{idkey=7141b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F466-xiomara-ruiz-maduro-vice-presidente-di-raad-van-state-no-ta-duna-opinion-riba-e-crisis-politico-cu-a-surgi-na-2014%3FItemid%3D101][title=Xiomara+Ruiz-Maduro%3A+Vice+Presidente+di+Raad+van+State+no+ta+duna+opinion+riba+e+crisis+politico+cu+a+surgi+na+2014][desc=Na+juli+2014+na+momento+cu+Gobernador+no+a+firma+e+presupuesto+di+2014+a+surgi+un+crisis+constitucional+entre+Aruba+y+Hulanda+y+aki+ta+na+unda+cu+Parlamento+di+Aruba+a+reuni+pa+bin+cu+tres+mocion+den+cual+nan+ta+condena+e+actuacion+di+Gobernador%2C+ta+exigi+pa+e+presupuesto+wordo+firma+y+ta+pidi+pa+Conseho+di+Ministernan+di+Reino+hala+e+KB+di+11+juli+2014+aden.+Den+un+intento+pa+yuda+scapa+e+cara+politico+di+Minister+Eman+den+tur+e+disputa+aki+nos+por+observa+cu+Presidente+di+Parlamento+ya+for+di+]}Na juli 2014 na momento cu Gobernador no a firma e presupuesto di 2014 a surgi un crisis constitucional entre Aruba y Hulanda y aki ta na unda cu Parlamento di Aruba a reuni pa bin cu tres mocion den cual nan ta condena e actuacion di Gobernador, ta exigi pa e presupuesto wordo firma y ta pidi pa Conseho di Ministernan di Reino hala e KB di 11 juli 2014 aden. Den un intento pa yuda scapa e cara politico di Minister Eman den tur e disputa aki nos por observa cu Presidente di Parlamento ya for di dia 28 di augustus 2014 a manda e tres mocionnan aki pa conocemento di sr Donner kende ta e Vice-Presidente di Raad van State na Hulanda cu e intencion pa e organo halto di conseho Hulandes aki por duna un opinion riba e crisis cu a surgi. Pero den su carta di 3 di December 2014, e Vice-Presidente di Raad van State a informa Presidente di Parlamento cu e Raad no ta bay duna un opinion riba e crisis politico cu a surgi na 2014, ya cu ta trata aki di un asunto di politica y gobernacion cu e Raad na e momento aki no ta yama pa duna un opinion riba dje.

Segun sr Donner, Raad van State na e momento aki no ta yama pa duna un opinion riba e asunto di politica y gobernacion aki, pero si ta constata cu ta un problema serio ta locual a hiba na diferencia di opinion cu ta e origin di e crisis. E problema ta asina serio cu Aruba riba su mes no lo soluciona esaki facilmente y pesey ta den Reino lo mester busca un solucion y Statuut ta brinda tur espacio pa esaki. Pues cu otro palabra, sr Donner ta bisa Presidente di Parlamento na un manera masha fini cu Aruba tin un problema serio cu su finanzas publico y Gabinete Eman mes no kier of por resolve esaki. E unico solucion cu nan ta mira ta pa Gabinete Eman bay bou di supervicion financiero y Statuut ta brinda tur espacio pa esaki den un ley di Reino. For di e contesta aki di Sr Donner ta bira bisto tambe cu e pensamento cu lo ta reina na Raad van State ta, cu Gobernador no a actua robes den e intervencion di Hulanda na juli 2014 ya cu esaki tabata necesario. Pesey e strategia di e Fraccion di AVP pa “lok uit” un opinion di Raad van State contra Gobernador no a resulta.

Remarcabel ta cu e carta di Sr Donner a yega dia 5 di januari 2015 na Parlamento di Aruba, pero te dia 15 di januari 2015 e parlamentarionan a haye pa mira. Algo stranio ya cu e ta toca un tema di agenda cu a wordo trata den e reunion di IPKO. Ta bisto cu via IPKO tambe e Fraccion di AVP a purba pa yega na un condena di e actuacion di Gobernador, pero esaki no a logra ni sikiera door di tene e carta di sr Donner scondi. IPKO mescos cu Raad van State, no a duna un opinion riba e crisis politico cu a surgi na 2014 y di e manera aki ni Fraccion di AVP y ni Presidente di Parlamento por scapa e cara politico di Minister Eman.

19 januari 2015

Expresionnan haci den e articulo aki no necesariamente ta refleha opinion di ArenaPoliti.co