{idkey=471b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F994-gerick-croes-mep-cifranan-presenta-pa-gabinete-eman-motibo-pa-desconfia%3FItemid%3D101][title=Gerick+Croes+%28MEP%29%3A+Cifranan+presenta+pa+Gabinete+Eman+motibo+pa+desconfia%21][desc=Den+un+comunicado+titula+%26quot%3Bcifranan+concreto+ta+motibo+pa+confiansa%26quot%3B%26amp%3Bnbsp%3Blider+di+fraccion+di+AVP%26amp%3Bnbsp%3Ba+declara+entre+otro+cu+Gabinete+Eman+lo+ta+riba+un+bon+rumbo.%26amp%3Bnbsp%3BNotabel+ta+e+persistencia+di+parti+e+parlamentario+aki+pa+malinforma+pueblo+y+sigui+tapa+mal+gobernacion.+Na+promer+lugar+ta+importante+pa+enfatisa+cu+cifranan+presenta+den+tanto+e+presupuesto+2015+y+calculacionan+multi+annual+te+cu+2018+NO+ta+duna+un+bista+concreto+di+e+desaroyo+financiero+y+e+caminda+pa+un+finansas+sostenibel]}
Den un comunicado titula "cifranan concreto ta motibo pa confiansa" lider di fraccion di AVP a declara entre otro cu Gabinete Eman lo ta riba un bon rumbo. Notabel ta e persistencia di parti e parlamentario aki pa malinforma pueblo y sigui tapa mal gobernacion. Na promer lugar ta importante pa enfatisa cu cifranan presenta den tanto e presupuesto 2015 y calculacionan multi annual te cu 2018 NO ta duna un bista concreto di e desaroyo financiero y e caminda pa un finansas sostenibel. Nos lo bai pone enfasis riba esaki den e siguiente alineanan. 

Ta conoci cu e organo di supervision financiero CFT na dos ocasion a elabora riba e presupuesto 2015. Promer biaha tawata 29 december 2014 y e ultimo tawata 10 april 2015 unda  cu CFT a publica un conseho adicional tocante e presupuesto 2015 prome cu esaki cuminsa wordo trata door di parlamento. Netamente den e rapport aki e colegio di supervision a expresa entre otro cu presupuesto 2015 manera cu e la wordo entrega na Staten no a conoce mucho adaptacion, compara cu e version cu gobierno a manda pa CFT na un promer instante. Esaki kiermeen entre otro cu no a aplica niun di e recomendacionan hasi door di CFT. Pa loke ta trata e 24 medidanan presenta door di Gabinete Eman CFT a comenta lo siguiente. Solamente riba algun di e medidanan a tuma un decision parcial y di esakinan poco a wordo implementa. Pa clarifica mas, for di e total di 24 medidanan presenta pa Gabinete Eman a tuma decision parcial riba solamente 14 medida cualnan ta den e ultimo fase di ehecucion mientras cu 10 di esakinan ta sin aclaracion. Kiko esaki kiermeen den cifras? Wel den un principio gobierno a presenta den e proyeccion di 2015 un suma total di 281.4 miyon na reduccion di gastonan pero awor ta mustra cu solamente 225.4 miyon por wordo substancia cual ta nifica cu ainda mester splica con lo bai realisa 56 miyon mas na reduccion of esaki lo bai aumenta e presupuesto mas. Mester bisa cu cifranan sin aclaracion manera di 2015 ta keda aumenta e siguiente añanan 2016 ( 109.3 miyon) , 2017 ( 136.3 miyon).

Ta importante pa remarca cu CFT mescos cu Raad van advies ta ribe mesun liña pasobra ambos ta indica cu e medidanan no ta substancia suficiente pa por husga si nan ta realistico. Mester enfatisa cu e solo hecho cu tin poco splicacion ta hasie dificil pa por evalua si e cifranan multi-annual lo ta factibel riba termino mediano (2015-2018). Akinan ta unda cu CFT a mustra desconfiansa den e maneho di Gabinete Eman pasobra no a cumpli cu propio "cuadronan" y door di esaki a pone un deadline riba gobierno pa e prome raportahe kwartal tuma lugar mitar di mei. Ora ta papia di raportahenan pa cada kwartal ta nifica cu e supervision ta uno estricto pasobra no tin mucho fe mas den Gabinete Eman II! Cu awe nos ta na rand di supervision fiho (no ta importa e nomber) kiermeen cu ta desconfia den Gabinete Eman! Pueblo por conclui cu incumplimento, incapacidad y iresponsabilidad ta algun di e caracteristicanan di Gabinete Eman cu a hiba nos finansas publico bou supervision.

Expresionnan haci den e articulo aki no necesariamente ta refleha opinion di ArenaPoliti.co