{idkey=2320b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4590-gabinete-me-ii-repsol-y-total-ta-cuminsa-cu-boramento-di-prueba-pa-gas-na-aruba%3FItemid%3D101][title=Gabinete+ME+II%3A+REPSOL+Y+TOTAL+ta+cuminsa+cu+boramento+di+prueba+pa+gas+na+Aruba][desc=Consorcio+eplorando+sub-suelonan+di+Aruba+ta+informa+gobierno%3A%26amp%3Bnbsp%3BUn+desaroyo+sumamente+positivo+pa+Aruba+%26amp%3Bnbsp%3B%26amp%3Bnbsp%3BORANJESTAD+-+%26quot%3BNos+a+haya+informacion+oficial+cu+REPSOL+y+TOTAL+ta+bay+inicia+e+siguiente+fase+di+exploracion%2C%26quot%3B+Prome+Minister+a+anuncia+na+pueblo+henter+durante+un+conferencia+di+prensa+cu+a+tuma+luga+den+sala+di+Conseho+di+Minister+di+Aruba+den+edificio+Cocolishi+anexo+na+Bestuurskantoor.+E+noticia+importante+aki+ta+uno+sumamente+positivo+pa+Pais+Aruba%2C+specialmente+mirando+e+]}
Consorcio eplorando sub-suelonan di Aruba ta informa gobierno: 
Un desaroyo sumamente positivo pa Aruba   

ORANJESTAD - "Nos a haya informacion oficial cu REPSOL y TOTAL ta bay inicia e siguiente fase di exploracion," Prome Minister a anuncia na pueblo henter durante un conferencia di prensa cu a tuma luga den sala di Conseho di Minister di Aruba den edificio Cocolishi anexo na Bestuurskantoor. E noticia importante aki ta uno sumamente positivo pa Pais Aruba, specialmente mirando e interes halto cu e consorcio tin pa sigui exploracion di gas den awanan teritorial di Aruba. E fase aki ta sigui cu boramento di prueba den subsuelo den awanan teritorial di Aruba.

Prome Minister Eman a haci e anuncio aki hunto cu so coleganan minister Mike de Meza, Benny Sevinger, Angel Bermudez, Arthur Dowers, Paul Croes, y Armando Curet, director di Compania Arubano di Petroleo (CAP), Willy Hernandez, General Manager di Exploracion y Produccion di REPSOL y consehero principal di Ministerio di Economia, Comunicacion, Energia y Medio ambiente Richard Arends.

Despues di a lesa e carta ricibi pa e consorcio ecarga cu exploracion den awanan teritorial di Aruba na prensa, caminda e companianan ta duna Aruba di conoce cu nan ta sigui cu e proceso di exploracion, Prome Minister a splica cu, "esaki ta un inversion gigantesco cu companianan no ta haci si nan no tin e confiansa cu e indicacionnan cu nan a haya di locual por tin den sub-suelonan di Aruba ta interesante pa nan sigui traha riba dje."

Willy Hernandez, General Manager encarga cu Exploracion y Produccion di REPSOL, a splica cu te cu e costo te cu awo (incluyendo e dos prome fasenan) ta yega un total di 56 miyon dollar Americano. E costo di siguiente fase, Hernandez ta splica, ta depende hopi di e profundidad di e luganan cu nan scoge pa haci e pruebanan, pero e ta calcula un minimo di 50 pa 60 miyon di dollar Americano. Tur esaki, Aruba no tin gasto cu ne, segun e contracto cu a keda firma algun aña atras. E costo y risico di e exploracion ta bay totalmente pa cuenta di e consorcio.

Na cuminsamento di aña 2013 REPSOL a cuminsa cu exploracion den awanan di Aruba y tabata tin hopi incertidumbre riba e posibilidadnan cu por tin gas. E prome fase a cuminsa caminda REPSOL cuminsa a sondia sub-suelonan di Aruba pa mas informacion riba presencia di hidro-carburonan. Esaki a wordo haci cu un barco cu ekiponan specialisa pa haci sondenan 2D. E informacion adkiri den e prome fase aki a determina cu ta sigui cu e di dos fase.

Despues di a procesa e informacion, na final di 2014, REPSOL a dicidi cu ta sigui pa e di dos fase y a drenta den un consorcio hunto cu British Gas di Inglatera y Total di Francia pa por completa e di dos fase. Durante e fase aki a haci uzo di scannernan, mucho mas sofistica y costoso, di tipo 3D pa explora sub-suelonan di Aruba. E fase aki a tuma mas o menos 3 luna di trabounan intensivo 24 ora pa dia y 7 dia pa siman. Na final di e 3 lunanan a tuma casi un aña pa procesa e cantidad gigantesco di informacion adkiri.

E fin di siman cu pasa, ehecutivonan di REPSOL a informa gobierno di Aruba cu, mirando e informacion cu nan a adkiri di e prome dos fasenan, nan ta sigur di e hecho cu nan mester sigui pa e siguiente fase cu ta algun 'proefboring' den un area panort di Aruba. E area, cu ta parti den 4 pida, ta cuminsa na frontera di awanan teritorial di Aruba y Venezuela banda pabou te na frontera di awanan teritorial entre Aruba y Corsou.

Rond mundo, e mesun consorcio aki y otronan, ta haci e mesun tipo di exploracionnan aki cu a tuma luga na Aruba. Mirando cu e prijs di gas no ta mucho bentahoso e ultimo añanan, hopi di e otro areanan a scoge pa no sigui cu exploracion. Mirando cu e ta costa hopi, expertonan ta mustra cu e companianan awendia mester ta hopi sigur di loke nan ta haci ora nan scoge pa inverti den sigui un operacion manera ta tumando luga na Aruba.

Aunke cu e anuncio no ta significa cu na Aruba tin gas of petroleo, e hecho cu a scoge pa sigui ta duna hopi optimismo pa loke ta na caminda, Prome Minister e splica. 

Expresionnan haci den e articulo aki no necesariamente ta refleha opinion di ArenaPoliti.co