ORANJESTAD- Den su discurso di Fin di Aña Prome Minister Mike Eman a papia di meta y visionnan. El a repasa pasado, a papia di presente y a bay den futuro. El a amplia riba meta y visionnan cu a parce imposibel y no realisabel, pero cu a keda logra, danki na fe y perseverancia, confiansa y certitud di nan balor profundo. Eman a bisa cu husto na momentonan crucial den nos bida, manera na fin di un aña y yegada di un otro nos ta pone e resultado y balansa di nos bida den contexto, nos ta pone metanan nos dilanti, metanan cu ta bira nos vision, nos conexion entre pasado y futuro, nos caminda pa alcansa e propositonan cu cual nos ta drenta un periodo nobo di bida.

‘Caminda no tin vision, un pueblo ta bai perdi’ un proverbio biblico hopi cla riba e importancia pa nos tin un vision, pa nos tin meta y propositonan pa visualisa e caminda cu ta hiba nos di pasado pa futuro segun nos soño y deseonan, asina Eman a splica. “Cada vez cu Aruba su alma a brota cu meta y anhelonan transcendental, nos a excalta den union: ‘Biba Aruba’. Esaki tabata a raiz di visionnan grandi cla pa nos futuro.” E prome mandatario a amplia riba celebracion di 30 aña di Status Aparte di nos pais e aña aki. Status Aparte tabata un vision articula pa Arubianonan ya na inicio di siglo pasa. Pa ta ‘Baas den nos mes Cas’. Aruba por ta chikito den tamaño, pero nos vision pa e baranca aki no a wordo limita na esaki. Generacionnan di Arubiano a carga e lucha y anhelo aki cada vez un paso mas cerca di su realisacion pa complet’e dia 1 di Januari 1986.” Eman a enfatisa con nos antepasadonan a visualisa establecimento di un industria grandi na Aruba y a cana e caminda y a realis’e. E Arubiano semper tabata un visionario y a cana y traha pa logra su visionnan. “Nos mayornan a visualisa construccion di e prome hotel na Aruba y e nesecidad pa concientisacion di e identidad Arubano. Nan a cana e caminda y a realis’e.” Refiriendo na ciere di e refineria na 1986 Eman a recorda con e tempo ey nos rumannan grandi a visualisa e caminda pa rescata Aruba for di su peor crisis cu un expansion impresionante di e industria turistico. “Nan a cana e caminda y a realis’e”. Resultado tabata un Aruba Nobo cu ta e fundeshi riba cual awe mas di 80% di e bida di nos economia ta florece. Cu palabranan metaforico Eman den su discurso a bisa cu como dirigentenan di e isola aki nan tin e responsabildad di subi e ceronan di mas halto, wak door di e scuridad di e tempo mas cera pa busca e caminda y e luz pa guia e pueblo pa un mayan nobo. “Mescos cu cabez di hogarnan nos tin e responsabilidad di busca, mira y delinea e vision aki pa nos famianan, pasobra sin un rumbo cla famianan ta perde e caminda, e inspiracion y motivacion pa traha y gara e oportunidadnan di un miho futuro. No semper tin un vision ta algo facil. Bo ta pone meta y propositonan cu mester wordo splica y visualisa pa otronan por comparti. Cu bon y mal intencion visionnan ta wordo torpedea y obstaculisa.

Paginanan di historia ta yen di personahenan cu a tuma e prome paso den direccion di un rumbo nobo. Nan metanan por tabata distinto, pero nan tur tabata tin den comun cu nan a tuma e prome pasonan, cu e caminda tabata nobo, nan vision tabata original y tur pa un momento tabata un voz solitario den un desierto. Creadornan di cosnan nobo a para hopi vez nan so frente nan contemporaneonan. Nan ideanan tabata worde considera irealistico, nan vision no realisabel, descarta como ideanan cu no ta sirbi. Di luz electrico pa transporte aereo, di formacion di Nacionan Uni of creacion di un Estado Unidos of un Union Europeo, tur a wordo califica como imposibel. Visionnan cu a wordo confronta cu e mesun cynismo. Pero cu balentia e visionarionan a perdura den nan vision original. Nan a lucha y nan a sufri, pero na final nan a triunfa y e causa cu nan a lidera den cambia rumbo di historia di nos pais y a pone cu un bez mas nos por bisa: Biba Aruba!”.  

“Jesus a bisa cu e wowonan di nos vision ta e bentananan di nos curazon. Vision ta pone hende stima nan trabao, profundisa nan proposito den bida, pasobra nan por visualisa e obhetivo final. Si bo kier traha un bon boto, no busca e miho carpinte, busca e persona cu conoce, ta respeta y stima lama.”