Dia 21 di mei 2014 Schwengle ta declara cu a firma un acuerdo cu KLM (despues di e famoso           vuelo cu biofuel), AZV y Erasmus Medisch Centrum di Rotterdam.

E minister ta declara: “ta evalua pa un convenio di cooperacion pa cu pacientnan cu mester bay Hulanda pa tratamento medico cu no por wordo duna na Aruba of den e region. E grupo aki no ta costa mas placa pasobra nan ta hayando tratamento na Hulanda caba, pero AZV kier centraliza esaki cerca un partner, y Erasmus ta un di e mihornan na Hulanda”.

Segun e mandatario, “asina por ofrece na mas pacient e partner aki, y na lugar di subi gasto e lo baha e gastonan di cuido medico”.

En berdad Erasmus ta un di e mihonan di Hulanda, dicon no a sigui cu nan? Nos pueblo no tin derecho pa haya un cuido na un di e mihonan di Hulanda?

E minister apoya door di e director di AZV, ta declara cu e gastonan lo baha y cu kier centralisa e cuido y cu Erasmus ta un di e mihornan na Hulanda.

Sinembargo kiko a sosode mientras tanto??

A haci un palabracion cu universidad di Maastricht pa ehecuta “missies” algun bes pa aña na Aruba cu e proposito pa mehora e cuido cardio-vascular aki mes, pero tambe cuminsa duna nos profesionalnan local e oportunidad di prepara nan mes di tal forma cu na final di cuenta lo por a ehecuta mayoria di e casonan na Aruba sin ayudo extenso di expertonan di Maastricht.

Tur hende tabata satisfecho cu e resultado.

E pacientnan y nan famia, ehecutivonan di AZV y Maastricht, y tambe e mesun minister a expresa palabranan di elogio, pero un dia pa otro sin mas a stop e proyecto aki, sin duna ningun clase di motibo, pa awor nos bin tende cu atrobe otro hospital, esta AMC di Amsterdam lo bay wordo encarga pa continua cu e proyecto aki.

E director tambe a duna di conoce cu nos expertonan local lo por bay sigui entrenamiento pa despues di tempo tuma encargo di e proyecto, pero esey tambe tabata e plan cu Maastricht!

Es mas: un di nos cardiologonan cu a bin establece su mes na Aruba, recientemente a termina su specialisacion na Maastricht mes. Lo e por splica nos cu su specialisacion na Maastricht no tabata na e mesun nivel di AMC anto?

Of negoshi di un cardiologo Arubano ta mas importante cu e patient Arubano?

Dicon un biaha mas no ta bisa pueblo e motibo cu Maastricht a bula afo?

Ta tristo pa constata cu 6 aña despues a yega na e mesun conclusion y na e mesun ehecucion di un proyecto cu lo por a salba bida di hopi conciudadano, y tambe por a garantisa un cuido di nivel na Aruba mes.

Mi ta convenci cu e gastonan envolvi na 2009 lo tabata mucho menos cu lo e bay costa awor, y cu lo por a ehecuta e palabracion haci e tempo ey caba cu nos hermana Islanan Corsou y Boneiro, cu lo a beneficia sobrevivencia di e cuido cardio-vascular mas ainda na Aruba, y cu por a nifica un desaroyo hopi positivo pa nos pueblo en general, pero pa e pueblo di San Nicolas en particular.