{idkey=4668b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5477-booshi-wever-upp-campana-a-cuminsa-y-e-parttime-minister-di-salubridad-y-deporte-ta-duna-senal-di-bida-atrobe%3FItemid%3D101][title=Booshi+Wever+%28UPP%29%3A+Campa%C3%B1a+a+cuminsa+y+e+%28parttime%29+minister+di+salubridad+y+deporte+ta+duna+se%C3%B1al+di+bida+atrobe][desc=Nos+por+corda+ainda+con+4+a%C3%B1a+pasa+candidato+Schwengle+a+start+su+campa%C3%B1a+cu+masha+fanfaria%2C+remplazando+Visser+cu+a+cay+den+desgracia+pa+motibo+di+a+hiba+un+maneho+completamente+for+di+sla%2C+cu+ni+su+propio+partido+y+ni+su+miyones+por+a+scapa+su+peyeho.+%26amp%3Bnbsp%3BMike+Eman+a+pensa+cu+escohencia+di+Schwengle+elo+por+a+logra+deshaci+di+Visser+definitivamente%2C+reduci+e+influencia+den+e+bario+di+Savaneta+di+un+partido+opositor+y+finalmente+haya+un+profesional+medico+cu+si+por+dise%C3%B1a+un+rumbo+nobo+pa+]}
Nos por corda ainda con 4 aña pasa candidato Schwengle a start su campaña cu masha fanfaria, remplazando Visser cu a cay den desgracia pa motibo di a hiba un maneho completamente for di sla, cu ni su propio partido y ni su miyones por a scapa su peyeho.  Mike Eman a pensa cu escohencia di Schwengle elo por a logra deshaci di Visser definitivamente, reduci e influencia den e bario di Savaneta di un partido opositor y finalmente haya un profesional medico cu si por diseña un rumbo nobo pa cuido medico cu a cay den decadencia total bou di maneho di Visser. Y manera Schwengle mes a declara na varios ocacion cu Visser no ta sirbi pa nada. 

UPP mester constata cu durante e ultimo 8 aña nada  a wordo haci pa e barionan Pariba di Brug. Principalmente pa e ciudad SanNicolas, cu a hiba Aruba na su progreso economico cu binimento di Lago. E gobierno anterior a hiba un maneho concreto na unda a percura pa reapertura di e refinería y tambe a inverti den cuido medico cu construccion di ImSan. E intencion tabata ta pa ImSan bira un hoya, tanto pa pa Aruba como tambe pa e regio cu un cuido avansa cardio-vascular, dialisis, cuido diabetico, emergencia etc.etc.. A yega hasta na un areglo cu e mandatario di Salubridad di Corsou pa un intercambio di patient. Aruba lo a haya e privilegio di profesionalisa e cuido cardio-vascular mientras Corsou lo a inverti den e cuido di cancer cu entre otro radioterapia. 

Mi persona encarga cu e maneho di salubridad no tabata tin mester di ningun fanfaria door di organisa un asina yama conferencia medico entre e partnernan den Reino ni tampoco di IPKO pa mustra cu un relacion estrecho entre e islanan lo mester a bira e fundeshi pa mehora e cuido medico avansa riba e islanan. Nos tur tabata consciente si, cu e desaroyo importante y necesario aki mester a tuma lugar di un forma prudente y financieramente responsabel.

E desaroyo di e cuido medico na San Nicolas y palabracion cu mandatarionan di nos hermana isla Corsou a wordo malamente interumpi y boycotea despues di e eleccion na 2009. Visser a haya ta bon pa stop tur desaroyo na ImSan y cuminsa un relacion cu Baptist Hospital di Miami pa supuestamente introduci radioterapia. E aparatonan pa e cuido cardio-vascular a desaparece y patient a sigui wordo manda Colombia loke a resulta den un aumento dramatico di gasto pa AZV di 22 miyon florin.

AVP a core cu Visser y a introduci Schwengle. E “logronan” di Schwengle ta pio cu loke Visser a presta. Deporte a deteriora bou di su maneho pa e simpel motibo cu e nunca a participa den maneho di deporte na Aruba, pues no sa kico ta come y bebe riba e tereno aki y mas importante ainda e no tabata interesa tampoco kico ta pasa cu deporte. Tambe riba e tereno di nos grandinan, el a percura pa corta riba e presupuesto pa e casnan di nos grandinan, mientras awor si e ta partiendo bolo.

E mesun postura ela tuma pa cu Salubridad. Ela cuminsa pa kita e oportunidad pa un yui di tera traha como longarts na Aruba door di cuminsa traha su mes parttime como longarts. E specialista Arubiano a wordo ricibi cu man habri na Corsou.

E minister cu ta un longarts no a sali na vanguardia di esnan cu ta biba den e bario di Parkietenbos y cu ta sufri tur santo dia pa motibo di e huma di e dump. E minister a bin despues di 4 aña cu e Inspectie di Salubridad y a nombra un compinchi cu no sa nada di salubridad como Inspector. Mescos a sosode na e departamento di Salubridad, cu nombracion di otro compinchi. ImSan a bin, desde nombracion di un director medico nobo, ta gaba cu pronto lo start cu radioterapia bou guia di Baptist, pero ta lubida di  menciona cu pa 8 largo aña nada  a sosode na ImSan cu ya caba mi persona a introduci den pasado y cu ainda ta paga Baptist un suma pa ta simplemente presente na Aruba sin haci nada. Ta cuanto miyones a ser hinca den saco di e doñonan di Baptist??

Nos por corda tambe cu e minister den diferente ocacion a duna su palabra na Parlamento cu lo bin cu un investigacion riba e salanan di operacion. Tambe cu boca grandi e declara cu lo por haña tur documentacion encuanto e "vernieuwbouw" di e HOH. Ora UPP a haci un peticion, sr. Hodgson di  SOGA ni sikiera tabata tin e gentilesa di contesta esaki.

Aruba no por permiti e fracaso riba tereno medico ni di deporte sigui tuma lugar. Transparencia, responsabilacion di un maneho y un vision respecto e cuido medico y di deporte nunca tabata prioridad di e gobierno aki.  Den pasado Raad van Advies entre otro a haci mencion di falta di un maneho concreto di e minister encarga cu Salubridad. En bez di a inverti den mehoracion di nos cuido medico a cremencha tanto riba e terenonan aki como tambe riba e prioridad pa reduci criminalidad. A prefera si di inverti na mehora e posicion financiero di esnan cu a apoya y ta sigui apoya AVP den nan campaña en grandi, pero tambe sigui yena nan saco cu placa di pueblo.


Lider di UPP
C.A.S.D. Wever
20 april 2017

Expresionnan haci den e articulo aki no necesariamente ta refleha opinion di ArenaPoliti.co