rapport di klas 5 no ta conta pa muchanan di scolnan di DPS y asina stroba muchanan pa haya un oportunidad pa traha e Colegio toets. Of un Minister cu ta baha subsidio di Universidad di Aruba y asina causa cu e collegegeld ta subi di 1200 pa 2500 florin. Of un Minister di Enseñansa cu ta dicidi cu ningun mucha mas lo por keda sinta den 1e klas, pero e no ta percura pa e scolnan tin ayudo adecua pa guia e muchanan cu ta atrasa den comprendemento di nan lesnan. Of un Minister di Enseñansa cu ta warda pa scol habri pa tuma un decision pa cera un scol y kita un dak di asbest. Un Minister cu no a bringa pa nos por tin plaatsing previlegia reserva pa nos propio yiunan di tera por studia pa bira dokter na Hulanda. Un Minister cu ta perhudica studiantenan di afo cu un seguro medico di calidad inferior. 

Incapacidad
E ultimo dos Ministernan di Enseñansa di Mike Eman, tur dos no tawata of ta apto pa ehecuta e trabou di Minister di Enseñansa. Den e caso di Minister Hooyboer-Winklaar e lo ta pio, pasobra el a demonstra cu no solamente e ta un Minister cu falta conocemento di ley, pero cu asina e tambe falta respet pa e profesion di politica, e falta respet pa derecho di mucha, pa e trabou duro cu mayornan ta haci pa nos muchanan y e falta respet pa e profesion e roeping di un maestro door si no prepara un discurso adecua, di nivel y corecto. Pa termina, si despues cu Michelle Hooyboer-Winklaar a cumpli den total 7 aña, como Minister di varios Ministerio y el a wordo paga mas cu un miyon, cu ainda e y su coordinadornan no por a prepara un discurso na un manera, cual ta demostra respet pa pueblo di Aruba den tur sentido y den su totalidad, mi por conclui cu den contexto di enseñansa, igualdad no ta un palabra peligroso, locual si ta peligroso ta un Minister di Enseñansa cu a prueba di ta incapacita.

Expresionnan haci den e articulo aki no necesariamente ta refleha opinion di ArenaPoliti.co