{idkey=8760b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F759-booshi-wever-upp-e-investigacion-den-e-proyecto-di-hoh-mester-ta-uno-imparcial%3FItemid%3D101][title=Booshi+Wever+%28UPP%29%3A+E+investigacion+den+e+proyecto+di+HOH+mester+ta+uno+imparcial%3F][desc=Despues+cu+Parlamento+a+bay+di+acuerdo+cu+mester+haci+un+investigacion+den+e+asunto+di+camber+di+operacion+den+HOH%2C+y+tambe+eymes+despues+cu+minister+Alex+S.+a+manda+tur+hende+di+su+despacho+cas%2C+a+cuminza+un+campa%C3%B1a+di+%26quot%3Bdamage-control%26quot%3B+di+parti+di+e+compania+di+PR+%28cu+un+contracto+fabuloso%29.+Ta+bon+pa+mustra+en+corto+toch+algun+acontecimento+cu+a+tuma+lugar%2C+y+cu+a+conduci+cu+despues+e.o.+UPP+a+mustra+riba+e+problema+entorno+e+OK+di+HOH.+%2A+Den+curso+di+a%C3%B1a+2010%2C+gobierno+a+haci+hopi+fanfaria+]}
Despues cu Parlamento a bay di acuerdo cu mester haci un investigacion den e asunto di camber di operacion den HOH, y tambe eymes despues cu minister Alex S. a manda tur hende di su despacho cas, a cuminza un campaña di "damage-control" di parti di e compania di PR (cu un contracto fabuloso).

Ta bon pa mustra en corto toch algun acontecimento cu a tuma lugar, y cu a conduci cu despues e.o. UPP a mustra riba e problema entorno e OK di HOH.

* Den curso di aña 2010, gobierno a haci hopi fanfaria cu e finalisacion di e trabownan di renobacion riba e OK, ICU/MCU y e Dialyse-centrum.
* Durante reunionnan sosteni entre HOH y Gobierno, HUNTO a yega na e conclusion cu e OK lo NO forma parti di e renobacion/expansion di HOH.
* Na final di 2012 y na comienso di 2013 HOH a laga traha dos rapport encuanto problemanan cronico cu a wordo constata na OK. E ultimo rapport a tuma lugar pa medio di minister Visser cu a haci un peticion pa Inspectie Nederland bin haci un investigacion, pero no a rapporta riba e estado fysico di e OK. HOH a busca ayudo di un manager hulandes pa bin interveni y garantisa un cuido di calidad na OK. Na juli 2013 e manager aki a adverti HOH cu e OK no ta cumpli cu e exigencianan di calidad hulandes.
*** Na augustus 2013, HOH a informa TUR stakeholdernan e resultado di dicho evaluacion (PUES MAS DI UN AÑA Y MEI PASA)!!!
* HOH, asumiendo nan reponsabilidad, a pidi un compania hulandes (BUSSMAN) pa acesora nan den e buscamento di un posibel solucion pa e problema cu a ser descubri y transmiti na TUR stakeholdernan na augustus 2013.
***Na januari 2014 sr. John Hodgson, director di SOGA, ta declara cu ainda ta deliberando cu Arrellano con pa reduci e gastonan di construccion.
* Na april 2014 a firma cu Arrellano, sin cu a dedica ni un solo palabra na e problema cu e OK, cu tur esnan involvi tabata na altura di dje!!
***Na mei 2014, e compania Bussman a duna un presentacion di nan evaluacion y a haci un OFERTA na HOH, SOGA/AIB, INFRA-TEAM (gobierno) y BERMELLO na Miami.
* despues di mei 2014 TNO a bin haci un investigacion di e estado fysico di OK. E resultado no tabata mucho diferente di loke ya caba tabata conoci.
* Na november 2014, a acerca Bermello pa haci un acesoramento riba e problema, cu tabata conoci na gobierno y na tur otro stakeholdernan for di augustus 2013.
* Despues di 9 luna di e presentacion na Miami, Bermello ta haci un presentacion na tur e stakeholdernan. Remarkabel ta cu nan a haya instruccion cu nan NO mag di considera e oferta di BUSSMAN!!!
* Si haci un comparacion chikito entre e oferta di Bussman y esun di Bermello, nos ta saca afo cu esun di Bussman lo sali total 9 miyon DOLLAR($) y esun di Bermello lo costa 15 miyon DOLLAR($), y no manera Alex S y Frensel Giel kier gaña cu ta 7 miyon florin so esun di Bermello lo costa.

Prome y tambe durante e reunion di parlamento, nos por a tende con e minister kier haci comosifuera cu ni e, ni gobierno, ni SOGA/AIB, ni INFRA-TEAM tabata sa di e problema entorno e OK. Esaki a sigui alabes despues di e reunion aki tambe. E intentonan aki di parti di e minister y e compania bon paga di PR, ta wordo haci no solamente pa desvia atencion, pero tambe pa busca un culpabel. Y mirando tur loke cu ta ser publica, ta busca e culpabel den e direccion di un ehecutivo den HOH.

Ta bisto, despues di tene na cuenta e acontecimento cu a ser ilustra ariba, cu ta hopi culpabel tin, y sigur no ta esun cu dede ta ser mustra riba dje. Ta p’esey ta di suma importancia pa e investigacion ser haci door di un instancia IMPARCIAL y profesional y cu experencia den tipo di trabownan asina aki. Den e caso aki e Raad van Toezicht sigur no ta cumpli cu esaki, mirando e hecho cu den e Raad aki tin algun muchanan manda y campañadornan di AVP. Y ta di spera cu no ta PWC tampoco, pasobra e mesun compania aki ta e accountant di HOH y e director di e compania aki ta esposo di e presidente di Parlamento (AVP).

Ta di spera cu e minister Alex S. sigui e ehempel di e minister y e secretario di Estado Hulandes, cu a retira despues cu a resulta cu nan no a informa Parlamento corectamente. Den e caso aki, Alex S. no solamente no a informa parlamento corectamente, pero ta insisti den su gañamento y ta laga su PR keda manipula y ta busca un otro culpabel, siendo cu ta e MES ta esun cu a keda drumi riba esaki. Si a actua responsabel, na e momento cu TUR esnan involvi a ser poni na altura, e OK mester a ser poni den e contract cu a ser firma na april 2014. Y corda cu e minister Hulandes a baha, siendo cu e NO tabata tin ni arte ni parte den e pagamento di e 4.7miyon florin na un criminal, pero toch e ta carga su responsabildad y ta retira. Aki e minister actual, hunto cu minister Benny S. y Mike E. tabata na altura, kier purba di desinforma Parlamento y pueblo, basta nan keda den e stoel ey.

Ta di spera cu sano huicio prevalece y laga un compania imparcial haci e trabow aki, y ohala por haci mesun investigacion riba henter e proceso di otorgamento di e proyecto na Bermello y despues na Arrellano.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, maart 10, 2015

Expresionnan haci den e articulo aki no necesariamente ta refleha opinion di ArenaPoliti.co