{idkey=7879b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F658-rene-herde-avp-mira-ken-kier-papia-di-economia-mira-ken-kier-papia-di-pobresa-desempleo-y-abuso-di-poder-y-di-pueblo%3FItemid%3D101][title=Rene+Herd%C3%A9+%28AVP%29%3A+Mira+ken+kier+papia+di+economia.+Mira+ken+kier+papia+di+pobresa%2C+desempleo+y+abuso+di+poder+y+di+pueblo%21][desc=Integrantenan+di+MEP+a+cuminsa+papia+di+economia.+Kico%3F+Si%21+Di+economia%21+Anto+con.+Nan+ta+mas+sabi+cu+Banco+Central+y+IMF.+Nan+ta+prognostic+cu+economia+ta+bay+stanca.+Cu+crecemento+a+para.+Cu+e+maneho+di+stimula+economia+di+gabinete+Mike+Eman+1+y+2+no+a+funciona.+Falta+pa+nan+bisa+cu+IMF+y+Banco+Central+ta+ga%C3%B1a.+E+profetanan+di+desgracia+aki+en+berdad+a+perde+tur+sentido+di+berguensa+y+realidad.+Pasobra+tur+preuba+di+raportnan+responsabel+manera+di+Banco+Central+y+di+IMF+ta+%26amp%3Bnbsp%3Bbisa+net+lo+c]}
Integrantenan di MEP a cuminsa papia di economia. Kico? Si! Di economia! Anto con. Nan ta mas sabi cu Banco Central y IMF. Nan ta prognostic cu economia ta bay stanca. Cu crecemento a para. Cu e maneho di stimula economia di gabinete Mike Eman 1 y 2 no a funciona. Falta pa nan bisa cu IMF y Banco Central ta gaña. E profetanan di desgracia aki en berdad a perde tur sentido di berguensa y realidad. Pasobra tur preuba di raportnan responsabel manera di Banco Central y di IMF ta  bisa net lo contrario! Esta cu nos economia a crece desde cu MEP a sali di gobierno. Nos economia a crece hasta apesar di e dobbel crisis cu MEP a bay laga nos pais aden. E rasonamento y arogancia di kere cu nan sa miho, ta mescos cu e otro miembro di MEP cu ta sigui orden di su tata y ta sigui insisti cu turismo ta bay malo na Aruba. Ni cuanto preuba di tur profesional y tur organisacion nacional y internacional cu presen'e cun'e, e miembro di MEP aki ta insisti cu e si sa miho! Shelo libra nos pais di hende asina. Nos a waki caba ki maldad nan a haci nos pais den pasado caba!

MIRA KEN TA PAPIA
Pio ainda ta cu e mes un miembronan di MEP kier papia di pobresa, abuso di poder, abuso di placa di pueblo y di corupcion. Si nan tabata tin un tiki berguensa nan lo a wak den spiel y wak kico e partido MEP a haci cu nos pais cada biaha cu e drenta gobierno. No ta por nada cu MEP a haya e fama di partido di corupcion, abuso di poder, friends and family, nepotismo y hopi mas. No ta por nada cu expertonan cu experiencia di traha cu gobierno di MEP mes ta bisa cu MEP no ta di confia y cu MEP a laga nos pais den un estado di decadencia y di abandono (= "verloedering") na 2009. E desempleo mas halto cu nos pais a conoce a sosode bou di gobiernonan di MEP: 1985: 15%y 2009:11%. Anto MEP kier papia di desempleo awor cu e ta bahando? MEP kier papia di pobresa? Bay puntra e famianan cu a sufri bou di gobiernonan di MEP. Si no tabata pa mal maneho cu a laga nan sin trabou y sin entrada, e tabata pa PERSECUCION POLITICO!

MEP kier papia di abuso di poder awor aki, pero no por present niun preuba. Si nan por tabata tin un memoria un tiki mas activo, nan lo a corda e raport di WODC cu a duna un descripcion basta bon di gobernacion di MEP y e decadencia legal, moral y civico cu a tuma lugar den gobiernonan di MEP.

MEP kier papia di abuso di pueblo? Nos kier pa nan refresca nan memoria cu e raport di WODC y e sin fin di publicacionnan den prensa local y internacional riba abusonan di MEP. E enrekisimento di un solo famia cu mas cu 25 miyon florin di pueblo den gobernacion di MEP ta bisa suficiente! Anto esey no tabata tur!!! Tur esey a sosode mientras mas y mas hende tabata perde nan trabou y costo di bida tabata subi cu mas cu 25%. Costo di coriente a bay ski-high cu 250%. Ta pesey gobierno di AVP a cambia e maneho y presenta na pueblo un maneho di energia sostenibel cu lo tene tanto e suministro di coriente como e prijs di coriente stabiel. E problemanan actual di WEB mientras cu e prijs di petrolio a baha, ta otro preuba cu e maneho di energia sostenibel di AVP enbez di petroleo ta miho.

Di berda Aruba merece un miho oposicion! Pasobra loke MEP ta haci awor aki ta simpelmente comproba cu nan a haya e fama di CORUPCION, ABUSO DI PODER Y ENREKESIMIENTO DI AMIGO Y FAMIA bon mereci.

Expresionnan haci den e articulo aki no necesariamente ta refleha opinion di ArenaPoliti.co