{idkey=2063b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1896-gabinete-me-ii-aruba-cu-contribucion-importante-na-desaroyo-di-small-island-developing-states-na-nacionnan-uni%3FItemid%3D101][title=Gabinete+ME+II%3A+Aruba+cu+contribucion+importante+na+desaroyo+di+Small+Island+Developing+States+na+Nacionnan+Uni][desc=E+prome+paso+di+un+%26%23039%3Bpartnership%26%23039%3B+entre+Aruba+y+UNDP.%26amp%3Bnbsp%3BInteres+grandi+di+islanan+di+SIDS+pa+asisti+na+e+%26%23039%3BLearning+Event%26%23039%3B+di+Green+Conference+na+Aruba.%26amp%3Bnbsp%3BORANJESTAD+%E2%80%93+Na+final+di+un+reunion+na+Nacionnan+Uni%2C+organisa+conhuntamente+pa+UNDP+%28United+Nations+Development+Programme%29+y+OECD+%28The+Organisation+%26amp%3Bnbsp%3Bfor+Economic+Co-operation+and+Development%29+na+New+York%2C+Prome+Minister+di+Aruba+a+bisa+di+ta+hopi+entusiasma+di+por+a+duna+su+contribucion.+E+reunion+tabata+particularmente+dirigi+pa+m]}
E prome paso di un 'partnership' entre Aruba y UNDP. 
Interes grandi di islanan di SIDS pa asisti na e 'Learning Event' di Green Conference na Aruba. 

ORANJESTAD – Na final di un reunion na Nacionnan Uni, organisa conhuntamente pa UNDP (United Nations Development Programme) y OECD (The Organisation  for Economic Co-operation and Development) na New York, Prome Minister di Aruba a bisa di ta hopi entusiasma di por a duna su contribucion. E reunion tabata particularmente dirigi pa miembronan di SIDS (Small Island Developing States) cu tin un dependencia financiero riba paisnan mas grandi.

SIDS ta un organisacion reconoci pa Nacionnan Uni, cu ta trece hunto paisnan chikito, particularmente islanan cu ta enfrenta dificultadnan particular na e situacion di paisnan chikito y leu for di centronan di poblacion grandi. Hopi di nan, por ehempel, ta susceptibel pa eventonnan natural, vulnerabel pa 'shocknan' externo, dependencia grandi na comercio internacional y medio ambiente fragil. Crecemento y desaroyo di e paisnan chikito ta wordo afecta tambe pa costo relativamente halto di comunicacion, energia y transportacion, volumen di transporte internacional iregular, administracion publico y costo di infrastructura desproporcionadamente halto debi na nan grandura y practicamente no tin oportunidad pa crea economianan di scala (economies of scale).

Consehero principal riba SIDS, di UNDP, Craig Hawke, a bisa di ta hopi contento cu contribucion di Prome Minister di Aruba. “E por trece momentum politico riba e temanan, pero tambe contribui cu experiencia di Aruba den termino di e miho practicanan,” Sr. Hawke a enfatisa. Aruba tin un trayectoria largo como pais y tin hopi conocemento cu por yuda otro paisnan chikito. Pesey a cataloga e aporte di Aruba den e caso aki como un 'partnership'.

Na salida for di e reunion Prome Minster di Aruba, di su banda a splica di ta contento cu Aruba por a duna su contribucion na e reunion. E intencion ta pa hiba e grupo di islanan aki den un direccion caminda nan ta bira mas sostenibel economicamente. “UNDP, cu ta un agente importante di Nacionnan Uni ta duna atencion hopi particular na desaroyo di e SIDSnan y cua ta e modelonan economico cu por pone cu un SIDS por desaroya su mes den un sentido positivo,” Sr. Eman a splica. UNDP y OECD tin un bon bista cua ta e retonan financiero, e retonan ecologico y den e reunion a repasa cu ayudo di diferente experto e boluntad di paisnan grandi pa sostene SIDSnan cu ayudo di desaroyo. “E estimacionnan cu OECD a presenta ta tog un poco sorprendente. Nan tin un bon mira di e desaroyo gasto di paisnan grandi y caminda cu nan ta inverti nan placa. Nan a presenta un estimacion di e fondonan cu ta bay wordo poni disponibel pa e SIDSnan y e resultado ta cu nan ta bay menguando cu tempo.”

