{idkey=6984b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F879-mep-e-actitud-terco-y-caprichoso-di-mike-eman-ta-haci-un-y-tur-corda-riba-su-ruman-grandi-henny-eman%3FItemid%3D101][title=MEP%3A+E+actitud+terco+y+caprichoso+di+Mike+Eman+ta+haci+un+y+tur+corda+riba+su+ruman+grandi+Henny+Eman][desc=%E2%80%9CZo+grote+broer%2C+zo+kleine+broer%E2%80%9D%26amp%3Bnbsp%3B+Actualmente+e+discusion+cu+tin+atencion+di+henter+nos+comunidad+ta+e+introduccion+di+e+medida+cruel+di+Financial+Transfer+Tax+cu+Gabinete+Mike+Eman+kier+implementa+riba+lomba+di+pueblo+y+cual+medida+ya+a+ser+anuncia+caba+den+e+presupuestonan+di+mas+a%C3%B1a.+Sinembargo+for+di+awor+caba+por+sinti+un+resistencia+enorme+pa+loke+ta+introduccion+di+e+medida+cruel+aki.+Ya+un+gran+cantidad+di+instancia+manera+CFT%2C+IMF%2C+Algemene+Rekenkamer%2C+Banco+Central%2C+ATIA%2C+Ca]}
“Zo grote broer, zo kleine broer” 

Actualmente e discusion cu tin atencion di henter nos comunidad ta e introduccion di e medida cruel di Financial Transfer Tax cu Gabinete Mike Eman kier implementa riba lomba di pueblo y cual medida ya a ser anuncia caba den e presupuestonan di mas aña. Sinembargo for di awor caba por sinti un resistencia enorme pa loke ta introduccion di e medida cruel aki. Ya un gran cantidad di instancia manera CFT, IMF, Algemene Rekenkamer, Banco Central, ATIA, Camara di Comercio y algun sindicato a vocifera nan voz di alerta y protesta pa loke ta e Financial Transfer Tax aki, ya cu su introduccion lo bay afecta nos economia severamente. Pero ta parce cu Gabinete Mike Eman ta mudo y sordo pa cu e preocupacion legitimo aki, nan no kier sigui ningun conseho y kier dal bay cu e intencion maligno aki. Tur cos ta mustra cu nan kier sigui chica cartera di nos tur den e pais aki y p’asina nan por ehecuta nan proyectonan PPP cu finalmente lo costa nos pueblo 2.4 biyon florin pa paga den 25 pa 29 aña.

Consehonan na Henny Eman
E actitud terco y caprichoso di e gobierno di Mike Eman aki ta haci un y tur corda riba e prome gobierno di pais Aruba, esta Gabinete Henny Eman kende durante e periodo di 1986-1988 tambe no kier a sigui consehonan di instancianan renombra pa loke ta e triplificacion di e cantidad di cambernan di hotel na Aruba. E tempo ey Banco Central, IMF, Pannell Kerr & Forster y World Bank a conseha Henny Eman pa no triplifica e cantidad di kambernan di hotel y esaki debi na e limitacion di nos infrastuctura. Sinembargo kico a para di e consehonan aki? Gabinete Henny Eman a benta tur e consehonan un banda y cueste loke cueste a sigui cu nan plan maligno di triplifica e cantidad di cambernan di hotel. E resultado final nos tur a conoce den e garantianan cu a ser duna den forma descabeya na e Mafianan Italiano y esaki relaciona cu e tres proyectonan hotelero Beta, Ramada y Plantation cualnan tur a fracasa y laga den ruina atras. Y naturalmente ta e pueblo mes mester sigui paga te cu 2018 pa e bagamunderia aki!

Terkedad di Mike Eman
Awe casi 30 aña despues nos ta haya e mesun consehero di Henny Eman di e tempo ey, esta Mike Eman kende cu su terkedad no kier sigui consehonan di e instancianan menciona y kier sigui cu implementacion di e Financial Transfer Tax aki y no ta import’e un bledo cu esaki lo bay afecta nos cartera, nos economia y finanzas publico. After all no ta for di su saco e placa ta sali pa ehecuta tur su proyectonan PPP. Awor ta keda na pueblo Arubano pa huzga pa nan mes si e Minister President Mike Eman aki cu no kier scucha ningun conseho di ningun instancia ta digno di sigui lidera e pais aki, sabiendo cu su maneho descabeya ta hibando nos pais den un desgracia financiero y economico total.

Expresionnan haci den e articulo aki no necesariamente ta refleha opinion di ArenaPoliti.co