{idkey=6250b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2381-gabinete-me-ii-prome-minister-eman-a-enfoca-den-su-disurso-pa-genootschap-nederland-aruba-e-desigualdad-cu-ta-reina-den-reino%3FItemid%3D101][title=Gabinete+ME+II%3A+Prome+Minister+Eman+a+enfoca+den+su+disurso+pa+Genootschap+Nederland+Aruba+e+desigualdad+cu+ta+reina+den+Reino][desc=DEN+HAAG%2FORANJESTAD-+Den+su+discurso+pa+Genootschap+Nederland+Aruba%2C+Prome+Minister+Mike+Eman+a+toca+e+tema+%E2%80%98disigualdad+den+Reino.+Un+disigualdad+cu+ta+grandemente+na+desbentaha+di+Aruba.+El+a+ilustra+esaki+cu+hecho+y+cifranan+di+institutonan+di+Aruba.+Finalmente+cada+ken+por+a+saca+su+conclusion.+E+audiencia+grandi+den+e+sala+na+Den+Haag+a+haci+esaki.+Presidente+di+e+Genootschap+sr.+Nico+van+Grieken+prome+cu+e+discurso+di+Eman+tabata+falta+superlativo+pa+elogia+e+erudita+Mike+Eman%2C+manera+el]}
DEN HAAG/ORANJESTAD- Den su discurso pa Genootschap Nederland Aruba, Prome Minister Mike Eman a toca e tema ‘disigualdad den Reino. Un disigualdad cu ta grandemente na desbentaha di Aruba. El a ilustra esaki cu hecho y cifranan di institutonan di Aruba. Finalmente cada ken por a saca su conclusion. E audiencia grandi den e sala na Den Haag a haci esaki. Presidente di e Genootschap sr. Nico van Grieken prome cu e discurso di Eman tabata falta superlativo pa elogia e erudita Mike Eman, manera el a describi’e. Eman a papia riba un parti di e historia di Aruba su Status Aparte. Ora Aruba a logra su Status Aparte tabata reina un situacion di crisis cu ciere di e refineria. El a splica con e ‘Plan di Rescate’ a pone Aruba bek riba pia. Tambe el a papia di e situacion na 2009 ora tabatin un crisis mundial y Aruba un bes mas mester a deal cu ciere di e refineria. Su gobierno na momento di a tuma rienda na fin di 2009 a scoge pa inversion y no pa austerisacion. Un escogencia cu a pone Aruba den un desacuerdo cu Hulanda. Un desauerdo cu su consecuencianan.

