{idkey=8133b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F984-mensahe-di-u-p-p-riba-dia-di-obrero-trabow-ta-un-derecho-fundamental-pa-asina-nos-por-garantisa-un-existencia-digno-den-mundo-di-awendia%3FItemid%3D101][title=Mensahe+di+U.P.P.+riba+Dia+di+Obrero%3A+Trabow+ta+un+derecho+fundamental+pa+asina+nos+por+garantisa+un+existencia+digno+den+mundo+di+awendia%21%21][desc=Na+vispera+di+e+celebracion+di+dia+di+obrero%2C+U.P.P.+kier+a+haci+uzo+di+e+oportunidad+pa+dirigi+nos+mes+na+tur+nos+trahadornan%2C+na+tur+nivel+di+nos+comunidad%2C+tanto+esnan+paga+como+esnan+no+paga%2C+pero+cu+ta+contribui+na+bienestar+di+su+famia%2C+di+su+comunidad+y+naturalmente+di+nos+pais.+E+a%C3%B1a+aki+pa+U.P.P.%2C+e+dia+aki+mas+cu+nunca+mester+ta+un+dia+di+refleccion%2C+enbes+di+un+dia+di+celebracion.Nos+tur+sa+cu+e+situacion+di+pais+Aruba+ta+uno+sumamente+malo%2C+y+na+unda%2C+danki+na+e+mal+maneho+di+e+gabi]}
Na vispera di e celebracion di dia di obrero, U.P.P. kier a haci uzo di e oportunidad pa dirigi nos mes na tur nos trahadornan, na tur nivel di nos comunidad, tanto esnan paga como esnan no paga, pero cu ta contribui na bienestar di su famia, di su comunidad y naturalmente di nos pais.

E aña aki pa U.P.P., e dia aki mas cu nunca mester ta un dia di refleccion, enbes di un dia di celebracion.
Nos tur sa cu e situacion di pais Aruba ta uno sumamente malo, y na unda, danki na e mal maneho di e gabinete actual, ta pone cu den e ultimo aña hopi ta e medidanan cu ta wordo tuma riba e pueblo, no pa drecha e situacion, pero pa por haya mas placa pa sigui malgasta mas placa y pa complace cu nan compinchinan.

Nos pueblo trahador ta esun cu tin di sufri tur e consecuencianan aki, ya cu mayoria di e peso ta wordo poni riba su lomba; e pueblo trahador di homber y muhernan balente, cu tur mainta ta lanta pa acudi na pia di trabou y asina duna nan aporte pa haci di e pais aki un mihor pais. Pa nos di U.P.P. e trahador, tanto den sector priva como den sector publico, ta determinante pa progreso di e pais aki, y ta un aliado hopi importante den e proceso pa mehora nos pais.

Lamentablemente nos por mira con e pueblo trahador, cu hustamente ta carga nos economia cu nan trabou y cu ta percura pa tin entrada pa duna nan famia un bida digno y cu ta duna aporte substancial na caha di gobierno, ta esun cu ta wordo sacrifica.
Sacrifica no unicamente cu medidanan pisa, cu mas belasting, etc., pero cu no ta haya e proteccion necesario riba tereno laboral, ya cu nos por mira cuanto ta esnan cu a bin ta perdiendo trabou.

Tambe si nos tene cuenta cu nos fronteranan no ta sera, y ta sigui permiti mas hende drenta Aruba, unda cu keto bay tin fiesta cu permisonan. Fuera di esaki tin un fenomeno nobo, cu awor hasta esnan cu ta bin pa raspa carchi aki na Aruba, tambe ta wordo emplea, sea pa un siman of pa un paar di luna. Pues no tin control riba esnan cu ta bin di estranheria, y asina ta permiti competencia inhusto pa cu nos trahadornan local cu otro obreronan ilegal y barata.
Pues riba dia di obrero, U.P.P. kier pidi pa nos pueblo trahador reflecciona riba e situacion cu nos ta aden. Tambe prepara pa temponan mas dificil cu ta na caminda, mirando cuanto medida mas ta spera nos.

Tambe nos ta pidi nos trahadornan, pa pidi nan sindicato pa ta mas activo y dinamico den e acontecimentonan cu ta nos dilanti. Sindicato mester mustra di ta e defensornan di e pueblo obreril y stop di ta hunga Pontius Pilatus den henter e situacion cu nos ta bibando aden.
Riba 1 di mei ta un dia cu nos mester mustra union y mustra cu ta e pueblo trahador ta e weso di lomba di nos pais.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, april 29, 2015

Expresionnan haci den e articulo aki no necesariamente ta refleha opinion di ArenaPoliti.co