{idkey=1927b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F353-mike-eman-un-proyecto-cu-na-aruba-tin-ta-papia-di-dje-pa-mas-di-30-ana-awor-ta-birando-un-realidad%3FItemid%3D101][title=Mike+Eman%3A+Un+proyecto+cu+na+Aruba+tin+ta+papia+di+dje+pa+mas+di+30+a%C3%B1a+awor+ta+birando+un+realidad][desc=Prome+Minister+mr.+Mike+Eman+y+su+colega+encarga+cu+asuntonan+Economico+di+pais+Aruba%2C+ing.+Mike+de+Meza%2C+tabata+diaranson+mainta+tempran+na+oficina+di+Aruba+Stevedoring+Company+%28ASTEC%29+caminda+nan+a+bay+informa+nan+mes+di+e+ultimo+desaroyonan+relaciona+cu+proyecto+di+mudamento+di+containerhaven+pa+Waf+di+Barcadera.+E+sesion+di+informacion+tabata+den+man+di+director+di+ASTEC%2C+Sr.+Mike+de+l%E2%80%99Isle%2C+supervisor+tecnico+di+e+proyecto+Randy+Angela+y+tambe+director+di+Aruba+Ports+Authority+%28APA%29+Sr.+J]}

Prome Minister mr. Mike Eman y su colega encarga cu asuntonan Economico di pais Aruba, ing. Mike de Meza, tabata diaranson mainta tempran na oficina di Aruba Stevedoring Company (ASTEC) caminda nan a bay informa nan mes di e ultimo desaroyonan relaciona cu proyecto di mudamento di containerhaven pa Waf di Barcadera.

E sesion di informacion tabata den man di director di ASTEC, Sr. Mike de l’Isle, supervisor tecnico di e proyecto Randy Angela y tambe director di Aruba Ports Authority (APA) Sr. Jossy Figaroa. E presentacion tabata uno hopi detaya y tambe un introducion na e fase caminda cu ASTEC ta bay cuminsa desaroya un parti importante di e proyecto.

Mayoria di actividad di waf ainda ta tuma lugar na Paardenbaai, na Playa. Eynan barconan grandi ta baha nan carga, pero cruceronan gigante tambe ta drenta waf eynan. Nan ta literalmente den awa di otro. Pa ambos sector, container y crucero, ta spera un crecemento grandi den e añanan cu ta bin. Na 2011 a otorga e proyecto na ASTEC pa construccion di un waf di container na Barcadera. Mientras tanto e trabounan tin mas di un aña caba dem ehecusion y ta enfoka riba e waf y e parti submarino dilanti di e waf. Aunke un trabou inmenso a tuma luga den e fase aki, e no ta mucho visibel pa motibo cu e tin di haci cu e parti structural di e waf y hopi di e trabou tabata bou di awa. E fase aki ta uno cu ta cay bou di supervision di APA, mientras cu e siguiente fase y mas visibel, ta bou di supervision di ASTEC.

Cu construccion di un waf di carga na Barcadera, ta soluciona varios problema cu e sistema portuario na Aruba ta confronta cu ne, esun di mas importante ta cu e mesun waf ta wordo uza pa turismo y carga. Cu Barcadera tumando e operacion di  carga, e waf na Paardenbaai tin mas potencial mas pa percura pa sector turistico porhaya un mihor producto.

E waf di Bacadera e ora por cuminsa desaroya su servicionan di un manera mucho mas eficiente y na e mesun momento amplia su operacion. Asina e waf aki por cuminsa hunga un rol mas importante den e posicion di Hub di Aruba entre continentenan Eurpeo y Latino Americano.

Awo cu e fase di construccion bou supervision di ASTEC ta cuminsa, ta premira cu e proyecto den su totalidad ta keda completa na final di 2015 y ta operacional caba cuminsamento di 2016. Di otro banda APA a duna di conoce cu cambionan den loke tabata un tempo Freezone banda di Waf di Playa ta bay wordo limpia. Na inicio di 2015 ta cuminsa un proyecto pa kita tur e ruinanan cu na e momentonan aki ta un bista masha mahos mes den Playa, particularmente mirando cu gran parti di turistanan ta pasa dilanti di e ruinanan aki. Di e maner aki tambe ta cuminsa ehecuta un parti di e vision di Gabinete Mike Eman pa habri e bista pa lama, tanto pa turista, pero tambe pa localnan por disfruta di un area di recreacion ey nan.

Prome Minister tabata hopi satisfecho di e sesion informativo hunto cu representantenan di ASTECT y APA. “Tur cu tur, un proyecto mi ta kere cu na Aruba nos tin 30 pa 40 aña ta papiando di dje, cu awor ta gewoon ta bay bira realidad, hunto cu e Hospital, Green Corridor, hopi soñonan cu nos tabata tin den nos pais, un pension general, temanan cu pa añanan, decadanan tabata punto di soño y discusion a bira realidad den e añanan aki y lo sigui bira realidad den e añanan aki.”

Minister Mike de Meza a expresa cu e proyecto ta uno sumamente necesario pa pais Aruba. “E ta necesario, si bo mira downtown Oranjestad y akinan caminda APA ta, ya caba e trafico ta congestiona. Bo tin  e cruceronan, bo tin e containerhaven, e camindanan ta wordo hopi belast, te hasta overbelast.” Banda di esaki, Sr. de Meza a sigui splica cu e ta crea e oportunidad pa Aruba por duna mas contenido na vision pa Aruba por haci e trabou di un Hub entre Europa y continente Latino Americano.

Vision di Gabinete Mike Eman for di 2009 tabata pa e proyecto aki no keda como deseo. Pa hopi decada a papia hopi, per nunca a logra concretisa esaki. Hopi esfuerso y recursonan a bay den haci e proyecto aki un realidad y segun Prome Minister Eman, e ta sumamente orguyoso cu un parti importante di un vision completo pa Aruba su futuro economico y social ta kedando cla.

Expresionnan haci den e articulo aki no necesariamente ta refleha opinion di ArenaPoliti.co