E inversion di Aruba a duna su frutonan. Tur caminda por mira su resultado. Centro di ciudad, scol, hospital, edificionan, areanan publico, barionan, caminda y mucho mas sea a wordo drecha of ta riba lista pa haya nan mehoracion. A traha duro structura pensioen, a adapta e bijstand, a bin cu tecnologia berde, a crea  infrastructura pa un hub entre e continentenan, a mehora e relacion cu Hulanda y varios cos mas. “E resultado ta bisto tur caminda. Esnan cu a bishita Aruba prome cu 2010 y awor por mira e diferencia grandi. Turismo tambe ta creciendo enormemente y ta na 1.7 miyon. Loke ta cobra pa camber a aumenta paralelo na esaki. Na 2009 e crecemento economico tabata minus 10% y awor esaki ta entre 3 y 3.5%. Tur esaki danki na e forma con nos a anda cu nos economia.” Eman a conta cu Aruba a scoge pa no construi mas hotel, pero pa enfoca riba calidad. Poder di compra a subi. Desempleo cu tabata 10.6% ta awor rond di 6.7%. Eman a bisa cu corectamente tur hende den sala ta puntra nan mes si tur cos a bay asina bon, pakico bo a haya bo mes den problema aña pasa. “Hulanda no tabata satisfecho cu e bunita resultadonan aki. Mi ta duna un splicacion cortico kico tabata y ta e preocupacion di Hulanda. Cifranan na 2008 ta indica cu Aruba tabatin un debe di alrededor di 47-48% y na 2012-2013 e posicion di debe aki tabata 80%. Un situacion cu pa Hulanda no tabata defendibel y e preocupacion tabata na su luga. Pero, loke pa mi no ta tragabel ta cu Hulanda ta atribui esaki na mal maneho. Un hende honesto lo a relativa e situacion aki. Gran parti a bin door di e maneho di stimulus.” Enfaticamente Eman a bisa con den e mesun periodo 2008-2013 e trend aki tabata pasa den hopi pais. Grecia, Italia, Portugal, Irlanda, Spaña y hasta na Francia y Alemania. Logico si tene na cuenta cu e crisis cu tabata creciendo. Despues di a inverti, nan a pone e ‘tering naar de nering’, pero ya caba a paga pa banconan cu a bay bancarota, refineria cu a cera y tur esaki a subi e debe. Eman ta haya lamentabel cu ora politiconan di Hulanda papia di Aruba y su debe, nunca ta haci e nuance. “E comprension banda di e preocupacion lo a duna honor na Hulanda, sigur si nan a wak bek riba historia di Aruba y mira con semper e isla y su hendenan a lanta bek riba propio forsa despues di crisisnan.” Despues di e tensionnan di ultimo tempo a yega hunto pa traha riba un protocol. “Nos a compromete nos mes pa yega na un sistema di un ‘meerjarenbegroting’. E presupuesto di Aruba a baha su cifra di 9.7% di deficit presupuestario na casi mita. Aruba nunca tabata di acuerdo cu e cifra di 9.7 pasobra cu esaki tabata debi na gasto di pensioen cu tabata un biaha so. A baha e cifra aki cu ta segun CFT 4.5 (y no 3,7% manera Aruba a bisa), pero enbes di Hulanda ta contento y bisa cu Aruba a baha su debe presupuestario cu mita, e ta bin cu zeurmento cu esaki mester ta mas abou.” Muchachada cu a pone tur hende den sala a hari basta largo. Aruba a traha duro pa a logra baha e cifra aki. E mesun situacion ta presenta su mes pa otro aña. 3.7% mester bira 2,0 y atrobe CFT ta bisa cu esaki ta 2.9%, segun nan calculonan. Ora Eman a bisa cu e ta desapunta cu nunca Hulanda ta duna un complimento, pero ta punta dede so, un aplauso largo a sigui un bes mas.

Aruba nunca a haya ayudo financiero di Hulanda manera Corsou y Sint Maarten a haya. Aruba semper a paga den e fondo di solidaridad cu Hulanda a indica pa yuda e otro islanan. Ora di Status Aparte Aruba a haya un prestamo di 60 miyon cu a wordo paga te cu e ultimo cent. Loke Aruba a haya si ta Fondo Desaroyo Arubano unda Hulanda y Aruba ta pone placa hunto pa proyectonan. E contribucion di Hulanda gradualmente a bira menos. Sint Maarten y Corsou a haya na 2010 un saneamento di debe di 400 miyon. Aruba ni a toca e suerte aki. Cu proyeccionnan Prome Minister Eman a splica e situacion real di Aruba y no loke politiconan ta kere y bisa.

Na final Eman a bisa cu tabatin hopi tension entre Aruba y Hulanda. Sigur aña pasa, pero awor e situacion a mehora. Plasterk tabata na Aruba algun siman pasa y e bishita a bay den bon ambiente. Mescos ta e caso cu van Zwol kende tambe tabata na Aruba y hunto a sinta y delibera con pasa over di e periodo aki. Den su ultimo palabra Presidente di GNA Nico van Grieken a bisa cu poco dia pasa a sali den prensa un articulo ‘De bende van Eman’ y e kier cambi’e den ‘De klasse van Eman”. Fantastico.

Expresionnan haci den e articulo aki no necesariamente ta refleha opinion di ArenaPoliti.co