{idkey=2595b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4547-evelyn-wever-croes-mep-tratamento-cu-por-scapa-hopi-hende-di-amputa-pia%3FItemid%3D101][title=Evelyn+Wever-Croes+%28MEP%29%3A+Tratamento+cu+por+scapa+hopi+hende+di+amputa+pia][desc=EVELYN+WEVER-CROES+RIBA+IMPORTANCIA+DI+HYPERBARIC+CHAMBER.%26amp%3Bnbsp%3BORANJESTAD+%E2%80%93+Den+Parlamento+Evelyn+Wever-Croes+a+trese+padilanti+e+importancia+di+e+hyperbaric+chamber+of+hyperbaric+tank+pa+salud+di+nos+hendenan.+Naturalmente+e+ta+importante+pa+buseadornan%2C+pero+tambne+pa+personanan+cu+ta+sufri+di+diabetes+y+tin+problema+di+circulacion+di+nan+pianan.%26amp%3Bnbsp%3B%E2%80%9CE+ta+un+dolor+inmenso+ora+un+persona+mester+amputa+su+pia.+Pero+tin+un+tratamento+cu+por+Evita+e+paso+drastico+aki%3A+hyperbaric+chamber.+Lo]}
EVELYN WEVER-CROES RIBA IMPORTANCIA DI HYPERBARIC CHAMBER. 

ORANJESTAD – Den Parlamento Evelyn Wever-Croes a trese padilanti e importancia di e hyperbaric chamber of hyperbaric tank pa salud di nos hendenan. Naturalmente e ta importante pa buseadornan, pero tambne pa personanan cu ta sufri di diabetes y tin problema di circulacion di nan pianan. 

“E ta un dolor inmenso ora un persona mester amputa su pia. Pero tin un tratamento cu por Evita e paso drastico aki: hyperbaric chamber. Locual tabata worod hasi antes na clinica HOPE di dr. Posner. Nos sa con importante esaki ta pa nos pais, nos solamente pa turismo pa buseo, pero mas aun pa tratamento di patientnan di diabetes pa scapa nan pia, of patientnan di cancer pa tin un miho calidad di bida. 

Ya nos tin 4 anja caba, desde cu clinica HOPE a sera na 2012. Clinica HOPE a sera debi na disputa cu hospital y AZV, siendo cu e tabata tin un papel masha importante na Aruba. 

Awor despues di e pleito ey, Aruba tin 4 anja caba ta manda hopi patient afo cu heridanan na pia, pa scapa nan pia. No tur pacient por worod manda den exterior, tin alguin ta demasiado swak pa biaha. E gastonan pa manda e demas pacientenan den exterior pa tratamento ta 1 miyon florin pa anja.

Nos sa cu tin un Hyperbaric Tank na Aruba desde 2014, nan a papia cu tur minister, pero no tabata tin oido. Nan a papia cu hospital, pero tampoco tabata tin oido. Nan a ofrese pa bende e tanki pa 190 mil dollar, pero no a haya ningun reaccion. 

Mientras tanto a sigi manda hende den exterior cu ta costa 1 miyon florin pa anja, y otronan cu ta mucho swak pa biaha ta amputa pia numa!

Mi ta puntra mi mes: ki clase di cuido medico esaki ta? Unda e prioridadnan di e gobierno aki ta? Si bo sa cuanto dolor ta causa cu no tin un Hyperbaric Chamber na Aruba, anto pa 190 mil dollar bo no por cumpra esun cu tin? Gobierno ta prefera manda hende afo leew di nan famia pa 1 of 2 luna, y esnan mucho swak gobierno ta prefera di amputa, djis pasobra gobierno no kier soluciona e problema.

Gobierno tin 3.3 miyon florin riba su presupuesto pa propaganda, esey ta mas cu 10 biaha mas caro cu e Hyperbaric Chamber! Esaki mi kiermen cu prioridad equiboca” Lider di MEP a duna di conose.

REACCION DI MINISTER SCHWENGLE

“Mi ta content cu minister Schwengle a mustra hopi habri pa e opcion aki, y a compromete su mes cu Parlamento cu e lo bai traha riba esaki. Segun minister Schwengle e no tabata sa nada di esaki, pero e tambe ta di opinion cu esaki ta un bon solucion riba termino corto, cu por duna un mihor calidad di bida na nos pacientnan di diabetes y cancer” Evelyn Wever-Croes a duna di conose..

Expresionnan haci den e articulo aki no necesariamente ta refleha opinion di ArenaPoliti.co