{idkey=3194b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2458-evelyn-wever-croes-mep-aruba-mester-di-un-minister-di-husticia-nobo%3FItemid%3D101][title=Evelyn+Wever-Croes+%28MEP%29%3A+Aruba+mester+di+un+minister+di+husticia+nobo][desc=FRACCION+DI+MEP+DEN+PARLAMENTO%26amp%3Bnbsp%3BTA+MOMENTO+PA+DECISION+DRASTICO%3A+ARUBA+MESTER+DI+UN+MINISTER+DI+HUSTICIA+NOBO%26amp%3Bnbsp%3BORANJESTAD+--+Fraccion+di+MEP+a+pidi+un+reunion+publico+pa+pone+e+minister+di+husticia+responsabilisa+su+mes.+Sinembargo%2C+e+presidente+di+parlamento+NO+a+yama+e+reunion+aki.+Na+su+lugar%2C+el%26%23039%3Ba+yama+un+reunion+interno%2C+un+bijeenkomst%2C+den+cual+bo+no+por+debati.%26quot%3BUn+bijeenkomst+ta+wordo+yama+den+caso+cu+bo+kier+haya+mas+informacion%2C+pero+pa+nos+fraccion+e+tempo+di+papia+a+caba%21+Awor]}
FRACCION DI MEP DEN PARLAMENTO 
TA MOMENTO PA DECISION DRASTICO: ARUBA MESTER DI UN MINISTER DI HUSTICIA NOBO 

ORANJESTAD -- Fraccion di MEP a pidi un reunion publico pa pone e minister di husticia responsabilisa su mes. Sinembargo, e presidente di parlamento NO a yama e reunion aki. Na su lugar, el'a yama un reunion interno, un bijeenkomst, den cual bo no por debati.
"Un bijeenkomst ta wordo yama den caso cu bo kier haya mas informacion, pero pa nos fraccion e tempo di papia a caba! Awor ta tempo pa tuma decision. Pero den un "bijeenkomst" bo no por tuma decision. Y pesey nos a pidi un debate publico pa Parlamento tuma decision riba e situacion actual dfi criminalidad cu a escala.

Nos ta lamenta cu presidente di Parlamento a nenga nos peticion, pero ta malusa nos peticion pa yama e bijeenkomst, cu ta manera un "onder-onsje" cu minister Dowers. E minister no por bisa nos NADA awe cu ta cambia e situacion. E minister a haya su oportunidad, 6 anja largo. E minister a papia suficiente. E minister a sconde suficiente datos y informacion. Awor ta basta cu papiamento. Awor ta ora di decision.

Ta cuanto morto mas mester cai prome cu tur hende realisa cu nos mester di pasonan drastico?

Nos no tin confiansa mas den e minister di husticia actual, Aruba mester di un minister di husticia nobo, y mirando cu e presidente di parlamento a stroba nos pa entrega un mocion al respecto, mi ta dirigi mi mes na parlamentarionan di AVP: por fabor take charge! Apunta un otro minister di husticia y asina so nos ta manda un senjal cla pa criminalnan. Pasobra si nos no tuma paso awor, criminalnan ta tuma over. Ta pasonan drastico e parlamento aki mester tuma.

Comprondemi bon: nos no tey awe pa culpa riba ningun hende. Pasobra tur e cuerponan presente awe a demostra cu nan por a funciona bonh bou otro ministernan. Pero ningun hende tin un duda cu desde 6 anja pasa nos tin un problema serio na Aruba. Y esey no tin di haber cu e departamentonan sino mas bien cu e minister na cabes.

Tambe ta importante pa senjala cu criminalidad nos a conoce di basta tempo, pero e inseguridad cu nos ta sinti actualmente ta demasiado. Y pesey nos mester tuma pasonan drastico, y mustra e criminalnan cu nos ta bai pone ordo riba nos pais. Pesey tambe mi ta urgi parlamentarionan di AVP pa take charge y ban duna e senjla cu pueblo di Aruba tanto ta anhela.

Awe nos no a wordo permiti pa entrega un mocion di desconfiansa. Pero tin un mayan. Y nos lo warda pa presidente yama e reunion cu nos a pidi urgentemente pa e minister responsabilisa nan mes. Awe nos ta manda un senjal: nos no tin nada mas di scucha awe den e reunion aki, awor ta momento pa 'take a stand'. Nos a hasi esey awe den reunion y mi ta spera cu parlamentarionan di AVP y gremionan uni na esaki". Lider di MEP Evelyn Wever-Croes a duna di conose den e reunion den Parlamento.

Expresionnan haci den e articulo aki no necesariamente ta refleha opinion di ArenaPoliti.co