{idkey=9801b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F661-mep-baba-herde-te-ainda-no-kier-comprende-cu-ta-su-lider-mike-eman-a-desgracia-y-mata-e-futuro-di-e-pais-aki%3FItemid%3D101][title=MEP%3A+Baba+Herde+te+ainda+no+kier+comprende+cu+ta+su+lider+Mike+Eman+a+desgracia+y+mata+e+futuro+di+e+pais+aki][desc=E+yiu+di+mas+chikito+ta+mata+su+mama%21%26amp%3Bnbsp%3B%E2%80%9CE+yiu+di+mas+chikito+ta+mata+su+mama%E2%80%9D+ta+un+dicho+na+Papiamento+cu+ta+aplicabel+pa+e+lider+di+AVP+Mike+Eman%2C+ya+cu+como+e+yiu+di+mas+chikito+di+famia+Eman+el+a+percura+pa+mata+e+futuro+di+henter+pais+Aruba.+Sinembargo+lamentablemente+te+ainda+tin+politiconan+den+AVP+manera+e+lider+di+fraccion+Baba+Herde+kende+no+kier+comprende+e+enbergadura+di+e+destruccion+y+desaster+financiero+cu+su+lider+Mike+Eman+a+comete+contra+nos+pueblo.+Den+tur+e+tantisimo+]}
E yiu di mas chikito ta mata su mama! 

“E yiu di mas chikito ta mata su mama” ta un dicho na Papiamento cu ta aplicabel pa e lider di AVP Mike Eman, ya cu como e yiu di mas chikito di famia Eman el a percura pa mata e futuro di henter pais Aruba. Sinembargo lamentablemente te ainda tin politiconan den AVP manera e lider di fraccion Baba Herde kende no kier comprende e enbergadura di e destruccion y desaster financiero cu su lider Mike Eman a comete contra nos pueblo. Den tur e tantisimo comunicadonan di desesperacion di Baba Herde den e ultimo dianan aki su persona ta keda insisti riba e supuesto elogio cu IMF lo a duna Gabinete Eman pa loke ta e crecemento economico durante e ultimo añanan. Por cierto un crecemento economico ficticio cu a ser fomenta grandemente door di e fiansanan biyonario cu Gabinete Eman a haci y pa cual na 2015 so mester paga 203 miyon florin na interes.

Deficit y debenan
Hecho ta cu den ningun di su comunicadonan Baba Herde a papia di e deficitnan monstruoso cu a ser aumenta durante e ultimo 5 añanan, esta for di 163 miyon na 2009 te cu 443 miyon na 2014. Tambe Baba Herde den su terkedad no kier admiti cu ta bao di su gobierno nos debenan nacional a ser aumenta for di 2.2 biyon na 2009 te na 4 biyon florin na 2014 y esaki sin conta e debenan di e proyectonan PPP di mas cu 2.4 biyon florin. Un aspecto cu Baba Herde constantemente ta trece padilanti ta cu ta danki na su gobierno di AVP a logra salba e fondonan di SVB (pensioen di biehes), APFA (pensioen di ambtenaarnan) y AZV (gastonan medico). Esaki siguramente ta un mentira flagrante, ya cu tur e 3 fondonan menciona a ser salba door di sacrificio di e propio participante/trahadonan.

Medidanan pa SVB
No tabata ningun arte y vision di Gabinete Eman pa bin cu e medida di aumenta e edad di pensioen di biehes di 60 te cu 65 aña y consecuentemente laga e pensionadonan mes durante 5 aña extra inyecta sumanan cuantioso den e fondonan di SVB. Por ehempel un pensionado soltero cu tin cu cobra 1050 florin na pensioen pa luna, durante 5 aña largo lo no cobra esaki y consecuentemente e ta inyecta 63 mil florin den e fondo di SVB. Y un pareha pensionado lo inyecta un suma total di 108 mil florin durante 5 aña largo. Alabes lo ta bon pa Baba Herde splica pueblo di con su gobierno di AVP na final di aña pasa a exonera pago di un debe di 57.6 miyon florin y esaki relaciona cu e primanan di AOV cu gobierno a haya y cu no a traspasa esakinan pa SVB. No mester lubida tambe cu Gabinete Eman a aumenta e prima di AOV na januari 2014 y januari 2015 y a individualisa e primanan cu e consecuencia cu e parehanan casa lo no bay haya nan restitucion di e prima di AOV mas. Tambe lo ta bon pa  Baba splica di con su gobierno entrante 2018 lo bay kita e miserabel Reparatietoeslag di e trahado y pensionadonan.

Medidanan pa APFA
E mesun ehercicionan describi mas ariba por ser aplica pa tur e ambtenaarnan kendenan - fuera di aumento di edad di pensioen te cu 65 aña, aplicacion di franchise, middelloonregeling y reduccion di nan duurtetoeslag di pensioen for di 36% te cu 17% - lo bay conoce tambe eliminacion di nan Bashi Premie y Gelijk Bedrag. E ambtenaarnan tambe lo perde di haya sumanan substancial durante 5 aña largo debi cu nan tin cu traha te cu 65 aña y tur e sumanan extra aki lo wordo inyecta den e fondonan di APFA. Lo ta bon pa Baba Herde haci un calculacion cuanto cien miyon florin tur e fondonan di SVB y APFA lo genera extra na entrada debi na e aumento di edad di pensioen te cu 65 aña.

Medidanan pa AZV
Pa loke ta e fondo di AZV, Gabinete Mike Eman – fuera di reduci drasticamente su contribucion/subsidio na AZV - a percura pa aumenta e prima di AZV na januari 2011 y e Health Tax (BBO) cu 1% na fin di aña pasa. Alavez ta pendiente pa introduci un contribucion propio pa  bishita Eerste Hulp, contribucion propio pa bishita Huisartsenpost y contribucion propio pa recetanan boticario. Y tur esaki mientras cu e patientnan tin cu warda lunanan largo pa haya un cita cu specialista y tambe nan ta hayando pa gran parti remedinan generico. Alabes Baba Herde no ta splica loke IMF a declara recientemente riba AZV: “Further measures are needed to ensure that the health care system (AZV) becomes self-financing”.

Pues mester conclui cu tur e gabamento di ultimo tempo di Baba Herde pa loke ta e supuesto rescate di e fondonan di SVB, APFA y AZV meramente ta basa riba sacrificionan extraordinario cu tur e participante y trahadornan mes mester haci pasobra nos tin un gobierno, Gabinete Mike Eman cu tur nan sabiduria no conoce nada otro cu implementa medida y mas medida riba lomba di pueblo. Finalmente ta e clase trahador lo keda cu cartera bashi debi na tur e medidanan impone door di Gabinete Mike Eman y pa cual Baba Herde ta sumamente orguyoso di dje.

Expresionnan haci den e articulo aki no necesariamente ta refleha opinion di ArenaPoliti.co