{idkey=4851b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2499-minister-mike-de-meza-ana-2016-ta-bay-ta-un-ana-hopi-grandi-aruba-ta-den-bon-direccion%3FItemid%3D101][title=Minister+Mike+de+Meza%3A+%E2%80%9CA%C3%B1a+2016+ta+bay+ta+un+a%C3%B1a+hopi+grandi.+Aruba+ta+den+bon+direccion%E2%80%9D][desc=ORANJESTAD+%E2%80%93+Minister+di+Asunto+Economico%2C+Comunicacion%2C+Energia+y+Medio+Ambiente%2C+Ing.+Mike+de+Meza+ta+sinti+un+animo+grandi+cu+yegada+di+2016.+Na+e+evento+%E2%80%98Best+Wishes%E2%80%99+cu+su+ministerio+a+organisa+hunto+cu+San+Nicolas+Business+Association+dialuna+ultimo%2C+e+mandatario+a+duna+un+perspectiva+sumamente+positivo+pa+cu+e+a%C3%B1a+nos+dilanti.+%E2%80%9CNos+ta+mira+nos+dilanti+cosnan+grandi+cu+ta+bay+pasa+den+2016+y+pa+hopi+a%C3%B1a+nos+dilanti.+Aruba+ta+den+e+bon+direccion%2C%E2%80%9D+asina+Minister+de+Meza+a+afirma]}
ORANJESTAD – Minister di Asunto Economico, Comunicacion, Energia y Medio Ambiente, Ing. Mike de Meza ta sinti un animo grandi cu yegada di 2016. Na e evento ‘Best Wishes’ cu su ministerio a organisa hunto cu San Nicolas Business Association dialuna ultimo, e mandatario a duna un perspectiva sumamente positivo pa cu e aña nos dilanti. “Nos ta mira nos dilanti cosnan grandi cu ta bay pasa den 2016 y pa hopi aña nos dilanti. Aruba ta den e bon direccion,” asina Minister de Meza a afirma. 

Como miembro di Gabinete Mike Eman I y II, de Meza ta encarga cu  algun di e carteranan di mas importante awo y den futuro di e isla. Como tal, e tin un bista mas cla di tur e oportunidad y desaroyonan na caminda. “Nos ta na porta di reapertura di refineria cu ta algo grandi pa San Nicolas y pa economia di Aruba en general. Tin exploracion di gas cu pronto lo tin reunionnan importante ta bay tuma luga cu ta sumamente importante pa futuro di Aruba,” e mandatario a splica.

Mirando atras, Minister de Meza ta admiti cu 2015 sigur sigur tabatin su retonan mescos cu 2014. Na mesun momento e ta bisa cu confianza riba e logronan realisa te cu dia di awe y e determinacion pa cumpli cu e vision fiha pa bienestar di e isla. “Nos mester a deal cu e crisis financiero mundial y ciere di refineria, pero awo cos ta bayendo den bon direccion. Gobierno tin su vision cu e ta trahando riba dje, ta perseverando y den e direccion cu ta bayendo na final di dia bo ta mira su frutonan.

Aña 2015 tabata bon pa San Nicolas den forma di e recien reapertura di Joe Laveist Sport Park y nunca den historia tabata den miho condicion. “E ta un joya di un luga y atletanan ta gusta masha hopi mes,” Minister de Meza a comenta. Adicional tin e Carnival Village cu ademas di ta sede di eventonan grandi manera Caiso y Soca Monarch, resto di aña ta un luga caminda tur hende ta recrea. Renobacion di diferente bario y caya den San Nicolas ta otro motibo pa cual pueblo di pariba ta hopi contento cu e maneho y vision di Gabinete Mike Eman II y trabou di Minister Mike de Meza.

Algun di e frutonan cu mas y mas lo concretisa den e proximo aña ta por ehempel construccion di vierbaansweg cu ta hopi importante pa San Nicolas, construccion di hospital nobo y naturalmente, reapertura di refineria.

Expresionnan haci den e articulo aki no necesariamente ta refleha opinion di ArenaPoliti.co