{idkey=4190b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F97-desiree-de-sousa-croes-avp-conmemorando-60-ana-di-nos-constitucion-den-temponan-di-crisis-constitucional%3FItemid%3D101][title=Desir%C3%A9e+de+Sousa-Croes+%28AVP%29%3A+Conmemorando+60+a%C3%B1a+di+nos+Constitucion+den+temponan+di+crisis+constitucional][desc=Con+un+acto+di+abuso+di+poder+por+kibra+un+relacion+respetuoso+di+60+a%C3%B1a+Riba+28+di+oktober+1954+e+paisnan+cu+es+tempo+ey+tabata+forma+Reino+Hulandes%2C+a+declara+pa+hunto+y+di+boluntad+liber+accepta+un+orden+nobo+den+Reino+Hulandes.+Den+e+orden+nobo+aki+e+paisnan+lo+salvaguardia+independientemente+nan+propio+interes+y+riba+base+di+igualdad+lo+percura+pa+interesnan+comun+den+Reino%2C+como+tambe+a+declara+di+lo+yuda+y+sostene+otro.%26amp%3Bnbsp%3BPues%2C+cada+pais+den+Reino+Hulandes+tin+e+derecho+y+obligacion+]}

Con un acto di abuso di poder por kibra un relacion respetuoso di 60 aña

Riba 28 di oktober 1954 e paisnan cu es tempo ey tabata forma Reino Hulandes, a declara pa hunto y di boluntad liber accepta un orden nobo den Reino Hulandes. Den e orden nobo aki e paisnan lo salvaguardia independientemente nan propio interes y riba base di igualdad lo percura pa interesnan comun den Reino, como tambe a declara di lo yuda y sostene otro. Pues, cada pais den Reino Hulandes tin e derecho y obligacion di percura pa su propio interesnan, y tur pais den Reino hunto lo percura pa e interesnan comun. Nos Statuut ta duna reglanan pa cu e.o. coöperacion entre paisnan di Reino y constelacion constitucional di e paisnan di Reino Hulandes. 
Despues di segunda guera mundial mundo a conoce un proceso di dekolonisacion den varios continente. Paisnan cu pa siglonan tabata kolonia di un pais Europeo a pidi y adkeri nan independencia. Paisnan, manera e islanan di Antillas di antes, a haya autonomia y e derecho sagrado di un pais riba di autodeterminacion. 
For di aña 1954 paisnan den Reino Hulandes ta partnernan igual. No mescos (gelijk), pero si di igual balor (gelijkwaardig). Nos Statuut ta un ley superior na Constitucion Hulandes, como tambe na e Staatsregeling di Aruba, Korsow y Sint Maarten. Un solo nationalidad Hulandes pa tur habitante di Reino Hulandes, un solo cabes di gobierno -cu ta e herederonan di La Reina- un solo maneho pa cu  relacionnan exterior y un solo defensa ta algun punto di salida di nos Statuut. Coöperacion riba un variedad di tereno ta posibel, pero en principio cada Pais ta autonomo pa regla nan mes asuntonan interno.

Riba e ultimo punto aki, esta si un cierto situacion ta un asunto interno of un asunto di Reino, Aruba y Hulanda a pega cu otro algun luna pasa. Mirando e echo cu Statuut ta nombra limitativamente loke ta asuntonan di Reino, den art. 3 di Statuut^[1] e discucion riba e punto aki nunca mester a yega asina leu. Nos presupuesto nunca tabata ta, no ta y nunca por ta un asunto di Reino. Articulo 43 lid 2 di Statuut^[2] ta regla e asina yama “waarborgfunctie” y ta duna Gobierno di Reino e autoridad pa interveni den asuntonan interno di un di e paisnan di Reino pa defende e balornan menciona den art. 43 lid 1. E balornan aki ta derecho y libertadnan  humano fundamental, seguridad huridico y bon gobernacion. 
Lo por discuti cu si e supuesto fayo den presupuesto 2014 por ta cai bou di falta di bon gobernacion cu lo por hustifica intervencion di gobierno di Reino den nos asuntonan interno. Esaki ta un di e gritonan den laira di oposicion, cu lunanan largo a biaha pa Hulanda cu e intencion diabolico pa daña nomber di Aruba. Nan a reuni cu e enemigonan di nos Pais pa haya sosten den nan proposito pa baha gobierno di Aruba, sin worry cu hunto cu esaki ta perhudica nos economia y daña nomber di nos Pais internacionalmente. 
Fuera di e diferencia di interpretacion aki, tin tambe e asunto mas mahos ainda cu ta e manera cu Hulanda a haci pa obliga Aruba baha cabes. A desvia di ley, di reglanan stipula y di desencia pa pone un KB riba gobierno di Aruba, den e proceso aki falta respet pa function di Gobernador como organo di Pais y di Parlamento di Aruba, e representantenan democraticamente escohi pa Pueblo di Aruba, cu ya a aproba e presupuesto 2014. Pa falta di respet y por medio di un acto di abuso di poder, ta kibrando loke meramente nos Statuut a uni na ’54: e lasonan di amistad entre paisnan di Reino Hulandes. Awe nos ta mira cu Raad van Advies tambe ta di opinion cu door di no firma presupuesto 2014 gobernador di Aruba, a actua contra su tarea como organo di Pais. 
Den nos Statuut, art. 38a ^[3]/ ^[4] ta regla e posibilidad di institui un institucion pa trata discucionan den Reino of diferencia di interpretacion di Statuut. Den mas cu un occacion a pidi a base di e articulo aki pa institui un “geschillencommissie”, un comicion pa arbitrahe pa Reino. Un caminda pa bai ora cu Paisnan den reino no por sali for di un diferencia di opinion, por acudi pa haya oido y por duna un conseho y por yuda paisnan Sali manera amigo for di un impasse. Lastimamente te dia di awe, un comicion asina no a wordo realisa. Promesanan ta cu pronto e mocion di colega Parlamentarionan Yrausquin y Herde cu ta encera e deseo aki, lo ta riba mesa pa wordo discuti. 

Dia 15 di December pa añanan a celebra Dia di Statuut (Statuutdag), awor bautisa di nobo como Dia di Reino (Koninkrijksdag). E dia ey na aña 1954 Reina Juliana den su afan pa uni Reino Hulandes a anuncia e Statuut, e orden di ley nobo pa Reino Hulandes unda den conhunto paisnan di Reino a dicidi pa pone reglanan riba papel di con pa anda cu otro. Pero si paisnan den Reino Hulandes, sigur madre patria, no por respeta nos Statuut, e intencion puro di union y amistad cu cada pais tabatin pa 60 aña, nos Statuut lo ta un documento sin balor.

.

---

Expresionnan haci den e articulo aki no necesariamente ta refleha opinion di ArenaPoliti.co