{idkey=1768b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F614-rene-herde-avp-unda-oposicion-tabata%3FItemid%3D101][title=Rene+Herd%C3%A9+%28AVP%29%3A+Unda+oposicion+tabata%3F][desc=E+discucion+politico+di+ultimo+conco+a%C3%B1a+a+concentra+riba+sanea+finansa+publico.+Oposicion%2C+en+especial+e+partido+MEP%2C+ta+papia+y+critica+solamente+finansa+publico%21+Nan+no+kier+a+kita+ni+rduci+e+BBO.+Nan+tabata+contra+pa+yuda+esnan+cu+entradanan+mas+abou+cu+e+%26quot%3Breparatietoeslag%26quot%3B%2C+e+ayudo+pa+mamanan+soltera%2C+e+hendenan+cu+ta+haya+un+onderstand%2C+e+pensionadonan+cu+tin+e+pensioen+di+behez+como+unico+entrada.+%26amp%3Bnbsp%3BOposicion%2C+MEP+y+PDR%2C+tabata+contra+di+e+inversionnan+grandi+cu+gobierno+di+AVP+a+hac]}
E discucion politico di ultimo conco aña a concentra riba sanea finansa publico. Oposicion, en especial e partido MEP, ta papia y critica solamente finansa publico! Nan no kier a kita ni rduci e BBO. Nan tabata contra pa yuda esnan cu entradanan mas abou cu e "reparatietoeslag", e ayudo pa mamanan soltera, e hendenan cu ta haya un onderstand, e pensionadonan cu tin e pensioen di behez como unico entrada.  Oposicion, MEP y PDR, tabata contra di e inversionnan grandi cu gobierno di AVP a haci den sector social y den infrastructura haciendo uso di fondonan publico. Literalmente, bez tras bez oposicion a yama esaki GASTAMENTO DI PLACA! Nan tabata y ta contra di e maneho cu a saca nos pais for di e pio crisis financiero y economico. Y niun momento nan tabata tin atencion pa e consecuencianan social y laboral di e crisis.

E MANEHO CU MEP/PDR KIER
MEP ni PDR a yega di presenta niun plan, idea of proposicion pa yuda saca nos pais di e crisis economico, financiero y social. Den campaña pa eleccion 2013 MEP a bisa cu ta ora nan drenta gobierno nan lo instala un comision di experto pa bay studia posibilidadnan di un maneho nobo! Imaginabo: grita y critica tur dia, pero nan mes no tin niun idea. Nan kier pa pueblo scohe nan prome sin sa kico ta bin pa pueblo, pa despues nan laga hende bay studia pa bisa nan kico pa haci! PDR no a yega mas leu cu propone algun "niche" pa yuda crea mas entrada. Bunita idea. Niun plan. Niun accion!

E maneho cu mientrastanto si nos sa cu MEP/PDR kier ta un maneho di CORTA GASTO PISA, KITA HENDE DI TRABOU sin crea otro trabou pa nan, y HISA ENTRADA PISA CU MEDIDANAN PISA. E mes un maneho cu CFT ta propone y cu a faya na Hulanda, Corsow y Sint Maarten!  Tur hende por djies bay wak e resultadonan di e maneho ey y puntra si nos kier esey na Aruba. Nan ta busca forma pa sanea finansa publico so, sin wak con ta pone economia crece, sin wak con ta cre trabou, sin wak con ta yuda esnan den mas necesidad, sin wak con ta sigui desaroya nos pais y bay dilanti.

ALTERNATIVA?
Durante di henter e trayecto di ocho aña di e crisis, tur esnan cu ta para na banda y critica so, tanto aki na Aruba como den exterior, no a presenta niun alternativa di maneho cu por a duna e mes un resultado pa recupera nos economia, crea trabou, crea entrada, mantene of mehora forsa di compra y sin hiba nos pais den un abismo social manera bo ta wak den otro paisnan. Opositornan a grita di debe grandi, pero no kier reconoce cu AVP a usa placa di pueblo directamente pa yuda pais y pueblo. IMF si ta mustra riba e resultadonan concreto aki. Kico a keda esnan cu ta critica? Awor nan ta bisa cu ainda nos no ta cla. Nos contesta ta: sigur cu nos no ta cla. Ainda falta. Ta nos mes a bisa cu ainda falta! Pero e caminda cu nos a scohe a duna resultado. Nos ta riba e bon caminda! Pero unda oposicion a keda? Di berdad Aruba merece un miho oposicion!

Expresionnan haci den e articulo aki no necesariamente ta refleha opinion di ArenaPoliti.co