{idkey=2625b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2568-booshi-wever-upp-laboratorionan-na-aruba-no-ta-cumpli-cu-exigencianan-di-bon-calidad-segun-minister-schwengle%3FItemid%3D101][title=Booshi+Wever+%28UPP%29%3A+Laboratorionan+na+Aruba+no+ta+cumpli+cu+exigencianan+di+bon+calidad%2C+segun+minister+Schwengle][desc=NoticiaCla+a+publica+dia+14+di+januari+2016+un+entrevista+cu+a+sostene+cu+e+minister+di+salubridad+encuanto+e+calidad+di+servicio+di+laboratorionan+na+Aruba.+E+minister+a+declara+cu%3A+%E2%80%9Ctin+exigencia+di+calidad+cu+t%E2%80%99ey%2C+y+AZV+no+ta+cera+contract+si+no+tin+ISO+acredita.+E+problema+ta+cu+e+level+di+acreditacion+no+ta+suficientemente+halto.+E+t%E2%80%99ey%2C+pero+mester+ta+miho%E2%80%9D.+Cu+e+declaracion+aki+e+minister+ta+duna+di+conoce+cu+no+por+confia+e+laboratorionan+na+Aruba%2C+pasobra+nan+no+ta+cumpli+cu+e+]}
NoticiaCla a publica dia 14 di januari 2016 un entrevista cu a sostene cu e minister di salubridad encuanto e calidad di servicio di laboratorionan na Aruba.
E minister a declara cu: “tin exigencia di calidad cu t’ey, y AZV no ta cera contract si no tin ISO acredita. E problema ta cu e level di acreditacion no ta suficientemente halto. E t’ey, pero mester ta miho”.
Cu e declaracion aki e minister ta duna di conoce cu no por confia e laboratorionan na Aruba, pasobra nan no ta cumpli cu e exigencianan internacional di bon calidad?
E minister, manera a bira su custumber caba, ta tira piedra, sconde man. Ta menciona cu e calidad di e laboratorio di gobierno - cu recientemente den un acto protocolario masha formal a pasa na man di hospital - nunca a cumpli cu e exigencianan di calidad internacional.
Den e mesun rosea e minister ta duna nos di conoce cu ningun laboratorio na Aruba ta cumpli cu e nivel halto di cuido di calidad, apesar cu nan tin un acreditacion, pasobra e audit lo por a wordo comprometi door di esun cu ta paga pa e investigacion (“wie betaalt, bepaalt”).

Kiko ta e consecuencia di e declaracion imprudente aki haci door di e persona cu ta encarga pa ley pa cumpli cu reglanan di bon gobernacion y tambe defende e interes di e pueblo cu a pone su confiansa den e gobierno aki?
Mi por a tuma nota den e “handboek gezondheidsrecht” publica na 2008, cu un derecho fundamental di e pueblo ta pa ricibi un cuido medico di calidad halto, y cu ta e tarea di gobierno pa duna contenido real na cumplimento di e ley aki.
Nos pueblo, y particularmente esnan cu ta rekeri ayudo medico, mester por confia cu e servicio cu nan ta haña, ta sigur, pa asina evita un mal trabou pa motibo di mal informacion.

Cu e declaracion encuanto funcionamento di laboratorionan na Aruba, minister Schwengle ta habri caminda pa duda, y esey ta contra e derecho fundamental di e pueblo.
Con ami como patient di prostaat, por confia riba e test di laboratorio na Aruba?
Mi specialista lo basa su tratamento riba e resultado ricibi di laboratorio, y si encaso e resultado no ta di confia, anto mi bida ta core peliger.

Mi ta exigi como ciudadano di pais Aruba y como patient, pa lo mas pronto posibel bin clarificacion riba e expresion haci door di e minister di salubridad.
E minister recientemente a pasa e ley di BIG aki na Aruba, y esey kiermen cu tur esnan cu ta ofrece cuido, mester cumpli cu e exigencianan di bon calidad di cuido.
No tin mester di warda ni un siman, y sigur no 2 pa 3 aña pa ami y nos pueblo haña e garantia cu e servicio brinda door di laboratorionan, ta bon.
Esey ta mi derecho como ciudadano biba na Aruba.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, januari 15, 2016

Expresionnan haci den e articulo aki no necesariamente ta refleha opinion di ArenaPoliti.co