{idkey=6501b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2560-partido-abo-ki-dia-e-interes-general-tambe-lo-wordo-sirbi-pa-nos-gobernantenan%3FItemid%3D101][title=Partido+ABO%3A+Ki+dia+e+interes+general%2C+tambe+lo+wordo+sirbi+pa+nos+gobernantenan%3F][desc=Recien+nos+por+a+lesa+y+tende+con+gobierno+kier+sanciona+ambtenaarnan+pa+diferente+asunto+cu+no+ta+cuadra+cu+locual+nan+a+huramenta+of+cu+ta+carece+di+bon+etica.+Porcierto+un+bon+iniciativa%2C+pero+e+ora+ey+gobierno+tin+cu+aplica+e+maneho+aki+pa+full+e+aparato+publico.+Cuminsando+na+e+gobernantenan+y+e+parlamentarionan.+Con+creibel+un+gobernante+por+ta+ora+di+tuma+sancion+contra+un+ambtenaar%2C+mientras+cu+su+persona%2C+su+conseheronan%2C+su+coleganan+y+si+miembronan+di+partido+ta+haci+algo+similar+of+p]}
Recien nos por a lesa y tende con gobierno kier sanciona ambtenaarnan pa diferente asunto cu no ta cuadra cu locual nan a huramenta of cu ta carece di bon etica. Porcierto un bon iniciativa, pero e ora ey gobierno tin cu aplica e maneho aki pa full e aparato publico. Cuminsando na e gobernantenan y e parlamentarionan. Con creibel un gobernante por ta ora di tuma sancion contra un ambtenaar, mientras cu su persona, su conseheronan, su coleganan y si miembronan di partido ta haci algo similar of pio? Pa hopi hende e ta bisto cu nos sistema democratico no ta funciona y el’a wordo reemplasa pa uno di faboritismo, intimidacion y corupcion.

Ken no conoce un persona cu ta warda 100 aña pa haya un pida tereno pa construi su cas. Ken no conoce un mayor cu a inscribi su yiu di chikito pa asina kisas e yiu por haya un tereno ora e bira adulto? E argumento pa e tardansa aki ta: ‘Tin un scarsedad di tereno’. Awor si tin un ‘scarsedad perpetuo’ di tereno, dicon anto semper tin tereno diripiente pa tur hende cu bin for di exterior? Dicon anto ainda ta duna tanto permiso na hende di exterior pa establece nan mes akinan? Tampoco e ta un secreto publico cu cierto personanan di exterior no tin cu pasa na e departamento concerni, manera tur otro ciudadano pa haya un pida tereno. Pa nan, e minister di Infrastructura a introduci e servicio di ‘TERENO RAPIDO’. E personanan aki, tin cu djis bay direct cerca e minister of via un persona cerca di dje cu un carta caminda ta poni exacto cua tereno y ki grandura cu nan kier y voilà: ‘DIR DIP/DOW, dezerzijds akkoord, gaarne medewerking of uitvoeren’. Cu e forma di procede aki, e minister ta mustra cu e no ta tene cuenta cu nos leynan, maneho, procedura of e autoridad di e departamentonan concerni. Tur cos ta wordo bulldoze pasobra ta nan gobierno ta manda y hopi ambtenaar tin miedo pa denuncia e tipo di bagamunderia aki. Of cu pasobra algun di nan tambe a sucumbi pa corupcion y soborno.

Algun preguntanan interesante: Kico ta pone cu un gobernante por hala tur ley na banda, manera nan no ta conta pa su persona? Kico ta pone un gobernante kibra su huramentacion di sirbi e interes general, pa sirbi su propio interes? Dicon cierto ambtenaar, ta coopera cu un maneho anti bon gobernacion? Tur decision cu gobierno tuma, mester ta motiva. Anto dicon ambtenaarnan ta acepta un ‘krabbeltje’ di ‘akkoord dezerzijds’ di un minister sin motivacion? Su batayon di coordinador no por skirbi e motivacion di su decision? Esaki tambe ta contra ley!

Dicon ambtenaarnan/pueblo ta acepta cu un gobernante ta duna na algun hende cu ta bini for di exterior un pida tereno den algun dia? Dicon ambtenaarnan ta coopera ora nan sa cu e minister ta trata di legalisa construccionnan ilegal den bario despues cu e construccion a cuminsa of a termina y asina daña e calidad di bida den e bario? Tur esaki no tin nada di haci cu bon gobernacion of drecha e economia di e isla. E unico economia cu ta wordo drecha, ta esun di e grupito privilegia mientras cu e isla y e sociedad ta wordo destrui.

Awendia tin algun minister no ta papia of confia otro pa entre otro entrega di tereno. Ta asina interesante entrega di tereno a bira of asina lucrativo? Y desde e siman aki, pueblo tambe a haya sa cu tin mas minister ta duna Sr. Roberto Enrique Rincon Fernandez un trato preferencial. Dicon? Dus gobierno, drecha e top di gobernacion prome cu trata di introduci dictadura total riba e isla aki pa tapa bagamunderia y corupcion!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co