{idkey=3596b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F946-dangui-oduber-mep-gabinete-mike-eman-2-mester-saca-su-conclusion%3FItemid%3D101][title=Dangui+Oduber+%28MEP%29%3A+Gabinete+Mike+Eman+2+mester+saca+su+conclusion%21][desc=Un+otro+KB+ta+un+brevet+van+onvermogen%21%26amp%3Bnbsp%3B+For+di+varios+luna+tin+e+rumor+circulando+cu+lo+tin+un+otro+Koninklijk+Beskuit+%28decreto+real%2C+KB%29+of+un+Algemene+Maatregel+van+Rijksbestuur+na+caminda+pa+gabinete+Mike+Eman+2.+Esaki+tin+di+haber+cu+e+caos+financiero+cu+e+gobierno+aki+a+crea+y+tambe+terkedad+di+minister+Bermudez+y+promer+minister+Mike+Eman+2.+E+gobierno+aki+a+hiba+un+vision+di+derocha+placa+di+pueblo%2C+malgasta+placa+di+pueblo%2C+inverti+den+prioridadnan+robez+y+sin+reduce+gastonan+di+g]}Un otro KB ta un brevet van onvermogen! 

For di varios luna tin e rumor circulando cu lo tin un otro Koninklijk Beskuit (decreto real, KB) of un Algemene Maatregel van Rijksbestuur na caminda pa gabinete Mike Eman 2. Esaki tin di haber cu e caos financiero cu e gobierno aki a crea y tambe terkedad di minister Bermudez y promer minister Mike Eman 2.

E gobierno aki a hiba un vision di derocha placa di pueblo, malgasta placa di pueblo, inverti den prioridadnan robez y sin reduce gastonan di gobierno. Awe e realidad cruel ta cu nos pais su debe a yega 4 biyon florin, nos ta bancarota y nos ta na fin di latin. Placa a caba, gobierno Hulandes a fada cu e maneho irresponsabel di Mike Eman y su gobierno y e consequencia ta un otro KB.

Anja pasa na juli 2014 e gobierno aki a haya un KB caba riba na cabez. Nunca antes den historia politica di Aruba henter un gobierno a haya un KB asina. E presupuesto 2014 tawata e presupuesto cu e deficit di mas grandi den historia di nos pais. Nos promer minister tawata tin 137 coordinador riba payroll, su so tawata gasta 1.3 miyon florin na biahamento, payroll di su bureau ta costa nos pueblo 13 miyon florin anto awe henter e pueblo ta sintiendo e consequencianan. Nos a kere y nos a spera cu e gobierno aki lo a sinja su les. Promer minister Mike Eman a somete su mes na un welga di hamber sin resultado. Gobernador a nenga di firma e presupuesto 2014, nan a haya un KB y ainda nan ta keda TERCO y keda maneha nos finanzas publico na un manera irresponsabel. Ta obvio cu e gobierno aki no a sinja di e errornan cu e la comete den pasado y kier ta wrong and strong. Nan a sigui cu nan maneho di derocha placa di pueblo, sigui fiesta, nan a bira un gobierno sin gevoel y un gobierno sinverguenza. Mientras pueblo ta sufri, pueblo ta wordo castiga cu medida tras di medida y gobierno mes no ta reduci nan gastonan.

Un otro KB ta un muestra total di incapacidad di e gobierno aki pa goberna nos pais. E ta un brevet van onvermogen y un gobierno asina aki mester asumi nan responsabilidad y saca nan conclusion. Un gobierno cu a caba cu su pais, a desgracia henter un nacion, manda nos pais bancarota, causa berguenza international no mag y no por keda mas. E rosea cayente di pueblo mester wordo aumenta pasobra bon por ta viaha so y gasta nos placa anto manera bo yega Aruba bo ta haya un KB. Mike Eman tawata mas cu un siman cu promer minister Hulandes Rutte na Panama. E no por a puntre con ta para cu CFT, con ta para cu e presupuesto, bise cu e kier evita un di 2 welga di hamber. Of acaso ta potret so nan a saca cu otro???

Den e periodo di 5 anja Mike Eman a logra sera Valero, aumenta BBO, aumenta tarifa di coriente cu 15%, cobra pueblo 312 florin a recohe sushi, haya 2 KB, manda Aruba BANCAROTA, caba cu nos finanzas publico, aumenta edad di pensioen cu 65 anja, kita 107,000 florin for di pensionadonan, bin cu transactiebelasting y caba di mata e pueblo cu Algemene Bestedings belasting. Un gobierno cu masacra un pueblo asina no por tin confanza mas di pueblo. Gobierno Hulandes a perde tur clase di confianza y ta impone CFT riba nos awor. Si e gobierno aki a goberna a pais aki responsablemente, mantene e nivel di gasto na un manera acceptable, no derocha placa, no fia tanto placa awe CFT nunca lo por a wordo imponi! Tur loke ta pasando a wordo bisa pa nos partido y nos a avisa pueblo kiko ta e consequencia di maneho di Mike Eman. E pueblo mester compronde cu e la wordo enganja y cu e fiesta di e abusadornan aki mester caba. Mike Eman debe pueblo un splicacion y awor nos kier wak con e lo yrata na sigui manipula pueblo. E ta e causante awe cu CFT lo bin Aruba permanentemente. E no por culpa ningun otro hende! Nos a spierta pueblo cu e carta cu a wordo manda di CFT pa minister Bermudez ta un advertencia di loke ta bin y Bermudez a bisa den parlamento e unico KB cu e sa di dje ta e Koninklijk Bezoek di rey Willem Alexander. Asina aki nan ta falta respet pa parlamento y chercha y wak awe e amargo realidad! Cu e decision di gobierno hulandes aki Mike Eman a entrega nos autonomia financiero di nos pais. 

Expresionnan haci den e articulo aki no necesariamente ta refleha opinion di ArenaPoliti.co