{idkey=3686b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F913-booshi-wever-upp-mester-entrega-patrimonio-di-san-nicolas-pa-faborece-construccion-di-e-hotel-all-inclusive%3FItemid%3D101][title=Booshi+Wever+%28UPP%29%3A+Mester+entrega+patrimonio+di+San+Nicolas+pa+faborece+construccion+di+e+hotel+all+inclusive%3F%3F][desc=Recientemente+UPP+a+mustra+su+preocupacion+entorno+e+hotel+cu+lo+ta+bin+na+Sero+Colorado.+Nos+a+mustra+cu+ta+parce+cu+un+biaha+mas+e+pueblo+di+San+Nicolas+ta+wordo+enga%C3%B1a%2C+pasobra+na+prome+instante+a+anuncia+cu+lo+cuminza+cu+construccion+na+februari+2015%2C+y+un+paar+di+dia+despues+Otmar+O.+ta+declara+cu+na+maart+2015+lo+tin+%26quot%3Bground-breaking%26quot%3B+pa+esaki.+Nos+articulo+a+mustra+tambe+nos+preocupacion+pa+e+beach+precioso+di+Baby+Beach+y+tambe+e+medio+ambiente+eybanda.+Nos+articulo+a+sali+dialuna+13+di]}
Recientemente UPP a mustra su preocupacion entorno e hotel cu lo ta bin na Sero Colorado. Nos a mustra cu ta parce cu un biaha mas e pueblo di San Nicolas ta wordo engaña, pasobra na prome instante a anuncia cu lo cuminza cu construccion na februari 2015, y un paar di dia despues Otmar O. ta declara cu na maart 2015 lo tin "ground-breaking" pa esaki.
Nos articulo a mustra tambe nos preocupacion pa e beach precioso di Baby Beach y tambe e medio ambiente eybanda.
Nos articulo a sali dialuna 13 di april 2015, y pa casualidad (?) dia 14 di di april 2015, e representante di e cadena hotelero a bin Aruba cu e pakete di estudio, etc. etc.

E mandatario concerni a bisa cu mester bay studia loke a ser presenta, y a duna di conoce cu lo tuma mas o menos 3 luna pa studia e documentonan presenta, y e construccion lo cuminza na december 2015.
Loke mi no ta compronde ta cu bo tin di studia e documentonan AINDA, y ya bo ta bisa cu e construccion lo cuminza na december; pero dicon anto a declara cu masha fanfaria cu e "groundbreaking" lo tuma lugar na februari 2015!? Pero esaki lo ta parti di e show cu mester rond di esaki.

Loke cu a hala mi atencion ta e potret cu a ser publica den medionan di comunicacion, na unda ta mustra e beach di Baby-Beach cu ta parce di ta forma parti di e proyecto y na unda ta ser bisa textualmente:
***" BEACH IMPORTANTE.
Segun Castellanos, nan a bin ta prepara pa percura cu e.o. e beach ta ok, y otro areanan manera cancha di tennis, mirando cu ta trata di un zona basta virgen y abandona."!***

Kico esaki kiermen?
E beach di Baby Beach lo bay forma parti integral di e proyecto?
A tene cuenta cu unda cu e hotel aki ta wordo construi, lo ta en todo caso cerca di e grotnan y spelonknan cu tin eybanda? Y e minanan cu tin eynan?
A tene cuenta cu segun e representante di e grupo ambiental na Aruba, segun United Nations Environment Programme (UNEP), mester tene cuenta cu e rifnan dilanti di e area rond di Baby Beach?

UPP kier ta bon cla den e discusion aki. Nos no ta contra un posibel desaroyo na cualkier parti di Aruba, pero UPP tin un otro vision pa un desaroyo, e.o. na San Nicolas. Nos vision ta pa trata di haci algo riba e tereno unda e refineria ta ubica awor, y bini cu industrianan limpi y di hi-tech.
Esaki banda di e posibilidad di Boutique Hotels den e area pafor di Colony, cu cambernan limita y no di 400 of 600 camber.
UPP ta kere cu mester diversifica nos economia y no depende solamente riba e industria turistico. Alabes nos ta kere cu lo por trece un desaroyo hopi positivo si trece henter nos parti gubernamental pa San Nicolas. Esaki lo ta algo grandi.

Ya caba den pasado mi a demostra cu mi ta haci loke mi ta bisa y loke mi ta kere aden. Ta den e cuadro ey tambe tempo cu mi tabata minister di e.o. Salubridad, mi a bay traha na San Nicolas, mi a trece 2 departamento San Nicolas, mi a percura pa SVB bin San Nicolas tambe, y a construi un joya di un proyecto di hospital na San Nicolas cu poco poco ta bay perdi. Lamentablemente esaki ta para ya pa 6 aña, y na unda aparatonan sumamente sofestica ta para ta putri of ta wordo bendi na prijs di baca flaco.
E hospital aki lo por tabata tin un "spin-off-effect" hopi positivo pa San Nicolas.

Lamentablemente e "vision" di e gobierno actual ta pa sigui tira santo den wowo principalmente di e habitantenan di San Nicolas, pasobra con por ta posibel cu Mike E. ta na Panama y ta trata di yega na convenionan pa stimula Caya Betico Croes!
Con a para cu tur e placa cu a wordo gasta door di entre otro Frensel Giel y AIB cu recientemente a presenta un masterplan pa desaroya San Nicolas den e di dos capital turistico di Aruba!?

Lo ta na su lugar pa publica e documentonan cu a ser presenta, pa pueblo tambe por huzga prome cu firma, pa nos no bin haya nos cu un contracto firma, na unda patrimonionan di pueblo ta ser regala na inversionistanan stranhero.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, april 16, 2015

Anexo: Hotel na San Nicolas

Expresionnan haci den e articulo aki no necesariamente ta refleha opinion di ArenaPoliti.co