“Esey ta preocupante, aunke cu nos no ta un pais cu ta dependiente asina di ayudo di desaroyo, pero sinembargo nos ta convivi si cu hopi di e islanan aki cu ta depende di ayudo di desaroyo,” Sr. Eman a duna di conoce, pero ta agrega na e mesun momento cu “nos ta reconoce tambe e situacion cu ora un pais pasa dor di crisis economico ta bira menos disponibel pa yuda y aporta na economianan mas chikito den mundo.”

Prome Minister Eman a splica cu, como Aruba, a comparti con ta purba crea partnershipnan nobo basa riba un perspectiva diferente cu esun historico of colonial. Ta busca na unda e beneficionan mutuo ta, dor di accentua cosnan cu ta hopi particular di Aruba. Nos posicion strategico den cierto area, e hecho cu nos tin cierto condicionnan climatologico cu ta hopi interesante pa desaroyo di tecnologianan particular, por ehempel innovacion riba tereno di energia solar y di biento.  Mundialmente tin preguntanan interesante y inkietudnan grandi cu tin bes cu riba islanan chikito por haci pruebanan y desaroya tecnologia hopi mas lihe cu den paisnan grandi. Asina, paisnan chikito, por contribui na contesta e inkietudnan grandi cu tin den mundo y haciendo esey islanan por haya un posicion economico mas fuerte den mundo.

“Nos a comparti e sistema aki, con Aruba ta atende cu e hecho cu bo mester busca e camindanan cu por demostra cu tin un relacion win-win cu paisnan grandi y sigur sigur esaki ta wordo aprecia, pasobra puramente keda dependiente di ayudo di desaroyo no ta algo saludabel pa ningun pais. Y esaki ta pasobra nan no tin'e den man ora cu e paisnan grandi cera e kraanchi anto e ora ey derepente bo ta hayabo cu hopi reto economico,” Sr. Eman a splica.

“Aruba ta orguyoso, semper nos a para riba nos mes desde Status Aparte, nos a sa di surpasa crisisnan grandi dor di inventividad, trabou duro y cu un confiansa grandi den nos mes. Y esey a haci, tambe ora cu, ora cu a yega e momento di transicion di ayudo di desaroyo pa un forma cu bo ta para riba bo mes, Aruba a sa di yena esey tambe cu un vision tog renoba riba relacionnan entre paisnan chikito y paisnan grandi. Y esey nos lo kier duna tambe como aporte na e discusionnan cu tin aki na United Nations y nos ta spera cu hunto nos por sigui copera cu otro pa siña di otro.”

Prome Minister a anuncia cu Nacionnan Uni, Gobierno Americano y Union Europeo ta bay asisti financieramente hopi isla y pais den desaroyo pa ta na Aruba proximamente. Aruba ta bay ta cede un bes mas di conferencianan importante riba tereno di innovacion y ta bay tin un 'Learning Event' durante Green Conference caminda hopi di e pais nan aki ta sumamente interesa pa asisti. E meta ta pa por intercambia di idea y conocemento cu Aruba tin y ta interesante pa e paisnan aki.

Como parti di Reino Hulandes, Aruba a forma parti di un delegacion cu a asisti na varios reunion importante pa Reino, pero tambe pa Aruba en particular. E reunionnan den nan mayoria a tuma luga na e compleho di Nacionnan Uni na New York. E delegacion di Reino tabata consisti di Rey Willem Alexander, Reina Máxima y Prome Ministernan di Aruba, Corsou, St. Maarten y Hulanda.

Expresionnan haci den e articulo aki no necesariamente ta refleha opinion di ArenaPoliti.co