{idkey=1806b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4604-parlamentario-mr-xiomara-maduro-mep-minister-eman-a-destrui-nos-pais-riba-diferente-frontera-parti-1%3FItemid%3D101][title=Parlamentario+mr.+Xiomara+Maduro+%28MEP%29%3A+Minister+Eman+a+destrui+nos+Pais+riba+diferente+frontera+%28parti+1%29][desc=+Durante+tratamento+di+Presupuesto+2017+nos+a+dedica+tempo+na+ilustra+kiko+te+awor+aki+ta+e+saldo+di+e+mal+maneho+di+Minister+Eman+y+su+bende.+Aruba+na+man+di+Gabinete+Eman+ya+no+ta+mescos+mas.+Minister+Eman+a+destrui+nos+Pais+riba+diferente+frontera.+Nos+autonomia%2C+nos+florin%2C+nos+naturalesa%2C+nos+identidad+y+nos+trankilidad%2C+tur+a+wordo+destrui+na+man+di+Eman+y+den+un+serie+di+4+articulo+nos+lo+amplia+riba+e+destruccion+haci.+Den+e+articulo+aki+nos+ta+amplia+riba+e+destruccion+di+nos+auton]}
Durante tratamento di Presupuesto 2017 nos a dedica tempo na ilustra kiko te awor aki ta e saldo di e mal maneho di Minister Eman y su bende. Aruba na man di Gabinete Eman ya no ta mescos mas. Minister Eman a destrui nos Pais riba diferente frontera. Nos autonomia, nos florin, nos naturalesa, nos identidad y nos trankilidad, tur a wordo destrui na man di Eman y den un serie di 4 articulo nos lo amplia riba e destruccion haci. Den e articulo aki nos ta amplia riba e destruccion di nos autonomia, nos florin y nos naturalesa.

A destrui nos autonomia 
E lucha cu a wordo hiba pa awe nos por ta autonomo den Reino, na man di Minister Eman poco poco ta wordo destrui. Ya caba nos Pueblo a pasa berguensa na man di un welga di hamber di Minister Eman. Un spectakel cu a bergonsa nos Pais, djies pa Minister Eman purba tapa e hecho cu e mes ta esun cu su mal maneho a entrega e alma financiero di e Pais aki pa bay bou supervicion financiero di Hulanda via CFT. Y ainda falta mas, pronto nos lo mira cu Husticia tambe lo conoce KB y supervicion. Na man di Eman criminalidad a bay for di man, ya cu hasta Ministernan di Gabinete Eman ta susha nan man cu criminalidad. 

A destrui nos florin 
Den un solo periodo di gobernacion, Minister Eman a crea un MEGADEBE riba cabes di nos Pueblo. Na unda cu na 2009 ainda di cada florin, 46 cent tabata bay pa paga debe, awe na man di Eman di cada florin 83 cent ta bay pa paga debe. Siendo cu ora cu bo pasa e situacion na unda cu di cada florin, 60 cent ta bay a paga den, bo ta stanca bo economia y bo Pais ta bay atras. Ta aki ta na unda Minister Eman a hiba nos. Un economia cu ta den min pa 2015 y nul komma nul di crecemento economico pa 2016. Minister Eman a haci nos catibo di un MEGADEBE cu ta pone nos florin perde su balor. 

A destrui nos naturalesa
Tanto cu Gabinete Eman ta bisa cu nan ta un gobierno berde y pro sostenibilidad, tanto cu Minister Eman a biaha rond di mundo gastando nos placa pa gaña cu Aruba ta modelo pa mundo, na Aruba ela laga nos naturalesa wordo destrui. Su colega Minister Sevinger a destrui naturalesa na Bubali Plas, a laga traha cas den groengebied, a kibra mangel pa traha Green Corridor y proximamente ta cambia e ley di zonificacion, ROP, pa e por sigi destrui Isla di Oro y haci Urirama posibel cu tur consecuencia cu esaki ta trece cune pa e vecindario. Pa no papia mes di e desaster na dump. Un proyecto cu Eman y su bende a sabotia, djies pasobra ela priminti otro e proyecto. Pero den 7 aña di plania, nada, pero net nada a wordo haci pa esnan biba den e vecindario di e dump. Salud di mucha y adulto ta afecta. Y ainda Minister Eman kier gaba mundo cu aki na Aruba nos tin progreso? Esey ta hypocresia y ta mustra cu Minister Eman no tin ni un tiki berguensa. Ni sikiera a percura pa e Ley pa proteha e medio ambiente bira realidad, pero basta cu ela laga nos naturalesa wordo destrui.

Pueblo mester rechasa e destruccion aki
Nos no por sigi asina. Pueblo mester rechasa e destruccion cu Minister Eman y su bende a haci na nos Pais. No cay pa promesa falso, e realidad di su destruccion na nos Pais ta bisto y e ta den nos man pa para e destruccion aki di nos dushi Aruba.


23 november 2016

Expresionnan haci den e articulo aki no necesariamente ta refleha opinion di ArenaPoliti.co