{idkey=5965b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4657-booshi-wever-upp-mientras-cu-gobierno-y-parlamento-a-laga-serlimar-sangra-muri-awor-ta-pasa-dump-pa-ecotech-populismo-y-neo-liberalismo-den-ana-di-campana%3FItemid%3D101][title=Booshi+Wever+%28UPP%29%3A+Mientras+cu+gobierno+y+parlamento+a+laga+Serlimar+sangra+muri%2C+awor+ta+pasa+dump+pa+Ecotech%3F+Populismo+y+neo-liberalismo+den+a%C3%B1a+di+campa%C3%B1a][desc=+Na+maart+di+e+a%C3%B1a+aki+UPP+a+denuncia+cu+e+hecho+cu+ta+e+propio+trucknan+di+Serlimar%2C+bou+instruccion+di+e+director+di+Serlimar+di+e+tempo+ey+hunto+cu+e+minister+responsabel%2C+tabata+tira+sushi+den+candela%2C+pa+di+e+manera+ey+tene+e+candela+sendi.+Lider+di+UPP%2C+Booshi+Wever+a+mustra+esaki+via+di+su+Facebook+cu+potretnan+cu+e+mes+a+saca.+Mientras+cu+e+tempo+ey+kier+a+laga+pueblo+kere+cu+ta+%E2%80%9Cotro+hende%E2%80%9D+ta+pega+sushi+na+candela.%26amp%3Bnbsp%3BLuna+pasa%2C+durante+e+calmazon+cu+tabata+tin%2C+sigur+e+cande]}

Na maart di e aña aki UPP a denuncia cu e hecho cu ta e propio trucknan di Serlimar, bou instruccion di e director di Serlimar di e tempo ey hunto cu e minister responsabel, tabata tira sushi den candela, pa di e manera ey tene e candela sendi. Lider di UPP, Booshi Wever a mustra esaki via di su Facebook cu potretnan cu e mes a saca. Mientras cu e tempo ey kier a laga pueblo kere cu ta “otro hende” ta pega sushi na candela. 

Luna pasa, durante e calmazon cu tabata tin, sigur e candela aki tabata tin efecto riba no solamente e bario di Parkietenbos, sino riba henter Aruba. Pa varios dia, ora e biento a cambia tur hende na Aruba por a sinti e efecto. 

Cu razon e bario di Parkietenbos, mas cu tur, a reacciona y a laga sa cu mester bin un solucion p’esaki. Nos por a scucha durante di tratamento di presupuesto un bay y bin di discusion, unda cu a tilda ex-minister Wever di e debacle aki, pero sin menciona cu ya caba ta pa 7 aña un otro gobierno ta manda y cu nada no a wordo haci. Nos por a mira tambe con parlamentario di e partido berde tabata yora den parlamento y riba facebook cu e tin reunion tocante Serlimar y dump di Parkietenbos pidi, pero esaki no a wordo yama ainda. 

Entretanto nos por mira, den cuadro di aña electoral, cu tanto gobierno awor ta bin cu yen di promesa, y cu parlamentarionan di tanto gobierno como di oposicion ta haci pronunciacionnan populista pa asina calma e pueblo di Parkietenbos. UPP ta kere cu mester bin un solucion pa e problema di dump, cu ta molestia e bario atrobe y cu tambe ta nifica un menaza pa nos medio ambiente. E proyecto di dump, esta e planta di procesamento di sushi, concientemente y deliberadamente a wordo boycotea.

Nos a bin ta destila caba for di algun tempo cu loke parlamentarionan cu ta sostene gobierno ta bisa ta cu lo mester haci un test pa mira e situacion di dump, pa despues tuma un decision di cierre di esaki. Esaki tambe ta loke awor ta bin ta pasando y na unda cu intencion ta pa sera dump y pasa e trabou di recohemento di sushi pa Ecotech. Informacion cu UPP ta dispone di dje ta bisa cu esaki lo sosode na un manera orkestra, pa asina mustra cu Serlimar ta bira obsoleto y cu pesey lo no por sigui cu e tipo di dump aki. Gobierno a haya 8 aña, incluso pa boycotea e proyecto di dump y bini cu algo otro, pero no a haci nada ni pa alivia e situacion riba dump pa loke ta trahadornan, ni pa loke ta molester y peliger pa nos ciudadanonan cu ta biba den area.

Awor gobierno kier laba man y pasa esaki pa Ecotech, cu no ta un filantropo, pero un comerciante.

Incluso nos tin comprendi cu nan lo kier cobra pa e sushi cu ta bay wordo deposita na Ecotech pa traha gas pa WEB. UPP ta kere, cu si esaki mester ta un solucion mes, anto Ecotech mester paga Serlimar pa esaki, pa asina por sigui cu un maneho pa drecha e situacion di dump. Cu otro palabra, despues di a paga pa e desperdicio cu nos mes ta produci (nos no ta haya esakinan regalo, nan ta den prijs hinca di loke nos ta cumpra), nos tin cu paga pa recohe sushi, Serlimar ta hiba esaki na Ecotech pa EcoGas y nan kier pa paga pesaki. EcoGas despues ta manda e gas aki WEB N.V., cu tin di paga EcoGas. Y e pueblo atrobe mester paga pa por haya coriente y awa cu e gas aki bay produci. Esaki ta e negoshi redondo, of rondo, cu esnan cu ta “putri te den nan higra” ta hunga riba custiya di nos pueblo.

UPP ta na fabor di un solucion serio y duradero cu ta bay sam sam cu bienestar di e pueblo di Parkietenbos, nos medio ambiente, nos pueblo en general y di e compania Serlimar. Pero laga esaki “bloed dood” y cu despues lo por tin mas concecuencia pa nos pueblo, no ta e solucion. Y UPP ta convenci cu loke ta wordo haci na e momentonan aki, esta tur e maniobra y patrañanan, ta pa caba cu Serlimar y su trahadornan. Y pueblo di Aruba ta esun cu lo bay sufri di esaki, djis pa por complace esnan cu nan unico afan ta pa gana placa. Aruba Quo Vadis?


1 di december 2016

Booshi Wever
Lider UPP
Brazil 163

Expresionnan haci den e articulo aki no necesariamente ta refleha opinion di ArenaPoliti.co