{idkey=3180b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1652-parlamentario-guillfred-besaril-mep-esencia-di-mi-disertacion-durante-tratamento-di-e-ley-di-caft%3FItemid%3D101][title=Parlamentario+Guillfred+Besaril+%28MEP%29%3A+%26quot%3BEsencia+di+mi+disertacion+durante+tratamento+di+e+Ley+di+CAFT%26quot%3B][desc=Durante+e+reunion+publico+di+Diahuebs+ultimo%2C+a+hiba+palabra+sr.+Guillfred+Besaril+di+fraccion+MEP.+E+parlamentario+a+elabora+riba+e+importancia+di+conoce+Aruba+su+historia+y+e+lucha+pa+nos+autonomia+den+Reino.+Sr.+Besaril+a+menciona+entre+otro+cu%3A+%26quot%3BEsun+cu+sa+di+unda+e+ta+bini%2C+sa+na+unda+e+ta+bai%21+Si+bo+no+sa+kico+tur+a+pasa+riba+nos+isla+prome+cu+bo+a+nace+of+durante+bo+infancia%2C+dificilmente+lo+bo+por+reconoce+e+privilegionan+cu+bo+tin+awe%26quot%3B.+E+parlamentario+a+elabora+riba+Aruba+su+historia+d]}
Durante e reunion publico di Diahuebs ultimo, a hiba palabra sr. Guillfred Besaril di fraccion MEP. E parlamentario a elabora riba e importancia di conoce Aruba su historia y e lucha pa nos autonomia den Reino. Sr. Besaril a menciona entre otro cu: "Esun cu sa di unda e ta bini, sa na unda e ta bai! Si bo no sa kico tur a pasa riba nos isla prome cu bo a nace of durante bo infancia, dificilmente lo bo por reconoce e privilegionan cu bo tin awe".
E parlamentario a elabora riba Aruba su historia desde cu e la wordo descubri pa e Spañonan te na e momento cu Aruba a drenta su Status Aparte. Tambe kico e descubrimento di oro a significa pa Aruba y a termina su recorido den nos historia cu e impacto di tanto e binida di refineria Lago, como tambe e desaroyo riba e tereno di turismo.
"Debi na e desaroyo economico cu nos isla a conoce, a nace e conviccion di kier ta "Baas den nos mesun Cas". Un ideologia cu a desemboca den un lucha cu a concretisa cu Aruba su Status Aparte na 1986. Den transcurso di e lucha pa ta "Doño di nos propio Destino", Aruba a haya su propio Bandera, su propio Himno y su propio Escudo. E soño di un Gran Estadista, esta Gilberto F. Betico Croes (dfm), a mira luz di dia na Januari di 1986. Aruba desde su Status Aparte a conoce desaroyonan grandi y importante. Aruba atravez di historia a hala diferente nomber; di "Isla de Los Gigantes", pa "Islas Inutiles". Awendia cu hopi orguyo nos isla ta carga e titulo di "Perla den Mar Caribe!" E Arubano a sa di demostra corahe y orguyo den su historia. Awe mas cu nunca, nos Pueblo mester ta consciente cu e rikesa di mas grandi cu Aruba tin ta su propio hendenan".
"Awe, 30 aña despues di e lucha pa Aruba ta "Doño di su propio Destino", parlamento di Aruba tin un desicion pa tuma cu ta importante y impactante pa futuro di nos isla. E parlamento actual, e parlamento number 9 di País Aruba, tin e oportunidad pa scohe den ki forma nos ta bai drenta historia, como esnan cu a para pa e sentimento di ta "Doño di nos propio Destino" of e parlamentarionan cu a bira lomba pa tur loke nos grandinan a lucha pe!" Parlamentario Besaril a recorda cada un parlamentario cu irrespecto nan color politico y decision final, historia lo wordo skirbi y cu nan tin cu dicidi pa nan mes si nan kier ta na e banda cu ta traiciona e pueblo di Aruba of na e banda cu ta balora e lucha di nos antepasadonan.
Señor Besaril a continua bisando cu: "Nos tur ta conciente cu nos ta un partner den Reino Hulandes y cu esaki ta trece su beneficionan cune, pero laga nos tur ta conciente y reflecciona riba e consecuencia cu e ley di CAFT lo tin pa e isla di Aruba y su autonomía financiero. Di berdad Parlamento number 9 di País Aruba ta cla awe na entrega Aruba su autonomia financiero? Un autonomia cu nos antepasadonan a lucha asina tanto p'e? Boso ta cla pa bai bek den un situacion den cual cu na momento cu como pais nos kier un desaroyo economico, mester pidi permiso na un otro organo cu no ta nos propio Parlamento? Kiko ta e señal cu nos kier manda awe na nos yiunan? Cu e sapatonan di ta "Baas mas den nos mes un Cas" a keda e generacion aki demaciado grandi? Awel ami SIGUR CU NO! Ami ta totalmente convenci cu NOS 'RUBIANO MES POR!"
Parlamento ta E organo di mas halto di Pais Aruba y Hulanda por conseha, Hulanda por duna guia pa motibo di nan experticio, pero ni Hulanda, ni niun hende mag di bin bulldose loke nos grandinan a lucha p'e! Mi ta cla pa sigui cu e responsabilidad y di mantene e lucha bibo di ta "Doño di nos propio destino! Ami sigur lo no entrega ni un solo centimeter!" e parlamentario ta termina su disertacion.

Expresionnan haci den e articulo aki no necesariamente ta refleha opinion di ArenaPoliti.co